মঙলবাৰে ওমানৰ সামুদ্ৰিক নিৰাপত্তা কেন্দ্ৰই প্ৰকাশ কৰা অনুসৰি ১৩ জন ভাৰতীয়কে ধৰি ১৬ জন ক্ৰু মেম্বাৰ কঢ়িয়াই অনা এখন তেল টেংকাৰ ওমানৰ উপকূলত উলটি গৈছে। ক্ৰু সদস্যসকল নিৰুদ্দিষ্ট হোৱাৰ লগতে তেওঁলোকক বিচাৰি উলিয়াবলৈ অনুসন্ধান আৰু উদ্ধাৰ অভিযান অব্যাহত আছে।
বৃহস্পতিবাৰে সংস্থাটোৱে টুইট কৰি কয় যে কোমোৰোছৰ পতাকা থকা তেল টেংকাৰ ‘প্ৰেষ্টিজ ফেলকন’ৰ ক্ৰুত ১৩ জন ভাৰতীয় আৰু তিনিজন শ্ৰীলংকাৰ লোক আছিল। সোমবাৰে ওমানীৰ ডুকম বন্দৰৰ সমীপৰ ৰাছ মাদ্ৰাকাৰ দক্ষিণ-পূব দিশত ২৫ নটিকেল মাইল দূৰত জাহাজখন উলটি পৰে।
এল এছ ই জিৰ জাহাজৰ তথ্য অনুসৰি টেংকাৰখন য়েমেনৰ এডেন বন্দৰলৈ গৈ আছিল।
ওমানৰ সামুদ্ৰিক নিৰাপত্তা কেন্দ্ৰই সংবাদ সংস্থা ৰয়টাৰক জনোৱা মতে, তেল টেংকাৰখন ওলোটা হৈ আছে। ইয়াৰ দ্বাৰা অৱশ্যে জাহাজখন স্থিৰ হৈছে নে নাই বা তেল বা তেলৰ সামগ্ৰী সাগৰত লিক হৈছে নে নাই সেয়া নিশ্চিত কৰা হোৱা নাই।
এল এছ ই জিৰ জাহাজৰ তথ্যত প্ৰকাশ পাইছে যে এই জাহাজখন ২০০৭ চনত নিৰ্মিত ১১৭ মিটাৰ দীঘল তেল সামগ্ৰীৰ টেংকাৰ। এনে সৰু টেংকাৰ সাধাৰণতে চুটি যাত্ৰাৰ বাবে ব্যৱহাৰ কৰা হয়।
ডুকম বন্দৰ ওমানৰ দক্ষিণ-পশ্চিম উপকূলত অৱস্থিত, যিটো দেশৰ প্ৰধান তেল আৰু গেছ খনন প্ৰকল্পৰ এটা প্ৰধান কেন্দ্ৰ। এটা ডাঙৰ তেল শোধনাগাৰে ডুকমৰ বিশাল ঔদ্যোগিক অঞ্চলৰ অংশ গঠন কৰে, যিটো দেশখনৰ আটাইতকৈ ডাঙৰ একক অৰ্থনৈতিক প্ৰকল্প।
