মধ্যপ্ৰদেশৰ ইন্দোৰৰ শিৱাজী নগৰত সংঘটিত এক হৃদয়বিদাৰক ঘটনাই সমগ্ৰ অঞ্চলটো কঁপাই তুলিছে। ঘৰতে জীৱনৰ চৰম সিদ্ধান্ত বাছি লৈছে ২২ বছৰীয়া অভিষেক প্ৰজাপতে। অভিষেকৰ পৰিয়ালটোৱে আৰম্ভণিৰে পৰা এই মৃত্যুক লৈ সন্দেহ প্ৰকাশ কৰি পুংখানুপুংখ তদন্তৰ দাবী জনাইছিল। ইফালে, ঘটনাৰ দুদিন পিছতে এটা ভাইৰেল ভিডিঅ’ পোহৰলৈ অহাত গোচৰটোৱে এক নতুন মোৰ লৈছে।
ভাইৰেল ভিডিঅ’টোত অভিষেকৰ প্ৰেয়সীয়ে চৰম পন্থা লোৱাৰ চেষ্টা কৰা দেখা গৈছে। তদুপৰি, তেওঁ ডিঙি আৰু পেটত ছুৰী ৰাখি অভিষেকক ভাবুকি দিছে, “তুমি মোক এৰি গ’লে মই নিজৰ প্ৰাণ ত্যাগ কৰিম।”
ভিডিঅ’টোত অভিষেকে অহৰহ প্ৰেয়সীক শান্ত কৰিবলৈ আৰু এনে পদক্ষেপ নল’বলৈ বুজাবলৈ চেষ্টা কৰি থকা দেখা গৈছে।
অভিষেকৰ পৰিয়ালৰ লোকে দাবী কৰিছে যে ছোৱালীজনীৰ এই আচৰণ দীৰ্ঘদিন ধৰি চলি আছিল, আৰু এই মানসিক চাপে তেওঁলোকৰ পুত্ৰক ভাঙি পেলাইছিল।
অভিষেকৰ পিতৃ ৰামহিত প্ৰজাপতে ছোৱালীজনী আৰু তেওঁৰ পৰিয়ালে পুত্ৰক চৰম পন্থাৰ দিশলৈ ঠেলি দিয়াৰ গুৰুতৰ অভিযোগ উত্থাপন কৰিছে।
তেওঁ অভিযোগ কৰে যে অভিষেক খুচী নামৰ এগৰাকী ছোৱালীৰ সৈতে দীৰ্ঘদিনীয়া সম্পৰ্কত আছিল, কিন্তু খুচীৰ পৰিয়াল সেই সম্পৰ্কক লৈ অসন্তুষ্ট আছিল। অভিযোগ অনুসৰি, তেওঁলোকে বাৰে বাৰে মাৰপিট কৰি অভিষেকক সম্পৰ্ক ছেদ কৰিবলৈ বাধ্য কৰিছিল।
খুচীয়ে প্ৰায়ে অভিষেকক ভিডিঅ’ কল কৰি ছুৰী ব্যৱহাৰ কৰি বা আত্মহত্যাৰ ভাবুকি দি মানসিক চাপত ৰাখিছিল।
কিছুদিন পূৰ্বে খুচীৰ পৰিয়ালে এখন ভুৱা এজাহাৰ দাখিল কৰিছিল, যাৰ ফলত অভিষেকক ভগীৰথপুৰা আৰক্ষী থানাত আটক কৰি ৰখা হৈছিল।
পিতৃৰ বহু চেষ্টাৰ অন্তত যদিও তেওঁক মুকলি কৰি দিয়া হৈছিল, আৰক্ষীয়ে অভিষেকক খুচীৰ পৰা আঁতৰি থাকিবলৈ পৰামৰ্শ দিছিল।
অহৰহ ভাবুকি, প্ৰহাৰ, আৰু ব্লেকমেইলিং আদিৰ ফলত অভিষেক মানসিকভাৱে দুৰ্বল হৈ পৰিছিল।
১৪ নৱেম্বৰৰ সন্ধিয়া অভিষেকৰ সৰু ভনীয়েকে তেওঁক চৰম পন্থা লোৱা অৱস্থাত দেখা পায় আৰু আতংকিত হৈ দেউতাকক মাতি আনে। অভিষেক আছিল পৰিয়ালটোৰ উপাৰ্জনৰ পথ। তেওঁৰ পৰিয়ালত পিতৃ, মাতৃ, দুগৰাকী ভগ্নী আৰু এজন ভাতৃ আছে।
ঘটনাৰ পিছতে আৰক্ষীয়ে অভিষেকৰ মোবাইল ফোনটো জব্দ কৰিছে। পৰিয়ালৰ দাবী অনুসৰি, চৰম পন্থা লোৱাৰ কেইমিনিটমান পূৰ্বলৈকে তেওঁ আনন্দৰে কথা পাতি আছিল। এই কাৰণেই তেওঁৰ মোবাইল ফোন, মেছেজ, কল ৰেকৰ্ড, আৰু ভিডিঅ’সমূহ এতিয়া তদন্তৰ গুৰুত্বপূৰ্ণ অংশ হৈ পৰিছে।
অতিৰিক্ত ডিচিপি ৰাজেশ দণ্ডোটিয়াই জনোৱা মতে, ভাইৰেল ভিডিঅ’টোৰ ফৰেনছিক পৰীক্ষা কৰা হ’ব, আৰু সকলো দিশৰ পুংখানুপুংখ তদন্ত চলি আছে। আৰক্ষীয়ে ফৰেনছিক প্ৰতিবেদন পোৱাৰ পিছত পৰৱৰ্তী ব্যৱস্থা গ্ৰহণৰ সিদ্ধান্ত লোৱা হ’ব বুলি জানিবলৈ দিয়ে।
