দেশজুৰি কৰ’নাভাইৰাছ বিয়পাৰ অন্যতম কেন্দ্ৰৰূপে চিনাক্ত হোৱা নিজামুদ্দিন মাৰ্কাজৰ তবলিগি জামাতলৈ যোৱা লখিমপুৰৰ ছজন ব্যক্তিক চিনাক্ত কৰা হৈছে।
এই ব্যক্তিকেইজন লকডাউনৰ পূৰ্বেই উক্ত স্থানৰ পৰা উভতি আহিছিল।
ব্যক্তিকেইজন হৈছে—উত্তৰ লখিমপুৰ চহৰৰ বজাৰপট্টিৰ আব্দুল কাদিৰ, চক বজাৰৰ জাহিদ আলি মৌলানা, কে বি ৰ’ডৰ আব্দুল নুৰ গাজি, চাবতি পদুমণিৰ হাছেম আলি আৰু তজমুল ইছলাম আৰু বঙালমৰাৰ আব্দুল জলিল।
লখিমপুৰ জিলা প্ৰশাসনে স্বাস্থ্য বিভাগৰ বিষয়ববীয়াৰ সৈতে মঙলবাৰে ব্যক্তিকেইজনক চিনাক্ত কৰি ষ্টাম্প লগাই দিয়ে।
পৰৱৰ্তী ১৪ দিনলৈকে তেওঁলোকক কুৱাৰাণ্টাইনড কৰা হৈছে।
দেশজুৰি কৰ’নাভাইৰাছত ১০ গৰাকী লোকৰ মৃত্যু আৰু ৪০০তকৈয়ো অধিক লোক আক্ৰান্ত হোৱাৰ লগত নিজামুদ্দিনৰ সমাৱেশৰ সম্পৰ্ক থকা বুলি বাতৰি প্ৰকাশ পাইছে।
উক্ত ধৰ্মীয় সমাৱেশত অসমৰো প্ৰায় তিনিশ লোকে ভাগ লোৱাৰ বাতৰিয়ে ৰাজ্যখনত ইতিমধ্যে চাঞ্চল্যৰ সৃষ্টি কৰিছে।
এইসকল লোক অসমলৈ উভটি আহিছে নেকি তাৰ সন্ধান কৰিবলৈ ইতিমধ্যে জিলা প্ৰশাসনক নিৰ্দেশ দিয়া হৈছে বুলি স্বাস্থ্য মন্ত্ৰী হিমন্ত বিশ্ব শৰ্মাই প্ৰকাশ কৰিছে।
“তেনে লোকৰ সন্ধান ওলালে ব্যক্তিগৰাকীৰ লগতে সংস্পৰ্শলৈ অহাসকলক পৃথকে ৰখাৰ ব্যৱস্থা কৰাৰ বাবে কঠোৰ নিৰ্দেশ দিয়া হৈছে,” মন্ত্ৰী শৰ্মাৰ টুইট৷
