বিতৰ্কিত তিনি কৃষি আইনৰ সন্দৰ্ভত মুখ খুলি প্ৰধানমন্ত্ৰী নৰেন্দ্ৰ মোদীক তীক্ষ্মস্বৰে কটাক্ষ কৰিছে কংগ্ৰেছ নেত্ৰী প্ৰিয়ংকা গান্ধী ভদ্ৰাই।
জিলা প্ৰশাসনে অনুষ্ঠিত কৰিবলৈ অনুমতি প্ৰদান নকৰিলেও বুধবাৰে বিতৰ্কিত তিনি কৃষি আইনৰ বাতিলৰ দাবীত উত্তৰ প্ৰদেশৰ চাহাৰণপুৰত বিপুল পৰিমাণৰ কৃষকৰ উপস্থিতিৰে কিষাণ মহাপঞ্চায়ত অনুষ্ঠিত হৈ যায়।
এক সূত্ৰৰ মতে পঞ্জাৱ আৰু হাৰিয়ানাৰ কৃষকৰ আন্দোলনৰ দ্বাৰা প্ৰভাৱান্বিত হৈ উত্তৰ প্ৰদেশৰ চাহাৰণপুৰো তিনি বিতৰ্কিত কৃষি আইন বাতিলৰ দাবী আৰম্ভ হোৱা আন্দোলনে অন্য এক হটস্পট হৈ উঠাৰ আশংকাত জিলা প্ৰশাসনে আজি পুৱা হঠাতে কিষাণ মহাপঞ্চায়ত আয়োজনৰ অনুমতি বাতিল কৰি দিয়ে।
ততস্বত্বেও বুধবাৰে উত্তৰ প্ৰদেশৰ চাহাৰণপুৰত অনুষ্ঠিত কিষাণ মহাপঞ্চায়তত প্ৰিয়ংকা গান্ধীয়ে কয় যে আত্মনিৰ্ভৰ দেশক নিৰ্মাণ কৰে কৃষকে, কিন্তু নতুন কৃষি আইনে এই কৃষককে সংকটত পেলাইছে।
এই কিষাণ মহাপঞ্চায়তত অংশগ্ৰহণ কৰি কংগ্ৰেছ নেত্ৰী প্ৰিয়ংকা গান্ধী ভদ্ৰাই উত্তৰ প্ৰদেশৰ ২৭ খন জিলাত ১০ দিনীয়া ‘জয় জোৱান জয় কিষাণ’ ৰেলী অনুষ্ঠিত কৰা হ’ব বুলিও ঘোষণা কৰিছে।
“তেওঁলোকে(চৰকাৰে) কৈছে কৃষকসকল দেশদ্ৰোহী, কিন্তু সত্যটো হৈছে তেওঁলোকহে দেশদ্ৰোহী।” এইদৰে অতি খুৰধাৰভাৱে চৰকাৰক আক্ৰমণ কৰে কংগ্ৰেছ নেত্ৰীগৰাকীয়ে।
কিষাণ মহাপঞ্চায়তক সম্বোধি কংগ্ৰেছ নেত্ৰীগৰাকীয়ে প্ৰধানমন্ত্ৰী নৰেন্দ্ৰ মোদীক কটাক্ষ কৰি লগতে কয়, “পাকিস্তান আৰু চীন ভ্ৰমণ কৰিবলৈ প্ৰধানমন্ত্ৰীৰ সময় থাকে, কিন্তু তেওঁক ভোট দিয়া নিজৰ গৃহ সমষ্টিৰ সীমান্তৰ কৃষকৰ আন্দোলনস্থলীলৈ যাবলৈ সময় নাই।”
প্ৰধানমন্ত্ৰী মোদীয়ে সংসদত আন্দোলনকাৰী কৃষকক আন্দোলনজীৱী বুলি আখ্যা দি চূড়ান্তভাৱে অপমান কৰাৰ বুলিও দাবী কৰিছে কংগ্ৰেছ নেত্ৰী প্ৰিয়ংকাই।
“তেওঁলোকে(চৰকাৰ) আন্দোলনকাৰী কৃষকক বিচ্ছিন্নতাবাদী আৰু সন্ত্ৰাসবাদী কয়। তেওঁলোক কৃষক হ’ব পাৰে, কিন্তু কৃষকৰ হৃদয় কেতিয়াও দেশৰ বিৰোধী নহয়। কষকৰ হৃদয়ে সদায় নিজ জন্মভূমিৰ বাবে কাম কৰে। কৃষকসকলে এতিয়াও দিন-ৰাতি একাকাৰ কৰি দেশৰ বাবে উছৰ্গিত হৈ কাম কৰি আছে।” কংগ্ৰেছ নেত্ৰী প্ৰিয়ংকাই কয়।
