জুবিন গাৰ্গৰ মৃত্যুৰ অনুসন্ধানৰ নামত এইবোৰ কি চলি আছে? অসমৰ জনপ্ৰিয় গায়ক জুবিন গাৰ্গৰ মৃত্যুৰ অনুসন্ধানক লৈ চৰকাৰক তীব্ৰ সমালোচনা কৰি অসম নাগৰিক সন্মিলনে এক বিবৃতি জাৰি কৰিছে। বিবৃতিত অসম নাগৰিক সন্মিলনে কয় যে চৰকাৰী অনুসন্ধানে প্ৰকৃত সত্য উদ্ঘাটন কৰিব নোৱাৰে বুলি তেওঁলোকে আগতেই সন্দেহ ব্যক্ত কৰিছিল। তেওঁলোকে দাবী কৰে যে এজন সৎ প্ৰাক্তন আৰক্ষী সঞ্চালক প্ৰধান, উচ্চ ন্যায়ালয়ৰ ন্যায়াধীশ, অপৰাধ বিশেষজ্ঞ আৰু উচ্চ ন্যায়ালয়ৰ অধিবক্তাক লৈ গঠিত স্বাধীন তদন্ত কমিটিৰ দ্বাৰা অনুসন্ধান চলোৱা হওক।
বিবৃতিত আৰু কোৱা হৈছে যে জুবিনৰ মৃত্যুৰ বাবে অৱহেলাৰ অভিযোগ উঠা লোকসকল শাসকীয় দল, চৰকাৰ আৰু মুখ্যমন্ত্ৰীৰ ঘনিষ্ঠ। উদাহৰণস্বৰূপে, নৰ্থ ইষ্ট ইণ্ডিয়া ফেষ্টিভেলৰ আয়োজক শ্যামকানু মহন্তৰ লগত চৰকাৰৰ, কেন্দ্ৰীয় মন্ত্ৰীৰ আনকি মুখ্যমন্ত্ৰী আৰু তেওঁৰ পৰিয়ালৰ ঘনিষ্ঠ সম্পৰ্ক থকাৰ কেতবোৰ গুৰুত্বপূৰ্ণ অভিযোগ এতিয়া পোহৰলৈ আহিছে। এই সম্পৰ্কে মুখ্যমন্ত্ৰীয়ে চাফাই দি যিবোৰ কথা কৈছে সেইবোৰ তেনেই থৰক বৰক! লগতে, অভিযুক্তসকলক দুৰ্গা পূজাৰ সময়ত ৰেহাই দিয়াৰ ঘটনাক ‘নোহোৱা নোপজা’ বুলি উল্লেখ কৰি তেওঁলোকে অভিযোগ কৰে যে মুখ্যমন্ত্ৰীয়ে এই কৰুণ ঘটনাক ৰাজনীতিকৰণ কৰি সমগ্ৰ অনুসন্ধান প্ৰক্ৰিয়াক প্ৰহসনত পৰিণত কৰিছে।
তেওঁলোকে আৰু কয় যে একে সময়তে জুবিনৰ ন্যায় বিচাৰি কোনেও ৰাজপথত আন্দোলন কৰিব নোৱাৰিব বুলি চৰকাৰে ঘোষণা কৰিছে। ইতিমধ্যে জুবিনৰ ন্যায় বিচাৰি আন্দোলন কৰা বহু যুৱকক মাৰপিট কৰি জেলত ভৰোৱা হৈছে। চৰকাৰে মনত ৰখা দৰকাৰ যে জুবিনক নিঃস্বাৰ্থভাৱে যিসকল লোকে ভাল পাইছিল তেওঁলোকে জুবিনৰ মৃত্যুৰ ঘটনাটো কেতিয়াও সহজভাৱে নলয় আৰু চৰকাৰে যিমানেই জোৰ জুলুম নকৰক কিয় তাৰ সুবিচাৰ নোপোৱালৈকে ক্ষান্ত নহয় বুলি মত পোষণ কৰিছে অসম নাগৰিক সন্মলিনে।
