পুনৰ জম্মু আৰু কাশ্মীৰক পূৰ্ণাঙ্গ ৰাজ্যৰ মৰ্যাদা প্ৰদান কৰা হ’ব। শনিবাৰে লোকসভাত কেন্দ্ৰীয় গৃহমন্ত্ৰী অমিত শ্বাহে এই ইংগিত প্ৰদান কৰিছে।
চলিত সংসদৰ লোকসভাৰ অধিবেশনত জম্মু আৰু কাশ্মীৰ পুনৰ গঠন(সংশোধন) বিল ২০২১ সম্পৰ্কীয় আলোচনা কালত এই ইংগিত দিছে কেন্দ্ৰীয় গৃহমন্ত্ৰগৰাকীয়ে।
ইফালে সংসদত বিলখন আলোচনাৰ সময়তে বহু সাংসদে আপত্তি কৰিছে যে এই বিলখনৰ সংশোধনী অনাৰ অৰ্থ হৈছে জম্মু আৰু কাশ্মীৰে আৰু কেতিয়াও পুৰ্ণাংগ ৰাজ্যৰ মৰ্যাদা লাভ নকৰিব।
এই আপত্তিৰ বিপৰীতে লোকসভাৰ মজিয়াত কেন্দ্ৰীয় গৃহমন্ত্ৰী গৰাকীয়ে কয় যে, “বহু সাংসদে কোৱাৰ দৰে এই সংশোধনী বিলখনত ক’তোৱে জম্মু আৰু কাশ্মীৰে পুনৰ ৰাজ্যৰ মৰ্যাদা নেপাব বুলি লিখা হোৱা নাই। মই ইয়াৰ উদ্দেশ্যবোৰ স্পষ্ট কৰি দিছো।”
“মই সদনত পুনৰ কৈছো, এই বিধেয়কখনৰ জম্মু আৰু কাশ্মীৰৰ ৰাজ্য মৰ্যাদা দিয়াৰ সৈতে কোনো সম্পৰ্ক নাই। সঠিক সময়ত জম্মু আৰু কাশ্মীৰক ৰাজ্যৰ মৰ্যাদা দিয়া হ’ব।” গৃহমন্ত্ৰীগৰাকীয়ে পুনৰ কয়।
উল্লেখ্য যে ২০১৯ বৰ্ষৰ ৫ আগষ্টত কেন্দ্ৰীয় চৰকাৰে জম্মু আৰু কাশ্মীৰৰ পৰা ৩৭০ অনুচ্ছেদ প্ৰত্যাহাৰ কৰি জম্মু আৰু কাশ্মীৰৰ ৰাজ্যখন ভংগ কৰি দিছিল।
ৰাজ্যিক মৰ্যাদা ভংগ কৰি জম্মু আৰু কাশ্মীৰ আৰু লাডাখ নামেৰে দুখন কেন্দ্ৰীয় শাসিত অঞ্চল গঠন কৰিছিল কেন্দ্ৰীয় চৰকাৰে।
