১৯৬৬ চনত মিজোৰামত ভাৰতীয় বায়ু সেনাই চলোৱা বোমাবৰ্ষণে ৫২ টা বছৰ অতিক্ৰম কৰাৰ উপলক্ষে উক্ত ঘটনাৰ সোঁৱৰণিত কালি মিজোৰাম ছাত্ৰ সংস্থাৰ উদ্যোগত ৰাজ্যখনৰ বিভিন্ন স্থানত ‘জোৰাম নি’ বা জোৰাম দিৱস উদযাপন কৰা হয়।
উল্লেখযোগ্য যে মিজো নেশ্যনেল ফ্ৰণ্টৰ নেতৃত্বত সূচনা হোৱা বিদ্ৰোহক দমন কৰাৰ উদ্দেশ্যে ১৯৬৬ চনৰ ৫ মাৰ্চত আইজলত ভাৰতীয় বায়ু সেনা বাহিনীৰ দ্বাৰা বিমান আক্ৰমণ চলোৱা হৈছিল।
উক্ত ঘটনাৰ পুৰ্বে ভাৰতৰ কোনো স্থানতে উগ্ৰপন্থীৰ সৈতে যুঁজিবৰ বাবে বায়ু সেনা বাহিনীক ব্যৱহাৰ কৰা হোৱা নাছিল।
মন কৰিব লগীয়া যে, লালডেংগা নেতৃত্বাধীন মিজো নেশ্যনেল ফ্ৰণ্টে একপক্ষীয়ভাৱে ‘মিজোৰামৰ স্বাধীনতা’ ঘোষণা কৰাৰ কিছুদিন পিছতেই আইজলৰ লগতে মিজোৰামৰ বহু গাৱঁত এই বিমান আক্ৰমণ চলোৱা হৈছিল।
উক্ত বিমান আক্ৰমণৰ সাক্ষী হৈ বাচি থকাসকলৰ মনত তাৰ দুঃস্মৃতিয়ে এতিয়াও দোলা দি থাকে। সেইসকলৰ মাজৰ বহুকেইজন লোকে কালি আইজলৰ লাল থানহাওলা প্ৰেক্ষাগৃহত অনুষ্ঠিত ‘জোৰাম নি’ অনুষ্ঠানত ভাষণ দি উক্ত ঘটনাৰ সৈতে থকা নিজৰ অভিজ্ঞতাক সুঁৱৰে।
অনুষ্ঠানটোত বক্তাসকলে, ৰাজ্যখনৰ নৱপ্ৰজন্মৰ মাজত দেশপ্ৰেমৰ ভাব সঞ্চাৰিত কৰাৰ বাবে উক্ত দিৱসটোক উদযাপন কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।
বৰ্তমান দেশৰ ভিতৰতে এখন শান্তিময় ৰাজ্য হিচাপে স্বীকৃত মিজোৰামত, ১৯৬৬ চনত মিজোসকলৰ বাবে স্বাধীন ৰাজ্যৰ লক্ষৰে ভাৰত ৰাষ্ট্ৰৰ বিৰুদ্ধে বিদ্ৰোহ ঘোষণা কৰি মিজো নেশ্যনেল ফ্ৰণ্টে তেতিয়াৰ অসমৰ অন্তৰ্গত মিজো জিলাৰ বিভিন্ন ঠাইত নিৰাপত্তা বাহিনীৰ ওপৰত ধাৰাবাহিক আক্ৰমণ চলাইছিল।
ইয়াৰ প্ৰত্যুত্তৰত ভাৰত চৰকাৰে বিমান আক্ৰমণৰ লগতে স্থলভাগতো অভিযান চলাই উক্ত বিদ্ৰোহটোক দমন কৰাৰ লগতে ১৯৬৬ চনৰ ২৫ মাৰ্চৰ ভিতৰত মিজো নেশ্যনেল ফ্ৰণ্টৰ দখলত থকা সকলো স্থান নিজৰ অধীনলৈ আনে।
অৱশেষত সংগঠনটোৱে ১৯৮৬ চনত ভাৰত চৰকাৰৰ সৈতে মিজো চুক্তি স্বাক্ষৰিত কৰি হিংসাৰ পথ ত্যাগ কৰাৰ লগতে বিছিন্নতাৰ দাবী প্ৰত্যাহাৰ কৰে।
