এক নিৰ্ভৰযোগ্য সূত্ৰৰ পৰা পোৱা তথ্যৰ ভিত্তিতে ত্ৰিপুৰাৰ জিৰনীয়া মহকুমা আৰক্ষীৰ এটা দলে জয়ানগৰ অঞ্চলৰ এখন দলঙত বৃহস্পতিবাৰে এক অভিযান চলাই বৃহৎ পৰিমাণৰ গাঞ্জা জব্দ কৰিবলৈ সক্ষম হয়।
বিগত কিছু দিনৰ পৰা ত্ৰিপুৰা আৰক্ষীয়ে নিচাজাতীয় সামগ্ৰীৰ বিৰুদ্ধে কঠোৰ হোৱা পৰিলক্ষিত হোৱা হেতুকে এইবাৰ গাঞ্জা সৰবৰাহকাৰীয়ে চতুৰালি প্ৰদৰ্শন কৰি জয়ানগৰৰ পকী দলঙৰ তলত এটা খোৰোং বনাই লুকুৱাই ৰাখিছিল বৃহৎ পৰিমাণৰ গাঞ্জা।
এই তথ্য পোৱাৰ পাছতে আৰক্ষীয়ে অভিযান চলাই দলঙৰ সেই খোৰোঙৰ পৰা জব্দ কৰে ১৮০ টা গাঞ্জাভৰ্তী পেকেট। জানিব পৰা মতে একোটা পেকেটৰ ওজন প্ৰায় ৫ কিলোগ্ৰাম হ’ব।
উল্লেখ্য যে আৰক্ষীয়ে এতিয়ালৈ জব্দকৃত গাঞ্জাখিনিৰ ওজন কিমান হ’ব সেয়া সদৰী কৰা নাই যদিও গাঞ্জাখিনিৰ বজাৰ মূল্য প্ৰায় ৬০ লাখ টকা হ’ব বুলি ধাৰণা কৰিছে।
বৃহস্পতিবাৰৰ দিনটোত ত্ৰিপুৰাৰ আৰক্ষীয়ে সফলতাৰে তিনিটা অঞ্চলত অভিযান চলাই বৃহৎ পৰিমাণৰ গাঞ্জা জব্দ কৰাৰ লগতে দুজন লোককো গ্ৰেপ্তাৰ কৰে।
দিনটোৰ আৰম্ভণিতে আৰক্ষীয়ে আগৰতলা ষ্টেশ্যনত অভিযান চলাই গাঞ্জা সহিতে বিহাৰৰ দুজন যুৱকক গ্ৰেপ্তাৰ কৰিবলৈ সক্ষম হয়। তাৰোপৰি চোনামুৰা মহকুমা আৰক্ষীয়েও এটা পৰিয়ালৰ ঘৰত অভিযান চলাই জব্দ কৰিবলৈ সক্ষম হৈছিল বৃহৎ পৰিমাণৰ গাঞ্জা।
আৰক্ষীৰ নিৰ্ভৰযোগ্য সূত্ৰই জানিবলৈ দিয়া অনুসৰি ত্ৰিপুৰাৰ পৰাই চুবুৰীয়া ৰাষ্ট্ৰ বাংলাদেশ আৰু ভাৰতৰ উত্তৰ-পূবৰ অন্য ৰাজ্য সমূহলৈ গাঞ্জা সৰবৰাহ হয়।
উল্লেখ্য যে ত্ৰিপুৰা চৰকাৰে ৰাজ্যখনক নিচাজাতীয় সামগ্ৰীৰ কৱলৰ পৰা মুক্ত কৰিব লাগে বুলি ঘোষণা কৰাৰ পাছতে ৰাজ্যৰ আৰক্ষীয়ে ইয়াৰ বিৰুদ্ধে ধাৰাবাহিকভাৱে অভিযান চলাই থকাৰ পৰিপ্ৰেক্ষিততে বিগত কিছু দিনত ৰাজ্যখনত প্ৰায় ৮০ জনৰো অধিক লোক নিচাজাতীয় সামগ্ৰীৰ সৰবৰাহজনিত কাৰণত গ্ৰেপ্তাৰ হৈছে।