সময়মতে মোবাইলৰ মাহেকীয়া কিস্তি (EMI) দিব নোৱাৰাৰ শাস্তি! সাধাৰণ শাস্তি নহয়, মাৰাত্মক শাস্তি। উত্তৰ প্ৰদেশৰ লক্ষ্ণৌৰ নিগোহা অঞ্চলত এজন যুৱকক ঘৰৰ পৰা তুলি নি ব্লাড বেংকলৈ লৈ গৈ বলপূৰ্বক শৰীৰৰ পৰা তেজ উলিয়াই নিয়াৰ গুৰুতৰ অভিযোগ উত্থাপন হৈছে এক ফোন বিক্ৰেতাৰ বিৰুদ্ধে।
কেৱল সেয়াই নহয়, তেজ লোৱাৰ পিছত যুৱকজনক লক্ষ্ণৌৰ এটা ঘৰত আৱদ্ধ কৰি ৰাখি পাঁচদিন ধৰি মাৰধৰ আৰু বলপূৰ্বক কামত লগোৱাৰ অভিযোগ উঠিছে। অৱশেষত আৰক্ষীয়ে নিৰ্যাতিত যুৱকজনক উদ্ধাৰ কৰে।
আৰক্ষী আৰু ভুক্তভোগী পৰিয়ালে জনোৱা মতে, যুৱকজনে প্ৰায় এবছৰ পূৰ্বে নিগোহা অঞ্চলৰ এখন দোকানৰ পৰা ২১,৫০০ টকাৰ এটা স্মাৰ্টফোন ক্ৰয় কৰিছিল। চুক্তি অনুসৰি ফোনটোৰ সম্পূৰ্ণ মূল্য প্ৰতিমাহে ২৭৯৯ টকাৰ ১২টা কিস্তিত আদায় দিয়া হ’ব। কিন্তু প্ৰথম মাহৰ কিস্তি দিব নোৱাৰাতে নিৰ্যাতন আৰম্ভ হয়।
অভিযোগ অনুসৰি কিস্তি বাকী থকাৰ বাবেই দোকানৰ মালিকে প্ৰথমে যুৱকজনৰ পৰা কিনা মোবাইলটো বলপূৰ্বকভাৱে কাঢ়ি নিবলৈ মানুহ পঠিয়াইছিল। ইয়াৰ পিছতে যোৱা ৮ ছেপ্টেম্বৰত দুজন দুষ্কৃতিকাৰীক যুৱকজনৰ ঘৰলৈ প্ৰেৰণ কৰা হয়। তাৰ পৰাই তেওঁক তুলি লৈ গ’ল।
যুৱকজনে দাবী কৰা মতে, অপহৰণৰ পিছত তেওঁক পোনে পোনে লক্ষ্ণৌৰ এটা ব্লাড বেংকলৈ লৈ যোৱা হয়। তাত তেওঁৰ আপত্তি আৰু অনুৰোধৰ পিছতো তেওঁৰ শৰীৰত চিৰিঞ্জ সুমুৱাই বলপূৰ্বকভাৱে এক ইউনিট তেজ লোৱা হয়। তেজ লোৱাৰ পিছত তাৰ পৰাই তেওঁক সদৰ অঞ্চলৰ এটা নিৰ্জন ঘৰলৈ লৈ যোৱা হয়। অভিযোগ অনুসৰি, পাঁচ দিন ঘৰত ৰাখি নিয়মিতভাৱে মাৰধৰ কৰা, ঘৰৰ কাম কৰিবলৈ বাধ্য কৰাইছিল আৰু ঘটনাৰ বিষয়ে জনালে হত্যা কৰাৰ ভাবুকি দিছিল।
পুত্ৰ নিৰুদ্দেশ হোৱাৰ বাবে আৰু অহৰহ ভাবুকি পোৱাৰ বাবে আতংকিত হৈ পৰা পৰিয়ালটোৱে অৱশেষত আৰক্ষীক খবৰ দিয়ে। অপহৰণৰ লিখিত অভিযোগ দাখিল কৰা হয়।
এজাহাৰ লাভ কৰাৰ পিছতে স্থানীয় আৰক্ষীয়ে তদন্ত আৰম্ভ কৰে। অপহৰণৰ পাঁচ দিনৰ পাছত ম’বাইল টাৱাৰৰ স্থান আৰু অন্যান্য সূত্ৰৰ ভিত্তিত লক্ষ্ণৌৰ আত্মগোপন স্থানত অভিযান চলাই যুৱকজনক উদ্ধাৰ কৰে। ফোনৰ ই এম আই আদায়ৰ বাবে তেজ উলিয়াই নিয়া এই ভয়াবহ আৰু মধ্যযুগীয় প্ৰথাৰ ঘটনাই যোগী ৰাজ্যত চাঞ্চল্যৰ সৃষ্টি কৰিছে।
