বড়ো জনগোষ্ঠীৰ পৰম্পৰাগত সংগীতৰ লহৰত আই নৈৰ দাঁতিত প্ৰকৃতিৰ মনোমোহা তথা নৈসৰ্গিক দৃষ্টিনন্দন পৰিৱেশৰ মাজেৰে হাজাৰ হাজাৰ লোকৰ উপস্থিতিত ২৭ ডিচেম্বৰৰ পৰা আৰম্ভ হ’ল তৃতীয়সংখ্যক দৈজিং উৎসৱ।
উল্লেখযোগ্য যে অসম চৰকাৰৰ পৰ্যটন বিভাগৰ উদ্যোগত আৰু বি টি এ ডিৰ পৰ্যটন বিভাগৰ সহযোগত চিৰাং জিলাৰ আই নৈৰ দাঁতিত ২৬ ডিচেম্বৰ অৰ্থাৎ বৃহস্পতিবাৰে পুৱা মাৰাথন দৌৰেৰে শুভাৰম্ভণি কৰা হয় দৈজিং উৎসৱৰ। উক্ত মাৰাথন দৌৰৰ শুভাৰম্ভ কৰে অৰ্জুন বঁটাপ্ৰাপক বিশ্ব বক্সিং চেম্পিয়ন এল সৰিতাই।
মাৰাথন দৌৰৰ পাছতেই জনস্বাস্থ্য কাৰিকৰী বিভাগৰ মন্ত্ৰী ৰিহণ দৈমাৰীয়ে আনুষ্ঠানিকভাৱে মুকলি কৰে দৈজিং উৎসৱৰ। চিৰাঙৰ উপায়ুক্ত তথা দৈজিং উৎসৱৰ আয়োজক সমিতিৰ অধ্যক্ষ গৌতম তালুকদাৰে উত্তোলন কৰে দৈজিং উৎসৱৰ পতাকা।
তাৰ পিছত পৰ্যায়ক্ৰমে চন্দন ব্ৰহ্মই থলুৱা খাদ্য বিপণী, বি টি এ ডিৰ উপ-মুখ্য কাৰ্যবাহী সদস্য খাম্ফা বৰগয়াৰীয়ে বড়ো জনগোষ্ঠীয় পৰম্পৰাগত বাসগৃহ মুকলি কৰাৰ উপৰি মঞ্চ উন্মোচন কৰে সেনা বাহিনীৰ মেজৰ জেনেৰেল সঞ্জীৱ কাট্ৰীয়ে, ৰাইফল চুটিং ৰেঞ্জৰ মুকলি কৰে এছিয়া কমনৱেলথ পদকপ্ৰাপক জয়দেৱ দাস, জীপ আৰু হাতী চাফাৰি উদ্বোধন কৰে বি টি এ ডিৰ উপ-মুখ্য কাৰ্যবাহী সদস্য খাম্ফা বৰগয়াৰীয়ে।
১২ দিন ধৰি চলিব লগা এই মহোৎসৱখনত প্ৰথম দিনাই দেশী-বিদেশী পৰ্য্যটকৰ উপৰি স্থানীয় লোকেৰে উৎসৱস্থল ভৰি পৰে। উৎসৱথলীত প্ৰতি বছৰৰ দৰে এইবাৰো পৰম্পৰাগত খাদ্য, সংস্কৃতি আৰু ৰোমাঞ্চকৰ পৰম্পৰাগত খেল-ধেমালিৰ আয়োজন কৰা হৈছে।
ইফালে অসমৰ তথা বিভিন্ন স্থানৰ পৰা আমন্ত্ৰিত আৰু বলিউডৰ নামী-দামী জনপ্ৰিয় শিল্পী তাৰকাৰ সাংস্কৃতিক অনুষ্ঠানৰ লগতে বিভিন্ন কলা প্ৰদৰ্শনীৰ আয়োজন কৰা হৈছে। ইতিমধ্যে উৎসৱত অংশ লোৱাৰ উদ্দেশ্যে বৃহস্পতিবাৰেই অসমত আহি উপস্থিত হৈছে হিন্দী চিনেমাৰ জনপ্ৰিয় কণ্ঠশিল্পী কৈলাশ খেৰ।
২৬ ডিচেম্বৰৰ শুভাৰম্ভ অনুষ্ঠানত বহুতো বিশিষ্ট ব্যক্তিৰ লগতে অসম পৰ্যটন উন্নয়ন নিগমৰ অধ্যক্ষ জয়ন্ত মল্ল বৰুৱাৰ লগতে বহু ৰাজনৈতিক নেতা, শিল্পী তথা স্থানীয় লোকসকল উপস্থিত থাকে।
