আগৰতলাৰ পৰা প্ৰায় ১২ কিলোমিটাৰ নিলগৰ বুধজুঙনগৰত স্থাপন হ’বলগীয়া ইণ্ডিয়ান ইনষ্টিটিউট অৱ টেকন’লজী চমুকৈ আইআইটি স্থাপনৰ বাবে ত্ৰিপুৰা চৰকাৰে ৫০.৬৭ কোটি টকা অনুমোদন জনাইছে।
অগৰতলাত বৃহস্পতিবাৰে ৰাজ্য চৰকাৰৰ শিক্ষা মন্ত্ৰী ৰতন লাল নাথে এক সংবাদ মেল সম্বোধন কৰি এই কথা ঘোষণা কৰে।
সংবাদমেলখনত পূৰ্বৰ বাওঁপন্থী চৰকাৰখনক তুলাধূনা দি মন্ত্ৰী গৰাকীয়ে কয়— ‘ৰাজহুৱা ব্যক্তিগত সহযোগিতা চমুকৈ পিপিপিৰ অধীনত ২০১২ চনত এই আইআইটিখন স্থাপনৰ সিদ্ধান্ত গ্ৰহণ কৰা হৈছিল।কিন্তু সেই সময়ৰ বাওঁপন্থী চৰকাৰখনৰ বাবে সেয়া সম্ভৱপৰ নহ’ল।একমাত্ৰ বাওঁপন্থী চৰকাৰখনৰ সদিচ্চাৰ অভাৱৰ বাবে ছবছৰ ধৰি প্ৰকল্পটো বন্ধ হৈ থাকিল’।
উল্লেখযোগ্য যে আগৰতলাৰ পৰা প্ৰায় ১২ কিলোমিটাৰ নিলগৰ বুধজুঙনগৰত স্থাপন হ’বলগীয়া এই আইআইটিখনৰ বাবে ৫২.০৮ একৰ ভূমি ইতিমধ্যে অধিগ্ৰহণ কৰিছে ৰাজ্য চৰকাৰে।
ৰাজ্যখনৰ লগতে উত্তৰ পূৰ্বাঞ্চলৰ শিক্ষাৰ্থী সকলে এই শৈক্ষিক প্ৰতিষ্ঠানখনৰ পৰা উপকৃত হ’ব পাৰিব বুলি আশা প্ৰকাশ কৰিছে বিভিন্নজনে।উল্লেখযোগ্য যে এই আইআইটিখন স্থাপনৰ বাবে মুঠ ব্যয় হ’ব ১২৮ কোটি টকা।
ইয়াৰ ভিতৰত কেন্দ্ৰ চৰকাৰে ৭৩.৬০ কোটি টকা আগবঢ়োৱাৰ বিপৰীতে ৰাজ্য চৰকাৰে ৪৪.৮০ কোটি টকা আগবঢ়াব।
