চলিত ২০২৬ চনৰ আই পি এলৰ মাজভাগতে ভেপিং বিতৰ্কত জড়িত হৈ পৰিল পঞ্জাব কিংছৰ স্পিনাৰ যুজবেন্দ্ৰ চাহাল। ইয়াৰ পূৰ্বে ৰাজস্থান ৰয়েলছৰ ৰিয়ান পৰাগৰ ক্ষেত্ৰত এনে বিতৰ্কৰ সৃষ্টি হৈছিল। এইবাৰ একেটা বিষয়তে চাহালৰ নামো চৰ্চালৈ আহিল।
এটা ভাইৰেল ভিডিঅ’ই ইতিমধ্যে ছ’চিয়েল মিডিয়াত আলোড়নৰ সৃষ্টি কৰিবলৈ আৰম্ভ কৰিছে। অভিযোগ অনুসৰি বিমানৰ ভিতৰতে চাহালে ই-চিগাৰেট ব্যৱহাৰ কৰা দেখা গৈছে।
জানিব পৰা মতে, এই ভিডিঅ’টো পঞ্জাৱ দলৰ ভ্ৰমণৰ সময়ত লোৱা হৈছে। অৰ্শদীপ সিঙৰ ভিডিঅ’ৰ বেকগ্ৰাউণ্ডত দেখা গৈছে চাহালক। পিছত এই ভিডিঅ’টো ছ’চিয়েল মিডিয়াৰ পৰা আঁতৰাই পেলোৱাৰ দাবী উত্থাপন হৈছে।
কিন্তু তেতিয়ালৈকে ভিডিঅ’টোৰ কিছু অংশ ইণ্টাৰনেটত দ্ৰুতগতিত বিয়পি পৰিছে। যদিও এই ঘটনা সন্দৰ্ভত এতিয়ালৈকে চাহাল, পঞ্জাৱ কিংছ বা আই পি এল কৰ্তৃপক্ষৰ পৰা কোনো আনুষ্ঠানিক প্ৰতিক্ৰিয়া পোৱা হোৱা নাই।
বিমানৰ ভিতৰত ধূমপান বা ই-চিগাৰেট ব্যৱহাৰ কৰাটো কঠোৰভাৱে নিষিদ্ধ। কাৰণ ইয়াৰ ফলত অগ্নিকাণ্ডৰ আশংকা সৃষ্টি হ’ব পাৰে, যিটো যাত্ৰীৰ সুৰক্ষাৰ বাবে অতি বিপদজনক।
এই কাৰণেই চাহালৰ বিৰুদ্ধে উত্থাপিত অভিযোগক কেন্দ্ৰ কৰি প্ৰশ্ন উত্থাপন হ’বলৈ আৰম্ভ কৰিছে। বহুতে ধাৰণা কৰে যে যদি অভিযোগ সত্য বুলি প্ৰমাণিত হয়, তেন্তে বিষয়টোৱে কেৱল আই পি এলৰ নিয়ম উলংঘা কৰাই নহয়, আইনী সমস্যাও সৃষ্টি কৰিব পাৰে।
অৱশ্যে এই পৰ্যন্ত যুজবেন্দ্ৰ চাহাল, অৰ্শদীপ সিং, পঞ্জাব কিংছ বা আই পি এল কৰ্তৃপক্ষই কোনো আনুষ্ঠানিক বক্তব্য দিয়া নাই। ফলত ভিডিঅ’টোৰ সত্যতা এতিয়াও নিশ্চিত হোৱা নাই।
চলিত ছিজনৰ আৰম্ভণিতে ৰাজস্থান ৰয়েলছৰ অধিনায়ক ৰিয়ান পৰাগ ই-চিগাৰেটৰ বিতৰ্কৰ সৈতে জড়িত হৈছিল। ড্ৰেছিং ৰুমৰ ভিডিঅ’ত তেওঁক ই-চিগাৰেট ব্যৱহাৰ কৰা দেখা গৈছিল। এই ঘটনাৰ বাবে ৰিয়ানক জৰিমনাও বিহা হৈছিল।
এইবাৰ ক্ৰিকেটাৰৰ অনুশাসনক লৈ পুনৰ প্ৰশ্ন উত্থাপন হৈছে, কিয়নো একেটা বিতৰ্কত যুজবেন্দ্ৰ চাহালৰ নাম আহি পৰিছে। বিশেষকৈ আই পি এলৰ দৰে ডাঙৰ মঞ্চত, য’ত ক্ৰিকেটাৰসকলক কোটি কোটি যুৱকে আদৰ্শ হিচাপে চায়, তেনে অভিযোগে স্বাভাৱিকতে আৰু ডাঙৰ বিতৰ্কৰ সৃষ্টি কৰে।
খেলপথাৰত প্ৰদৰ্শনৰ বাবে এতিয়া চাপত আছে পঞ্জাৱ কিংছ। একেৰাহে তিনিখন মেচত পৰাস্ত হৈ পইণ্ট তালিকাৰ শীৰ্ষ স্থান হেৰুৱাইছে দলটোৱে। ইতিমধ্যে বেয়া ফিল্ডিংক লৈ সমালোচনা হৈছে। ইপিনে এই নতুন বিতৰ্কই দলটোক আৰু অধিক অস্বস্তিত পেলাইছে।
অৱশ্যে ছ’চিয়েল মিডিয়াত বিয়পি পৰা সকলো তথ্য এতিয়াও পৰীক্ষা কৰা হোৱা নাই। বহুতে সকীয়াই দিছে যে সম্পূৰ্ণ সত্য নজনাকৈ কোনো সিদ্ধান্ত লোৱা উচিত নহয়। এতিয়া চোৱা যাওক অৱশেষত এই বিতৰ্কৰ ওপৰত আই পি এল আৰু আনুষংগিক ফ্ৰেঞ্চাইজিসমূহে কি স্থিতি গ্ৰহণ কৰে।
