বিভাগীয় মন্ত্ৰীৰ কথাতে স্পষ্ট হ’ল যে ৰাজ্যখনত ৩০৩৩ টা পানী যোগান আঁচনিৰ ভিতৰত ৪৪৬ টা পানী যোগান আঁচনিহে কাৰ্যক্ষম হৈ আছে।
জলসিঞ্চন আৰু পানী যোগান মন্ত্ৰী ৰঞ্জিত দত্তই অসম বিধানসভাৰ বাজেট অধিৱেশনৰ আগে আগে ৰাজ্যখনৰ ৩০৩৩ টা পানী যোগান আঁচনিৰ ভিতৰত ১৬৩২ টা পানী যোগান আঁচনি সম্পূৰ্ণ হোৱাৰ বিপৰীতে ১৪০১ টা পানী যোগান আঁচনি অসম্পূৰ্ণ অৱস্থাত থকা বুলি উল্লেখ কৰিছিল।
উল্লেখযোগ্য যে মন্ত্ৰী গৰাকীয়ে সম্পূৰ্ণ হোৱা বুলি উল্লেখ কৰা ১৬৩২ টা পানী যোগান আঁচনিৰ ভিতৰত ৪৪৬ টা পানী যোগান আঁচনি সম্পূৰ্ণ ভাৱে কাৰ্যক্ষম অৱস্থাত আছে, ৭৬৪ টা পানী যোগান আঁচনি আংশিকভাৱে কাৰ্যক্ষম অৱস্থাত আছে, ২১৫ টা পানী যোগান আঁচনি মেৰামতি কৰিব লগা অৱস্থাত আছে আৰু ২০৭ টা পানী যোগান আঁচনি একেবাৰে মেৰামতি কৰিব নোৱাৰা, বিধ্বস্ত অৱস্থাত আছে।
জলসিঞ্চন মন্ত্ৰী ৰঞ্জিত দত্তই অকাৰ্যকৰী আঁচনি সমূহ যিকেইটা মেৰামতি কৰিব পৰা সম্ভাৱনা আছে সেই সমূহ অতি শীঘ্ৰে মেৰামতি কৰাৰ ব্যৱস্থা গ্ৰহণ কৰা হৈছে বুলি উল্লেখ কৰে।
মন কৰিব লগীয়া যে ৰাজ্য চৰকাৰে এছ ডি আৰ এফক এক বছৰেকীয়া ধন ৰাশি এই আঁচনি সমূহ চোৱাচিতা আৰু মেৰামতিৰ নামত প্ৰদান কৰে। লগতে এই আঁচনি সমূহৰ ভিতৰত যি সমূহ আঁচনি সম্পূৰ্ণৰূপে কাৰ্যকৰী কৰিব পৰা অৱস্থাত থাকে সেই সমূহৰ বিৱৰণ জিলা ভিত্তিক এখন তালিকাত অন্তৰ্ভুক্ত কৰা হয়।
মন কৰিব লগীয়া যে মন্ত্ৰীগৰাকীয়ে এই পানী যোগান আঁচনি সমূহ উন্নীতকৰণ আৰু কাৰ্যক্ষম কৰিব পৰাৰ দিশত আছে বুলি আশ্বাস দিছে যদিও ৰাজ্যৰ জনসাধাৰণে বৰ্তমানো উপযুক্ত পানী সেৱনৰ পৰা বঞ্চিত হৈ থকাটোৱে পানী যোগান আঁচনি সমূহৰ প্ৰকৃত স্বৰূপ উদঙাই ধৰিছে। যি সময়ত ৰাজ্যখনত বৃদ্ধি পোৱা ভয়ানক বেমাৰৰ কাৰণ হিচাপে খোৱা পানীত অত্যধিক পৰিমাণে থকা আৰ্ছেনিক পুলি প্ৰমাণিত হৈছে সেই সময়তে পানী যোগান আঁচনি সমূহৰ অৱস্থা এনেদৰে শোচনীয় হোৱাতো অতি দুৰ্ভাগ্যজনক।
আনহাতে বিৰোধী পাৰ্টীৰ সদস্য দেৱব্ৰত শইকীয়াই এই পানী যোগান আঁচনি সমূহ অতী শীঘ্ৰে জনসাধাৰণৰ বাবে মুকলি কৰিব পৰাকৈ কাৰ্যক্ষম কৰি তুলিবলৈ আহ্বান জনাইছে।
