জুবিন গাৰ্গৰ মৃত্যুৰ সময়ত ইয়টখনত উপস্থিত আছিল তেওঁৰ ভ্ৰাতৃ সন্দিপন গাৰ্গ। সেয়ে মৃত্যুৰ গোচৰত সন্দেহৰ আওতাত আছিল শিল্পীগৰাকীৰ ভ্ৰাতৃ সন্দিপনো। জুবিন গাৰ্গৰ ৰহস্যজনক মৃত্যু সন্দৰ্ভত বিশেষ তদন্তকাৰী দলে সোধা-পোছা কৰাৰ পিছতে গ্ৰেপ্তাৰ কৰিছে তেওঁৰ ভ্ৰাতৃ উপ আৰক্ষী অধীক্ষক সন্দীপন গাৰ্গক।
জেৰাৰ বাবে চিআইডিৰ কাৰ্যালয়ত উপস্থিত হোৱাৰ কিছু সময়ৰ পিছতে তেওঁক গ্ৰেপ্তাৰ কৰা হৈছে বুলি জানিব পৰা গৈছে। ইয়াৰ পিছত তেওঁক মুখ্য ন্যায়িক দণ্ডাধীশ (চিজেএম) আদালতত হাজিৰ কৰা হ’ব।
উল্লেখ্য যে এই ঘটনাৰ সময়ত ছিংগাপুৰৰ ইয়টখনত বাকীসকল সহযোগীৰ উপৰিও উপস্থিত আছিল প্ৰয়াত গায়কজনৰ ভ্ৰাতৃ সন্দিপন গাৰ্গ। এই সপ্তাহৰ আৰম্ভণিতে এছ আই টিয়ে জেৰা কৰা ব্যক্তিসকলৰ ভিতৰত তেওঁও আছিল। জেৰাৰ পিছত তেওঁ নিজৰ ফেচবুক পেজত গৈ কয় যে, “মই এছ আই টিৰ সৈতে সম্পূৰ্ণ সহযোগিতা কৰিছো,”।
জুবিন গাৰ্গৰ মৃত্যুৰ তদন্তত বিগত কেইদিনমানৰ পৰা নতুন নতুন দিশ পোহৰলৈ আহিছে। ১ অক্টোবৰত এছ আই টিয়ে শিল্পীগৰাকীৰ পৰিচালক সিদ্ধাৰ্থ শৰ্মা আৰু ছিংগাপুৰৰ অনুষ্ঠানটোৰ বাবে দায়বদ্ধ উৎসৱৰ আয়োজক শ্যামকানু মহন্তক গ্ৰেপ্তাৰ কৰে।
দুয়োজনকে শিল্পীগৰাকীৰ সম্ভাব্য হত্যাৰ অভিযোগত গ্ৰেপ্তাৰ কৰা হৈছে। তদুপৰি সংগীত শিল্পী শেখৰ জ্যোতি গোস্বামী আৰু কণ্ঠশিল্পী অমৃতপ্ৰভা মহন্তকো জিম্মাত লৈ ১৪ দিনৰ বাবে আৰক্ষীয়ে আটক কৰি ৰখিছে।
এছ আই টিয়ে জুবিন গাৰ্গৰ মৃত্যুৰ তদন্ত অব্যাহত ৰখাৰ লগতে, কৰ্তৃপক্ষই নিজৰ দোষ লুকুৱাৰ সম্ভাৱনাকে ধৰি বিভিন্ন দিশৰ প্ৰতি লক্ষ্যৰাখি তদন্ত চলাই গৈছে বুলি সদৰী কৰিছে।
