সংসদৰ চলিত অধিৱেশনতে নাগৰিকত্ব সংশোধনী বিধেয়ক ২০১৬’ গৃহীত কৰাৰ কথা শুকুৰবাৰে প্ৰধানমন্ত্ৰী নৰেন্দ্ৰ মোদীয়ে শিলচৰত ঘোষণা কৰাৰ পাছত আজি গুৱাহাটীত কৃষক মুক্তি সংগ্ৰাম সমিতিৰ নেতৃত্বত ৭০ টা জাতীয়-জনগোষ্ঠীয় সংগঠনে গুৱাহাটীত পদযাত্ৰা কৰে।
কৃষক মুক্তি সংগ্ৰাম সমিতিৰ উপদেষ্টা অখিল গগৈকে ধৰি ৭০ টা সংগঠনৰ নেতৃত্বই চানমাৰিৰ চহিদ বেদীত সংকল্প লৈ আজি সজাগতা অভিযানৰ উদ্দেশ্যে পদযাত্ৰা কৰে।
পদযাত্ৰাৰ আৰম্ভণিতে কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে জাতিৰ সংকটকালত অসমৰ ৰাইজক ঐক্যবদ্ধভাৱে সংগ্ৰাম কৰিবলৈ ওলাই অহাৰ আহ্বান জনায়। ইপিনে,৭০ সংগঠনৰ নেতৃত্বই বিধেয়কখনক লৈ অগপৰ স্থিতিক ধিক্কাৰ দিয়ে।
কৃষক নেতা অখিল গগৈয়ে কয়, ‘’অগপ চৰকাৰৰ পৰা ওলাই নাহিলে তেওঁলোককো বিজেপিৰ লগতেই থকা বুলি বুজিব লাগিব।‘’
আনহাতে, ৭০ টা সংগঠনৰ এই সজাগতা অভিযানৰ সমদলটোৱে আমবাৰীৰ অগপ কাৰ্যালয়ৰ অভিমুখে ৰাওনা হয়। তাত তেওঁলোকে অগপক বিধেয়কখনৰ সম্পৰ্কত স্থিতি স্পষ্ট কৰাৰ আহ্বান জনোৱাৰ কথা আছিল যদিও কাৰ্যালয়ৰ সন্মুখত আৰক্ষীয়ে বাধা দিয়াত তাৰ পৰা সমদলটো পানবজাৰ অভিমুখে ৰাওনা হয়।
পানবজাৰৰ পৰা পদযাত্ৰা কৰি আহি সমদলটো দীঘলিপুখুৰী পাৰত অৱস্থান কৰে আৰু পথত ওপৰতে শুই পৰাৰ উপৰি জাতিধ্বংসী বিধেয়কৰ বিৰুদ্ধে প্ৰতিবাদত মুখৰ হৈ পৰে।
জানিব পৰা মতে, ৭০ সংগঠনৰ নেতৃত্বই বিয়লি এখন বৈঠকত মিলিত হৈ পৰৱৰ্তী আন্দোলনৰ কাৰ্যসূচী সম্পৰ্কে ঘোষণা কৰিব।
