গোৱালপাৰা জিলাৰ আগিয়া আৰক্ষী থানাৰ অন্তৰ্গত গোৱালপৰীয়া গাঁৱৰ বিবাহিত মহিলা এগৰাকী বিগত ৫ মাহ ধৰি সন্ধানহীন হৈ থকাৰ বাতৰি পোৱা গৈছে৷ সন্ধানহীন মহিলা গৰাকীৰ নাম জানমণি নেছা৷
জানিব পৰা মতে গোৱালপৰীয়া গাঁৱৰ জানমণিৰ বিয়া হৈছিল ধুবুৰী জিলাৰ বিলাসীপাৰাৰ এখন ভিতৰুৱা গাঁৱত৷ বিয়াৰ প্ৰায় এবছৰ পিছত বিলাসীপাৰাৰ স্বামীৰ ঘৰৰ পৰা পিতৃৰ ঘৰলৈ ফুৰিবলৈ আহিছিল জানমণি৷
পিতৃৰ ঘৰলৈ অহাৰ দিনাই অৰ্থাৎ চলিত বৰ্ষৰ ১৬ জুন তাৰিখে ঘৰৰ ওচৰৰে টুকুৰাত থকা আলহী এঘৰলৈ ওলাই যোৱাৰ পিছতে সন্ধানহীন হৈ পৰে জানমণি৷ ইয়াৰ পিছতে জানমণিৰ পৰিয়ালত হাহাকাৰ লাগে৷
পৰৱৰ্তী সময়ত পৰিয়ালৰ লোকে একে গাঁৱৰে নৱীৰ হুছেইন আৰু নজমুল হক নামৰ লোক দুজনে জানমণিক বলপূৰ্বক বাইকত তুলি লৈ যোৱাৰ কথা জানিবলৈ সক্ষম হয় আৰু ঘটনা সন্দৰ্ভত পৰিয়ালৰ লোকে আগিয়া আৰক্ষী থনাত এখন এজাহাৰ দাখিল কৰে৷
কিন্তু জানমণিৰ পৰিয়ালে অভিযোগ কৰা মতে ঘটনাটোত আৰক্ষীয়ে কোনো গুৰুত্ব আৰোপ কৰা নাই৷ মাথোঁ অপহৰণকাৰী লোক দুজনক আটক কৰি জেল হাজোতলৈ পঠায়ে দায়িত্ব সামৰে আগিয়া আাৰক্ষীয়ে৷
যাৰ ফলত ঘটনাৰ ৫ মাহ পিছতো সন্ধানহীন জানমণি কোনো শুংসূত্ৰ উলিয়াবলৈ সক্ষম নহ’ল আৰক্ষী৷
ইয়াৰ বিপৰীতে আৰক্ষীয়ে অভিযোগকাৰী পৰিয়ালটোকহে সন্ধানহীন জানমণিৰ বিচাৰি উলিয়াই দিয়াৰ বাবে বিভিন্ন অত্যাচাৰ কৰাৰ অভিযোগ তুলিছে জানমণিৰ পৰিয়ালটোৱে৷
আনহাতে এজাহাৰত উল্লেখ কৰা দুই অপৰাধীৰ বিৰুদ্ধে উপযুক্ত প্ৰমাণ থকাৰ পিছতো আৰক্ষীৰ আগত আত্মসমৰ্পণ কৰি এটা মাহ জে’ল হাজোতত থাকি অহা অপৰাধী দুজন এতিয়া মুকলি আকাশৰ তলত নিৰ্বিঘ্নেে ঘূৰি ফুৰিছে জানিব পৰা গৈছে৷
পৰিয়ালৰলোকে উপযুক্ত সাক্ষ্য প্ৰমাণ দিয়াৰ পিচতো কিদৰে নৱীৰ হুছেইন আৰু নজমুল হকে মুকলি আকাশৰ তলত থাকিব পাৰিলে ইয়াকে লৈ সৰ্বত্ৰেে এতিয়া মুকলি চৰ্চা চলিছে৷
ইফালে আগিয়া আৰক্ষীয়ে প্ৰতিটো দিনে জানমণি নেছাক উলিয়াই দিয়াৰ বাবে পৰিয়ালটোক শাৰীৰিক আৰু মানসিক নিৰ্যাতন কৰি অহা বিষয়টোৰো সচেতন মহলে সমালোচনা কৰিছে৷
বিগত ৫ মাহ ধৰি বিবাহিত কন্যাৰ সন্ধানত এক প্ৰকাৰ বলিয়া হৈ পৰা জানমণি নেছাৰ পিতৃ মাতৃৰ মৰ্মবেদনা বুজিব নে আৰক্ষী প্ৰশাসনে? এই প্ৰশ্নটোৱে এতিয়া অঞ্চলৰ সৰ্বত্ৰে চৰ্চা লাভ কৰিছে।
অঞ্চলটোৰ জানমণিৰ নিৰুদ্দেশ ঘটনাটোৰ উপযুক্ত তদন্তৰ দাবী কৰিছে৷
