ভাৰতৰ পৰা ৰপ্তানি হোৱা সামগ্ৰীৰ তালিকাত এতিয়া একেবাৰে প্ৰথম শাৰীত আছে স্মাৰ্টফোন। বৰ্তমান সমগ্ৰ বিশ্বৰ বজাৰত ভাৰতত নিৰ্মিত স্মাৰ্টফোন দেখিবলৈ পোৱা গৈছে। বিশ্বৰ বিভিন্ন প্ৰান্তলৈ ভাৰতৰ পৰা স্মাৰ্টফোনৰ ৰপ্তানি যথেষ্ট বৃদ্ধি পাইছে। যোৱা কেইবছৰমানত এই বৃদ্ধি কেইবাগুণো হৈছে। ইয়াৰ পৰাই প্ৰমাণ হয় যে সমগ্ৰ বিশ্বত ভাৰতত নিৰ্মিত স্মাৰ্টফোনৰ চাহিদা কিমান বেছি।
বিশ্ববাসীয়ে এতিয়া ভাৰতত নিৰ্মিত স্মাৰ্টফোনৰ ওপৰত ভৰসা কৰিছে। যোৱা বিত্তীয় বৰ্ষত, এপ্ৰিলৰ পৰা নৱেম্বৰ মাহলৈকে ভাৰতত নিৰ্মিত স্মাৰ্টফোন ৰপ্তানি কৰি প্ৰায় ১৮৮০ কোটি ডলাৰ উপাৰ্জন হৈছিল। তাৰ আগৰ বিত্তীয় বৰ্ষত একে সময়তে এই উপাৰ্জনৰ পৰিমাণ আছিল ৯৭০ কোটি ডলাৰ। কিন্তু যদি সমগ্ৰ ২০২৪-২৫ বিত্তীয় বৰ্ষৰ হিচাপ কৰা হয়, তেন্তে এই বৰ্ষত ভাৰতত নিৰ্মিত স্মাৰ্টফোন বিদেশলৈ ৰপ্তানি কৰি ২.৬ লাখ কোটি টকা উপাৰ্জন হৈছে। আনহাতে ২০১৪-১৫ বিত্তীয় বৰ্ষত এই পৰিমাণ আছিল মাত্ৰ ১৬০ কোটি টকাৰ ওচৰা-উচৰি।
বিশ্বৰ বজাৰত ভাৰতীয় স্মাৰ্টফোনৰ চাহিদা যিদৰে বাঢ়িছে, তালৈ চাই আগন্তুক দিনত চাহিদাতকৈ অধিক স্মাৰ্টফোন তৈয়াৰ কৰি ৰাখিব লাগিব বুলি বিশেষজ্ঞসকলে অনুভৱ কৰিছে। আচলতে ভাৰতত নিৰ্মিত স্মাৰ্টফোনৰ ৰপ্তানি বৃদ্ধিৰ মূল কাৰণ হৈছে আমেৰিকাৰ বজাৰ। কিয়নো, যোৱা এবছৰৰ ভিতৰত আমেৰিকালৈ ভাৰতত নিৰ্মিত স্মাৰ্টফোনৰ ৰপ্তানি ২০০ শতাংশতকৈও অধিক বৃদ্ধি পাইছে। ৰিপোৰ্ট অনুসৰি, ভাৰতৰ পৰা ৰপ্তানি হোৱা স্মাৰ্টফোনৰ দুই তৃতীয়াংশতকৈও অধিক কেৱল আমেৰিকালৈকে যায়। বিশেষকৈ ভাৰতত নিৰ্মিত আইফোনে আমেৰিকাৰ লগতে অন্যান্য দেশৰ বজাৰতো বিশেষ স্থান লাভ কৰিছে।
ৰিপোৰ্ট অনুসৰি, আমেৰিকাৰ লগতে চীনতো ভাৰতত নিৰ্মিত স্মাৰ্টফোনৰ জনপ্ৰিয়তা বাঢ়িছে। প্ৰতি বছৰে ভাৰতৰ পৰা বৃহৎ পৰিমাণৰ স্মাৰ্টফোন চীনলৈ যায়। ইয়াৰ উপৰিও পৰ্তুগাল, স্পেইন, সংযুক্ত আৰব আমিৰশ্বাহী, ভিয়েটনাম, দক্ষিণ কোৰিয়া, লাটভিয়া, ইজৰাইল আৰু চুবুৰীয়া দেশ বাংলাদেশতো ভাৰতীয় স্মাৰ্টফোনৰ ব্যাপক চাহিদা আছে। বিশেষজ্ঞসকলৰ দাবী যে যদি ভাৰতীয় স্মাৰ্টফোনৰ চাহিদা এনেদৰে বাঢ়ি থাকে, তেন্তে আগন্তুক দিনত ভাৰতে স্মাৰ্টফোন ৰপ্তানিত শীৰ্ষত থকা দেশসমূহক, বিশেষকৈ চীনকো পিছ পেলাই দিব পাৰে।
