‘‘দিল্লীলৈ সাধাৰণ দৰিদ্ৰ ৰাইজে চিকিত্সাৰ বাবে যাব নোৱাৰে, আমাৰ চৰকাৰৰ দিনত এইমছৰ দৰে উন্নত চিকিত্সালয়ৰ কাম চলি থকাৰ লগতে এঘাৰখনকৈ মেডিকেল কলেজৰ কাম চলি আছে,’’ বিজেপিৰ ৰাজ্যিক সভাপতি ৰঞ্জিত দাসে আজি চামগুৰিত ভাষণ প্ৰসংগত এইদৰে কয়।
চামগুৰিৰ কাৱৈমাৰী খেলপথাৰত বিজেপিৰ কলিয়াবৰ জিলা সভাপতি অনিল শইকীয়াই আদৰণি ভাষণ প্ৰদান কৰা সভাখনত ৰাজ্যিক সভাপতি গৰাকীয়ে কংগ্ৰেছ চৰকাৰৰ দিনত পাঁচ হাজাৰ ৰাস্তাৰ পকীকৰণৰ কাম হোৱাৰ বিপৰীতে বিজেপি চৰকাৰৰ দিনত একৈশ হাজাৰ পথ পকীকৰণ হৈছে বুলি ৰঞ্জিত দাসে কয়।
ইপিনে, বিজেপিৰ বিধানসভা নিৰ্বাচনত এশ প্লাছ আসনৰ কথা বুজাবলৈ গৈ উপস্থিত ৰাইজৰ লগত এগৰাকী অংকৰ শিক্ষকৰ দৰে আচৰণ কৰি অৱশেষত ৰাজ্যিক সভাপতি ৰঞ্জিত দাসে কয় ১০০+ ৰ ভিতৰত কংগ্ৰেছে দখল কৰি থকা আঠটা সমষ্টি ক্ৰমে চামগুৰি, গোলাঘাট, সৰু পথাৰ, শিবসাগৰ, ডুমডুমা, জোনাই, মৰিয়নি আৰু নাজিৰা সমষ্টিত আগন্তুক বিধান সভা নিৰ্ব্বাচনত বিজেপিৰ প্ৰাৰ্থী জয়যুক্ত হ’ব বুলি দাবী কৰে।
নগাঁও জিলাৰ চামগুৰি সমষ্টিৰ অন্তৰ্গত কাৱৈমাৰী খেলপথাৰত কলিয়াবৰ জিলাৰ বিজেপিৰ উদ্যোগত অনুষ্ঠিত পৃষ্ঠপ্ৰমূখ আৰু কাৰ্যকৰ্ত্তাৰ সন্মিলন সভাখনতে ৰাজ্যিক সভাপতি গৰাকীয়ে চামগুৰি সমষ্টিৰ প্ৰমূখ কেইজনক নিযুক্ত পত্ৰ বিতৰণ কৰে।
সভা অনুষ্ঠিত হোৱাৰ আৰম্ভণিতে উৰিয়াগাঁও বাইপাছৰ পৰা বিজেপিৰ নেতা কৰ্মীসকলে এক বিশাল বাইক ৰেলীৰে ৰাজ্যিক সভাপতি গৰাকীক আদৰি অনাৰ লগতে চামগুৰি তিনি আলিত বিজেপিৰ যুৱ নেতা প্ৰাৰ্থ প্ৰতিম হাজৰিকাৰ নেতৃত্বত বিপুল ভাৱে সভাপতি ৰঞ্জিত দাসক আদৰণি জনোৱা হয়।
পাঁচ সহস্ৰাধিক বিজেপি কৰ্মী-সমৰ্থক উপস্থিত থকা সভাখনত নগাঁও জিলাৰ উপ-সভাপতি মুকুট কুমাৰ দেৱনাথ, সংখ্যলঘূ মহিলা মৰ্চাৰ উপ সভানেত্ৰী চালমা জেচমিন, কলিয়াবৰ জিলাৰ প্ৰভাৰী দেৱজিত বৰা, কলিয়াবৰ জিলাৰ উপ সভাপতি জ্ঞানদীপ মহন্ত, মহিলা মৰ্চাৰ ৰাজ্যিক সম্পাদিকা পিংকি মিৰ্ধা, ৰূপহীহাট সমষ্টিৰ বিজেপিৰ প্ৰাৰ্থীত্ব প্ৰত্যাশী নেতা আব্দুল আজিজ, বিজেপিৰ বাজিয়াগাওঁ মণ্ডলৰ সভাপতি প্ৰাণজিৎ বৰাকে ধৰি বহু কেইজন গণ্য মান্য ব্যক্তি উপস্থিত থাকে।
