দেশৰ স্বাধীনতা দিৱসৰ উদযাপনৰ মুহূৰ্তত গণতান্ত্ৰিক ব্যৱস্থাৰ প্ৰতি ভাবুকিৰ সৃষ্টি কৰা চাৰিটা প্ৰশ্ন দাঙি ধৰা হৈছে। ইয়াত উত্তৰ দিছে যুৱনেতা তথা অধিবক্তা মাধুৰ্য বৰুৱাই –
প্ৰশ্নঃ স্বাধীনতাৰ ৭৬ বৰ্ষত আমাৰ দেশ আজি এক অস্বাভাবিক সংকটৰ গৰহত। এতিয়া আমাৰ কাৰণে আটাইতকৈ ডাঙৰ প্ৰত্যাহ্বান কি বুলি আপুনি ভাবে?
উত্তৰঃ আমাৰ সন্মুখত আটাইতকৈ ডাঙৰ প্ৰত্যাহ্বান হল দেশত ক্ৰমে শেষ হৈ অহা গণতান্ত্ৰিক প্ৰমূল্যক যি কোনো প্ৰকাৰে ৰক্ষা কৰা।
প্ৰশ্নঃ গণতন্ত্ৰৰ লগত অৰ্থনৈতিক সমতাৰ প্ৰশ্নটো আপুনি কেনেকৈ চাব?
উত্তৰঃ গণতন্ত্ৰৰ লগত অৰ্থনৈতিক সমতা হাতে হাতে আগবাঢ়িব লাগিব নহলে সি সঁচা অৰ্থত গণতন্ত্ৰ হৈ নুঠিব। গণতান্ত্ৰিক ব্যৱস্থা এটা শক্তিশালী হবলৈ হলে সমাজত আটাইতকৈ পিছ পৰা ব্যক্তিজনকো আগুৱাই আনিব লাগিব আৰু তেওঁক অৰ্থনৈতিকভাৱে স্বাধীন কৰিব লাগিব।
প্ৰশ্নঃ এই যে বৰ্তমান চৰকাৰে নিৰ্বিচাৰে ৰাজহুৱা সম্পদ আৰু সম্পত্তিবোৰ ব্যক্তিগত পুঁজিপতিক গতাই দিছে তাৰ ভৱিষ্যত পৰিনাম কি হ’ব বুলি ভাবে?
উত্তৰঃ তাৰ ভৱিষ্যত পৰিনাম অতি ভয়াৱহ হব। কবলৈ গলে ইতিমধ্যেই ভয়াৱহ হৈ উঠিছে। এতিয়া প্ৰায় ১০% মান মানুহৰ হাতত সমস্ত দেশৰ পুঁজি। দৰিদ্ৰতা বৃদ্ধি হৈছে, নিবনুৱা বাঢ়িছে, চাৰিওফালে মূল্য বৃদ্ধিৰ মাধ মাৰ। বৰ্তমান অৱস্থাত সাধাৰণ মানুহৰ বাবে জীৱন দুৰ্বিহ হৈ উঠিছে। সেয়েহে গণতান্ত্ৰিক ব্যৱস্থাটোক উদ্ধাৰ কৰি আমি ৰাইজৰ স্বাৰ্থৰ এক অৰ্থনৈতিক ব্যৱস্থা গঢ় দিব লাগিব।
প্ৰশ্নঃ আজি পৰিস্থিতিত আমি কেনেকৈ সাংবিধানিক প্ৰমূল্য আৰু গণতান্ত্ৰিক অনুষ্ঠানৰ সমূহৰ স্বতন্ত্ৰতা ৰক্ষা কৰিম?
উত্তৰঃ আমাৰ মাজত থকা সৰ্ব শক্তিৰে সকলোকে সামৰি আমি ঐক্যবদ্ধ গণতান্ত্ৰিক সংগ্ৰাম গঢ়ি তুলিলে বৰ্তমানৰ এই ব্যৱস্থা আমি সলনি কৰিব পাৰিম।
