ভাৰতৰ বিভিন্ন ক্ষেত্ৰত সাফল্যৰ শীৰ্ষত থকা লোকসকলে ধিং এক্সপ্ৰেছ আৰু স্বৰ্ণৰাণী হিচাপে অভিহিত হিমা দাসক অভিনন্দনসূচক বাণীৰে ওপোচাই দিয়াৰ সময়তেই অসমৰ যুৱ সমাজৰ হৃদ-স্পন্দন জুবিন গাৰ্গে হিমাক গোমাংস ভক্ষণ কৰি শক্তি অটুট ৰখাৰ বাবে পৰামৰ্শ আগবঢ়াইছে। অসমৰ অষ্টাদশী দৌৰৰাণী হিমা দাসক জুবিন গাৰ্গে পাৰ চৰাই আৰু মুৰ্গীৰ মাংসৰ সলনি গোমাংস ভক্ষণৰ পৰামৰ্শ দিয়াক কেন্দ্ৰ কৰি ইতিমধ্যে বিভিন্ন মহলত মিশ্ৰ প্ৰতিক্ৰিয়াৰ সৃষ্টি হৈছে।
সদায় বিতৰ্কিত মন্তব্য কৰি ভাল পোৱা জুবিন গাৰ্গে শনিবাৰে এখন সংবাদমেলত কয় যে গোমাংস খালেহে হিমাৰ দৌৰাৰ শক্তি বৃদ্ধি পাব। গোমাংসই অধিক শক্তিৰ যোগান ধৰে। ক্ৰীড়াবিদসকলে ধৰ্ম, জাতি আদিৰ উৰ্ধলৈ গৈ কেবল খেলতহে মনঃসংযোগ কৰিব লাগে বুলি জুবিনে কয়।
সংবাদ-মাধ্যমৰ আগত জুবিনে সদৰী কৰিছে, ‘‘দিল্লীত যেতিয়াই মই তাইক (হিমা দাসক) লগ পইছিলোঁ তেতিয়া তাইক কৈছিলোঁ তই ঘৰলৈ সোণৰ পদক লৈ আহিবই লাগিব। পৰৱৰ্তী মাহত আৰম্ভ হ’বলগীয়া এছিয়ান গেমছৰ বাবে তাই বতাহৰ দৰে দৌৰিব লাগিব আৰু নিজৰ সৰ্বোৎকৃষ্টখিনি উজাৰি দিব লাগিব মই কৈছিলোঁ।’’
গায়কগৰাকীয়ে আৰু কয় যে পৰৱৰ্তী বছৰ সমূহত নিজৰ শক্তি অটুট ৰাখিবলৈ হিমাই সকলো সম্প্ৰদায়-সাপেক্ষ নিষিদ্ধতাৰ (taboo) পৰা আঁতৰি গৈ গোমাংস ভক্ষণ কৰিব লাগিব। কাৰণ খেলুৱৈৰ বাবে সকলোৰে আগত হৈছে দেশ। তাৰ পাছতহে বাকীবোৰ।
চৰকাৰে হিমাক নিয়োজিত কৰাৰ বিষয়টোত জুবিনে কয় যে চাকৰি কৰিবলৈ ১৯ বছৰীয়া হিমা এতিয়াও সৰু হৈ আছে আৰু ২৫ বছৰ বয়সলৈকে তেওঁ এগৰাকী এথলীট হিচাপে সক্ৰিয় হৈ থাকিব পাৰিব।চাকৰি কৰাৰ কথাটো এতিয়া উঠিব নালাগে বুলিও তেওঁ কয়। জুবিনে হিমাক ৰাষ্ট্ৰৰ বাবে দৌৰি যোৱাৰ বাবে আহ্বান জনায়।
জুবিনে আৰু কয় যে ট্ৰেকৰ আন্তৰ্জাতিক ইভেণ্ট এটাত সোণৰ পদক লাভ কৰা একমাত্ৰ এথলীট হিচাপে বিৰল কৃতিত্বৰ অধিকাৰী হৈ ভাৰতক বিশ্বৰ মানচিত্ৰত স্থান দিয়া হিমাই এতিয়া কেৱল খেলত মনোযোগ দিব লাগে। ২৫ বছৰ বয়সত অৱসৰ গ্ৰহণৰ পাছত তেওঁ চাকৰিত যোগ দিবলৈ অফুৰন্ত সময় পাব।
অসমৰ সূত্ৰ ধৰি জুবিনে কয় যে ভোগেশ্বৰ বৰুৱা আছিল প্ৰথম এথলীট যিয়ে আন্তৰ্জাতিক ইভেণ্টত সোণৰ পদক লাভ কৰিবলৈ সক্ষম হৈছিল।
ভোগেশ্বৰ বৰুৱাৰ পাছতে দেশলৈ গৌৰৱ কঢ়িয়াই অনা দ্বিতীয়গৰাকী ক্ৰীড়াবিদৰ জন্ম দিব পৰাটো অসমৰ বাবে অতি গৌৰৱৰ বিষয়।
