টি-২০ বিশ্বকাপৰ অন্তিম দুখন খেলত ভাৰতে ৫০০ৰো অধিক ৰান সংগ্ৰহ কৰিছে। সঞ্জু চেমছনৰ নেতৃত্বত মুম্বাই আৰু আহমেদাবাদত ৰানৰ ধুমুহা তুলিছে বেটছমেনসকলে। কিন্তু কেৱল বেটিং নহয় – ছেমি ফাইনেল আৰু ফাইনেলৰ দৰে পৰ্যায়ত টিম ইণ্ডিয়াৰ জয়ৰ অন্যতম স্থপতি যিগৰাকী, তেওঁ কোনো বেটছমেন নহয়, দলৰ নিৰ্ভৰযোগ্য পেচাৰ যশপ্ৰীত বুমৰাহ।
অন্তিম চাৰিৰ খেলত ১৮ নং অভাৰত ইংলেণ্ডৰ বেটছমেনসকলক ৰখাই দিয়ে। তাৰ পিছত ফাইনেলত নিউজিলেণ্ডৰ বিৰুদ্ধে ১৫ ৰানত ৪ টা উইকেট দখল কৰে। পাকিস্তানৰ ক্ৰিকেট কিংবদন্তি জাহিৰ আব্বাছ এনে প্ৰদৰ্শনত মুগ্ধ হৈ পৰিছে। তেওঁ নিজৰ দেশৰ দুজন প্ৰাক্তন বলাৰৰ নাম উল্লেখ কৰি বুমৰাহক প্ৰশংসা কৰিছে।
ইতিহাসৰ অন্যতম শ্ৰেষ্ঠ বেটছমেন ‘এছিয়ান ব্ৰেডমেন’ নামেৰে পৰিচিত জাহিৰ আব্বাছে ‘স্প’ৰ্টছ নাও’ৰ সৈতে হোৱা এক সাক্ষাৎকাৰত কয় যে, ‘যশপ্ৰীত বুমৰাহ হৈছে ৱাকাৰ ইউনিছ আৰু ৱাছিম আক্ৰামৰ সংমিশ্ৰণ। তাত কোনো সন্দেহ নাই। ইয়ৰ্কাৰ, গতি, গুৰুত্বপূৰ্ণ মুহূৰ্তত বল ছুইং কৰাৰ ক্ষমতা – এই সকলোবোৰ অসাধাৰণ। এই প্ৰদৰ্শনেৰে অকলেই দলটোক বিশ্বকাপ জয়ী কৰিছে!’
বুমৰাহৰ লগতে ৭৮ বছৰীয়া পাক কিংবদন্তিগৰাকীও সঞ্জু চেমছনক লৈও উৎসাহিত হৈ পৰিছে। তেওঁৰ ভাষাত ‘সঞ্জুৱে শীৰ্ষত ব্যতিক্ৰমী বেটিং কৰিছে। তিনিখন মেচত ৮০ৰ ওপৰৰ ইনিংছ – অবিশ্বাস্য। দৰাচলতে সমগ্ৰ দলটোৰ প্ৰদৰ্শন আছিল অসাধাৰণ!’
বিশ্বকাপ জয়ৰ বাবে টিম ইণ্ডিয়াক প্ৰাপ্য কৃতিত্ব দিবলৈ জাহিৰে একেবাৰেই দ্বিধাবোধ কৰা নাই। তেওঁ কয়, ‘তেওঁলোকে চেম্পিয়নৰ দৰে খেলিছিল। এই প্ৰতিযোগিতাত তেওঁলোকে জয়লাভ কৰাৰ যোগ্য আৰু তেওঁলোকে জয়ী হ’ল। তিনিবাৰকৈ বিশ্বকাপ জয় কৰাৰ বাবে ভাৰতলৈ অভিনন্দন!’
উল্লেখ্য যে ১৯৬৯ চনৰ পৰা ১৯৮৫ চনলৈকে জাহিৰে পাকিস্তানৰ হৈ ৭৮খন টেষ্টত গড়ে ৪৪.৭৯ ৰানকৈ মুঠ ৫,০৬২ ৰান আৰু ৬২খন এদিনীয়াত গড়ে ৪৭.৬২ ৰানকৈ মুঠ ২৫৭২ ৰান সংগ্ৰহ কৰিছিল। চুবুৰীয়া দেশ এখনৰ কিংবদন্তিৰ মুখৰ পৰা এই স্বীকৃতি কেৱল বুমৰাহৰ বাবেই নহয়, ভাৰতৰ বাবেও এক বিশেষ সন্মান।
