অসম চাহ জনজাতি ছাত্ৰ সন্থা (আটছা)ৰ মাৰ্ঘেৰিটা, ডিগবৈ আৰু পেঙেৰী শাখাৰ উদ্যোগত মাৰ্ঘেৰিটা মহকুমাধিপতি কাৰ্যালয়ৰ সন্মূখত আজি ২ ঘন্টীয়া উত্তাল ধৰ্ণা কাৰ্যসূচী ৰূপায়ণ কৰি চাহ শ্ৰমিকৰ মজুৰি ৩৫১ টকালৈ বৃদ্ধি কৰাৰ দাবী জনায়।
আজি আটছাৰ সদস্যসকলে উত্তৰ মাৰ্ঘেৰিটা ৰঙ্গমঞ্চৰ পৰা প্ৰতিবাদী শোভাযাত্ৰা কৰি আহি মহকুমাধিপতি কাৰ্যালয়ৰ সন্মুখত এক ধৰ্ণা কাৰ্যসূচী ৰূপায়ণ কৰে।
প্ৰতিবাদকাৰীসকলে মাৰ্ঘেৰিটা মহকুমাধিপতিক এখনি স্মাৰক পত্ৰ প্ৰদান কৰাৰ লগতে ইয়াৰ প্ৰতিলিপি মুখ্যমন্ত্ৰী সৰ্বানন্দ সোণোৱাললৈও প্ৰেৰণ কৰে।
উল্লেখ্য যে, বিজেপি চৰকাৰে নিৰ্বাচনৰ আগতে চাহ শ্ৰমিকৰ মজুৰি ৩৫১ টকালৈ বৃদ্ধি কৰাৰ বাবে দিয়া প্ৰতিশ্ৰুতি আজি প্ৰায় পাঁঁচ বছৰ হ’ল যদিও আজিকোপতি কোনো ধৰণৰ ব্যৱস্থা গ্ৰহণ কৰা নাই। ইয়াৰ ফলত প্ৰতিবাদকাৰী সকলে ক্ষুণ্ণ হৈ পৰিছে।
এক প্ৰেছ বিজ্ঞপ্তি যোগে সংগঠনটোৱে বিজেপি চৰকাৰে ভোট বেংকৰ নিকৃষ্ট ৰাজনীতিত জড়িত হৈ পুনৰ চাহ শ্ৰমিক সকলক ঠগ-প্ৰৱঞ্চনা কৰিছে বুলি অভিযোগ কৰি চাহ জনজাতিক জনজাতিকৰণ, দৈনিক মজুৰি ৩৫১ টকা কৰাকে ধৰি স্পৰ্শকাতৰ সমস্যা সমূহ নিৰ্বাচনৰ পূৰ্বে সমাধানৰ দাবী জনায়।
অন্যথা অধিক তীব্ৰ গণতান্ত্ৰিক আন্দোলনৰ হুংকাৰ প্ৰদান কৰে আজিৰ প্ৰতিবাদকাৰী সকলে।
