আজি গোৱালপাৰা জিলাৰ আগিয়াৰ সমীপৱৰ্তী অঞ্চল বাঘেশ্বৰীত এটা শোকাৱহ পথ দুৰ্ঘটনা সংঘটিত হয়। প্ৰাপ্ত খবৰ অনুসৰি পশ্চিম গোৱালপাৰা সমষ্টিৰ বিধায়ক আব্দুৰ ৰছিদ মণ্ডলৰ তীব্ৰ বেগী বাহনে এজন লোকক খুন্দিওৱাৰ ফলত লোকজনে থিতাতে প্ৰাণ হেৰুৱাই।
দুৰ্ঘটনাটোত প্ৰাণ হেৰুওৱা লোকজন গোৱালপাৰাৰে ছাবেৰ আলী বুলি চিনাক্ত কৰা হৈছে।
আনহাতে দুৰ্ঘটনাটোত বিধায়ক ৰছিদ মণ্ডলো গুৰুতৰভাবে আহত হোৱাৰ লগতে গাড়ীখনত থকা অন্য দুজন লোকো সামান্য পৰিমানে আঘাত প্ৰাপ্ত হয়।
জানিব পৰা অনুসৰি গুৱাহাটীৰ পৰা গোৱালপাৰা অভিমুখী বিধায়কৰ বাহনখন বাঘেশ্বৰী অঞ্চল পাওতেই ছাবেৰ আলীয়ে ৰাস্তা পাৰ হ’ব খোজে আৰু তেতিয়াই এই ভয়াবহ দুৰ্ঘটনাতো সংঘটিত হয়।
আব্দুৰ ৰছিদ মণ্ডলৰ সুৰক্ষা বিষয়াই সংবাদ মাধ্যমক জানিবলৈ দি কয় যে ৰাতিপুৱা গুৱাহাটীৰ পৰা গোৱালপাৰালৈ আহি থাকোতেই এই দুৰ্ঘটনাটো সংঘটিত হৈছে। আগিয়া পোৱাৰ আগে আগে এই শোকাৱহ ঘটনাটো সংঘটিত হোৱা বুলি তেওঁ উল্লেখ কৰে।
তেওঁ পুনৰ কয় যে ৬০-৭০ কিলোমিটাৰ বেগেৰে গৈ থকা গাড়ীখনৰ আগেৰে হঠাতে মানুহ এজন পাৰ হৈ যোৱা দেখি গাড়ী চালকে গাড়ীখন নিয়ন্ত্ৰণ কৰাত ব্যৰ্থ হয় আৰু মানুহজনক খুন্দিয়াই।
দুৰ্ঘটনা সংঘটিত হোৱাৰ পিছতে আঘাত প্ৰাপ্ত বিধায়ক আব্দুৰ ৰছিদ মণ্ডলক উন্নত চিকিৎসাৰ বাবে গুৱাহাটী চিকিৎসা মহাবিদ্যালয় হস্পিতালত ভৰ্তি কৰোৱা হয় বুলি জানিব পৰা গৈছে।