ভাৰতীয় ক্ৰিকেট দলৰ মুখ্য প্ৰশিক্ষক ৰবি শাস্ত্ৰীয়ে বৃহস্পতিবাৰে ২০১১ চনত ভাৰতীয় ক্ৰিকেট দলে বিশ্বকাপ জয় কৰাৰ শুভেচ্ছামূলক এটা ভিডিঅ’ যুৱৰাজ সিং আৰু মহেন্দ্ৰ সিং ধোনীক টেগ নকৰাকৈ ছ’চিয়েল মিডিয়াত আপলোড কৰাক লৈ যুৱৰাজ সিঙে সমালোচনা কৰিছে শাস্ত্ৰীক।
উল্লেখযোগ্য যে, বিগত ২ এপ্ৰিলত ২০১১ চনৰ ২ এপ্ৰিলত ভাৰতে মুম্বাইত শ্ৰীলংকাক পৰাস্ত কৰি দ্বিতীয়বাৰৰ বাবে বিশ্ব চেম্পিয়ন হোৱাৰ ৯ বছৰ সম্পূৰ্ণ হয়।
উক্ত দিনাখন বিশ্বকাপ বিজয়ী ভাৰতীয় দলটোক শুভেচ্ছা জ্ঞাপন কৰাৰ উদ্দেশ্যে শাস্ত্ৰীয়ে ছ’চিয়েল মিডিয়াত এটা ভিডিঅ’ আপলোড কৰে আৰু বৰ্তমান অধিনায়ক বিৰাট কোহলী আৰু প্ৰাক্তন মহান ক্ৰিকেটাৰ শচনী টেণ্ডুলকাৰক টেগ কৰে।
ভিডিঅ’টো যুৱৰাজ আৰু ধোনীক টেগ নকৰা দেখি যুৱৰাজে সিঙে শাস্ত্ৰীক সমালোচনা কৰি তেওঁলোকো বিশ্বকাপ বিজয়ী দলটোৰ সদস্য আছিল বুলি উল্লেখ কৰে।
‘‘জেষ্ঠজনলৈ ধন্যবাদ, আপুনি মোক আৰু মাহীকো টেগ কৰিব লাগিছিল। আমিও দলটোৰ সদস্য আছিলো,’’ যুৱৰাজ সিঙে টুইটাৰত লিখে।
আনহাতে, যুৱৰাজ সিঙৰ মন্তব্যৰ পাছতে টুইটাৰত শাস্ত্ৰীয়ে যুৱৰাজক মহান আখ্যা দিয়ে।
‘‘বিশ্বকাপ জয়ৰ প্ৰসংগৰ ক্ষেত্ৰত তুমি কনিষ্ঠ নোহোৱা। তুমি মহান ক্ৰিকেটাৰ,’’ উত্তৰত শাস্ত্ৰীয়ে যুৱৰাজ সিঙক কয়।
তাৎপৰ্য্যপূৰ্ণ যে, কিছুদিন পূৰ্বে এটা সাক্ষাৎকাৰত যুৱৰাজ সিঙে মহেন্দ্ৰ সিং ধোনী আৰু বিৰাট কোহলীত কৈ সৌৰভ গাংগুলীক শ্ৰেষ্ঠ অধিনায়ক আখ্যা দি গাংগুলীয়ে তেওঁক অধিক সুযোগ দিছিল বুলি মন্তব্য কৰিছিল।