২০০৯ৰ পৰা ২০১২ চনলৈকে ওৰাং ৰাষ্ট্ৰীয় উদ্যানত ৩৬ টা গঁড় বঢ়াটো সন্দেহজনক বুলি আজি ৪ এপ্ৰিলত গুৱাহাটীত এক সংবাদ মেলত বন মন্ত্ৰী প্ৰমিলা ৰাণী ব্ৰহ্মই মন্তব্য কৰাৰ পিছতে গঁড়ৰ মৃত্যু, সংস্থাপন-সংৰক্ষণৰ নামত বিভিন্ন আন্ত:ৰাষ্ট্ৰীয় সংস্থাৰ পৰা অহা বৃহৎ পৰিমাণৰ পুঁজিৰ লগতে গঁড়ৰ চোৰাং চিকাৰকে ধৰি সকলো দিশ সামৰি চি বি আই তদন্ত দাবী কৰিছে ‘স্বৰাজ অসম’ নামৰ সংস্থাটোৱে।
স্বৰাজ অসমৰ আহ্বায়ক ভবেন সন্দিকৈ আৰু তৰুণ ডেকাই এন ই নাওলৈ প্ৰেৰণ কৰা বিবৃতিত ‘কাজিৰঙা ৰাষ্ট্ৰীয় উদ্যানৰ গঁড়ৰ গণনা সন্দৰ্ভত বিভাগটোক ক্লিনশ্বিট দিলেও ওৰাঙৰ সৰ্ন্দভত কৰা মন্তব্যক আদৰণি জনাইছে।’
বিবৃতিটোত লগতে কোৱা হৈছে ‘স্বৰাজ অসমে আৰ টি আই তথ্যৰ আধাৰত পোন প্ৰথমবাৰৰ বাবে সংবাদমেল যোগে গঁড়ৰ গণনাৰ পদ্ধতি, ইয়াৰ স্বচ্ছতা, মন্ত্ৰীৰ ৰাজনৈতিক অংকৰ লগতে ৰাইন’ ভিজন ২০২০ৰ আন্তৰিকতাৰ সন্দৰ্ভত প্ৰশ্ন তুলিছিল।’
‘ওৰাং ৰাষ্ট্ৰীয় উদ্যান কৰ্তৃপক্ষৰ পৰা পোৱা এক আৰ টি আই তথ্যৰ আধাৰত একাংশ চৰকাৰী বিষয়াই কেনেকৈ নিজৰ গণনাৰ ব্লকত এন জি অ’ আদি গণনাকাৰীৰ তুলনাত অধিক গঁড়ৰ উপস্থিতি দেখাই তাকো উদঙাই দিছিল’ বুলিও উল্লেখ কৰে।
মন্ত্ৰীগৰাকীৰ বক্তব্যই তেওঁলোকৰ ‘অভিযোগকে সঁচা প্ৰতীয়মান কৰিলে’ বুলি সংস্থাটোৱে দাবী কৰে।
