“নতুন ৰণনীতি”ৰে নাগৰিকত্ব বিধেয়কৰ বিৰুদ্ধে যুঁজলৈ প্ৰস্তুত হৈছে ৭০টা সংগঠন। গুৱাহাটীত বুধবাৰে একাংশ বুদ্ধিজীৱীৰ পৰামৰ্শ গ্ৰহণৰ পিছতে এক বৈঠকত এই বিষয়ে সংগঠনকেইটাই সিদ্ধান্ত গ্ৰহণ কৰিছে।
“বুদ্ধিজীৱীসকলৰ সৈতে বৈঠকৰ পাছতেই ৭০ টা সংগঠনৰ কাৰ্য্যকৰী সমিতিৰ সভা অনুষ্ঠিত হয়। সভাত বিধেয়কৰ বিৰুদ্ধে জে পি চিত অধিক হেঁচা প্ৰয়োগ কৰিবলৈ কেতবোৰ ৰণনীতি তৈয়াৰ কৰা হৈছে,” জনালে সংগঠনসমূহৰ অন্যতম কৃষক মুক্তি সংগ্ৰাম সমিতিৰ নেতা অখিল গগৈয়ে।
বিধেয়কখনৰ বিৰুদ্ধে অসমৰ প্ৰতিবাদক সৰ্বভাৰতীয় পৰ্য্যায়লৈ নিয়া, আসন্ন পঞ্চায়ত নিৰ্বাচনত বিজেপিক পৰাভূত কৰিবলৈ আহ্বান জনোৱাকে ধৰি বহুকেইটা পৰামৰ্শ বুদ্ধিজীৱীসকলে আগবঢ়োৱা বুলি লগতে জনায় গগৈয়ে।
গগৈয়ে জনায় যে অতি সোনকালে সংগঠনকেইটাই অধিবক্তা প্ৰশান্ত ভূষন আৰু অটল বিহাৰী বাজপেয়ী চৰকাৰৰ মন্ত্ৰী অৰুন শ্ব’ৰি, যশৱন্ত সিনহাকে ধৰি দেশৰ কেইবাগৰাকীও আগশাৰীৰ ৰাজনীতিক, সাংবাদিক আৰু সমাজ কৰ্মীক লগ ধৰিব।
কৃষক মুক্তি সংগ্ৰাম সমিতিৰ গুৱাহাটীস্থিত মুখ্য কাৰ্য্যালয়ত বুধবাৰে মাইনী মহন্ত, উদয়াদিত্য ভৰালী, নেকিবুৰ জামান, অজিত কুমাৰ ভূঞা, অৰূপ বৰবৰা, হাইদৰ হুছেইনকে ধৰি প্ৰায় ২০গৰাকী বিশিষ্ট ব্যক্তিৰ সৈতে বৈঠকত মিলিত হৈছিল সংগঠনকেইটা।
