যোৰহাটত সোমবাৰে এতিয়ালৈকে সৰ্বাধিক কোভিড-১৯ পজিটিভ চিনাক্ত হৈছে। ২৪ঘন্টাত জিলাখনত ১০১গৰাকী লোকৰ দেহত ধৰা পৰিছে এই মাৰাত্মক ভাইৰাছৰ উপস্থিতি।
এই নতুন ১০১গৰাকী পজিটিভ ৰোগীৰ সৈতে জিলাখনত মুঠ কোভিড পজিটিভ ৰোগীৰ সংখ্যা ৮৯৯গৰাকীলৈ বৃদ্ধি পালে।
ইয়াৰ মাজতে জেইল ৰোডত থকা কে জি নাৰ্ছি হোমখনত ৮গৰাকী কৰ্মচাৰীৰ পজিটিভ ধৰা পৰাৰ পাছত ইয়াক কন্টেইনমেন্ট জ’ন ঘোষণা কৰা হৈছে।
যোৰহাটৰ উপাযুক্ত ৰোশ্নি এ কোৰাটিয়ে সাংবাদিকক কয় যে ২৩জুলাইৰ পৰা যোৰহাটত আনলক আৰম্ভ হ’ব।
তেওঁ কয় যে ৰাস্তাৰ একাষৰ দোকানসমূহ পুৱা ৭বজাৰ পৰা এদিনৰ মূৰে মূৰে সলনা-সলনিকৈ খোলাৰ অনুমতি দিয়া হ’ব।
যোৰহাটত যোৱা ৯জুলাইৰ পৰা ১৫জুলাইলৈকে সম্পূৰ্ণ লকডাউনৰ পাছত ১৬জুলাইৰ পৰা বৰ্তমান অনিৰ্দিষ্টকালীন লকাডাউন চলি আছে।
কোৰাটিয়ে সোমবাৰে সন্ধিয়া জানিবলৈ দিয়ে যে নতুনকৈ চিনাক্ত হোৱা ১০১গৰাকী পজিটিভ ৰোগীৰ ভিতৰত ১০০গৰাকীৰে কোনো ভ্ৰমণ বৃত্তান্ত নাই আৰু ইয়াৰ ভিতৰৰ ৫১গৰাকীয়ে যোৰহাট চহৰৰ।
আনহাতে, যোৰহাট চহৰৰ ৫১গৰাকীৰ ভিতৰত ৫০গৰাকীৰে কোনো ভ্ৰমণ বৃত্তান্ত নাই।
কোৰাটিয়ে জানিবলৈ দিয়ে যে যোৰহাটত বৰ্তমান সক্ৰিয় ৰোগীৰ সংখ্যা হৈছে ৫৫১গৰাকী।
ইয়াৰ পূৰ্বে দেওবাৰে উপায়ুক্তগৰাকীয়ে কৈছিল যে গৱৰ্ণমেন্ট গাৰ্লছ এইচ এছ স্কুলত কোভিড-১৯ৰ পৰীক্ষাৰ বাবে এটা স্ক্ৰীনিং চেন্টাৰ মুকলি কৰা হৈছে আৰু মঙলবাৰে আৰু দুটা এনেকুৱা চেন্টাৰ যোৰহাট মিউনিচিপাল বোৰ্ডৰ অধীনৰ ধেনুছুচা এল পি স্কুল আৰু কল্যাণ সংঘ এল পি স্কুলত মুকলি কৰা হ’ব।
