বুধবাৰে শিল্পী দিৱসৰ দিনা সমগ্ৰ ৰাজ্যই স্মৰণ কৰিলে ৰূপকোঁৱৰ জ্যোতিপ্ৰসাদ আগৰৱালাক।
শিল্পীগৰাকীৰ জন্মস্থান তেজপুৰত সদৌ অসম ছাত্ৰ সন্থাই যোৱা ১৫ জানুৱাৰিৰ পৰা ৩ দিনীয়া কাৰ্যসূচীৰে কেন্দ্ৰীয়ভাবে শিল্পী দিৱসৰ আয়োজন কৰে।
বিশ্বনাথৰ ঐতিহাসিক কমলাকান্ত ক্ষেত্ৰত আয়োজিত শিল্পী দিৱসৰ কালি অন্তিম দিনাৰ কাৰ্যসূচীত আছুৰ সাধাৰণ সম্পাদক লুৰীণজ্যোতি গগৈয়ে অসমৰ প্ৰতিখন বিশ্ববিদ্যালয়ত ৰূপকোঁৱৰৰ নামত আসন সংৰক্ষণ কৰাৰ লগতে শিল্পীগৰাকীৰ নামত অসম চৰকাৰক এটা গৱেষণাগাৰ স্থাপন কৰাৰ বাবে আহ্বান জনায়।
আছুৰ সভাপতি দীপাংক কুমাৰ নাথে পতাকা উত্তোলন কৰা কাৰ্যসূচীটোত আছুৰ মুখ্য উপদেষ্টা ডঃ সমুজ্জ্বল কুমাৰ ভট্টাচাৰ্যই জ্যোতিপ্ৰসাদৰ স্মৃতি বিজড়িত ঐতিহাসিক শোণিতপুৰ জিলাৰ বিশ্বনাথ চাৰিআলিত অনুষ্ঠিত এই শিল্পী দিৱস কাৰ্যসূচীয়ে অসমীয়া জাতি গঠন প্ৰক্ৰিয়াক এক নতুন মাত্ৰা প্ৰদান কৰিলে বুলি মন্তব্য কৰে।
১৯৩৫ চনতে বোলছবি নিৰ্মাণ কৰা জ্যোতিপ্ৰসাদ আগৰৱালাক দাদা চাহেব ফাল্কে বঁটা প্ৰদান নকৰা কাৰ্যত তীব্ৰ ক্ষোভ প্ৰকাশ কৰি ভট্টাচাৰ্যই তেওঁক এই বটাঁ প্ৰদানৰ দাবী জনায়। জ্যোতিপ্ৰসাদ আগৰৱালা, কলাগুৰু বিষ্ণু প্ৰসাদ ৰাভা আৰু নটসূৰ্য ফণী শৰ্মাৰ দৰে শিল্পীক আজিও ৰজাঘৰে প্ৰকৃত মৰ্যাদা প্ৰদান কৰা নাই বুলি তেওঁ আক্ষেপ কৰে।
বড়ো, কাৰ্বি, চাহ জনজাতি , উড়িয়া, নেপালী আদি সাংস্কৃতিক দলে বাৰেৰহনীয়া অনুষ্ঠান পৰিবেশন কৰা কালিৰ কাৰ্যসূচীত আছুৰ নেতৃবৃন্দই বৃহত্তৰ বিশ্বনাথ চাৰিআলিৰ কেইবাখনো গাঁৱৰ গায়ন-বায়নক লগতে ৰাজ্যৰ সাংস্কৃতিক ক্ষেত্ৰলৈ অনবদ্য বৰঙণি আগবঢ়োৱা জিলাখনৰ কেইবাগৰাকী শিল্পী তথা সাংস্কৃতিক কৰ্মীক সম্বৰ্দ্ধনা জ্ঞাপন কৰে ।
জ্যোতিপ্ৰসাদৰ কন্যা জয়শ্ৰী চলিহাই আদৰণী ভাষণত তেওঁৰ প্ৰয়াত পিতৃৰ কৰ্মৰাজিৰ এক আভাস দাঙি ধৰে। অনুষ্ঠানটোত অসমীয়া লোক সংগীতৰ গৱেষক ডঃ অণিমা চৌধুৰীয়ে বক্তৃতা আগবঢ়োৱাৰ লগতে বিশ্বনাথ জিলাৰ প্ৰাক্তন উপায়ুক্ত আশুতোষ চক্ৰৱৰ্তীয়ে কেন্দ্ৰীয় শিল্পী দিৱসৰ লগতে সংগতি ৰাখি প্ৰকাশ কৰা স্মৃতিগ্ৰন্থ ‘অতীত অন্বেষণ‘ আনুষ্ঠানিকভাৱে উন্মোচন কৰে ।
