বনভূমিৰ সংকোচনৰ লগে লগে এতিয়া বাধ্যত পৰি হাতীকে ধৰি বহু বন্য জন্তুৱে খাদ্যৰ সন্ধানত জন অৰণ্যলৈ ওলাই আহিবলগীয়া হৈছে।
ফলত বৃদ্ধি পাইছে বন্য জন্তু বিশেষকৈ হাতীৰ সৈতে মানুহৰ সংঘাত।
তামিলনাডুত ১০ বছৰ পূৰ্বে জন অৰণ্যলৈ ওলাই অহা এটা হাতীক বিদ্যুতৰ তাঁৰ লগাই হত্যা কৰাৰ ঘটনা সন্দৰ্ভত আজি মেট্টুপালায়ামৰ এখন আদালতে দুই ভাতৃক তিনি বছৰৰ কাৰাদণ্ডৰে দণ্ডিত কৰে।
২০১০ চনতে গোবিন্দৰাজন আৰু তেওঁৰ ভাতৃ কানগৰাজে ছিৰুমুগাই অঞ্চলৰ পথাৰত বিদ্যুতৰ তাঁৰ বান্ধি হাতী হত্যা কৰিছিল।এই ঘটনাত দুই ভাতৃৰ পিতৃ আম্মআছাইয়ো অভিযুক্ত আছিল যদিও তেওঁৰ ইতিমধ্যে মৃত্যু ঘটিছে।
আদালতে আজি দুই ভাতৃক তিনি বছৰৰ কাৰাদণ্ড বিহাৰ লগতে প্ৰত্যেককে ১০ হাজাৰ টকাৰ জৰিমনাও বিহে।
বন্য প্ৰাণীৰ প্ৰতি নিষ্ঠুৰ আচৰণ কৰা লোক দুজনক আদালতে কাৰাদণ্ড বিহাত স্বাভাৱিকতে উৎফুল্লিত হৈ পৰিছে প্ৰকৃতিপ্ৰেমীসকল।
লোক দুজনে তেওঁলোকৰ কল খেতি হাতীৰ পৰা ৰক্ষা কৰিবলৈ অবৈধ ভাবে পথাৰত বিদ্যুতৰ তাঁৰৰ বেৰ লগাই থৈছিল আৰু সেই তাঁৰত লাগিয়েই হাতীটোৰ মৃত্যু ঘটিছিল।
উল্লেখ্য ভাৰতবৰ্ষত বিদ্যুতৰ তাঁৰ লগাই হাতী হত্যা কৰাৰ ঘটনা ক্ৰমাৎ বাঢ়ি গৈছে।২০০৯ চনৰ পৰা ২০১৭ চনৰ ভিতৰত দেশত বিদ্যুতৰ তাঁৰ লগাই হত্যা কৰা হৈছিল ৪৬১ টা হাতী।
এই ক্ষেত্ৰত অসমো পিছপৰা নহয়। অসমতে ২০১১ চনলৈকে বিদ্যুতৰ তাঁৰ লগাই হত্যা কৰা হাতীৰ সংখ্যা হৈছে ৯০ টা।
২০২০ চনৰ ১৮ ডিচেম্বৰৰ দিনাও চিৰাং জিলাৰ ছিকাঝৰা গাঁওত এজনী গৰ্ভৱতী হাতীক বিদ্যুতৰ তাঁৰ লগাই হত্যা কৰা হৈছিল। জিলা খনত ২০২০ চনৰ আগষ্ট মাহৰ পৰা ডিচেম্বৰ মাহলৈ ৬টা হাতীক বিদ্যুতৰ তাঁৰেৰে হত্যা কৰা হৈছিল।
তামিলনাডুত বিদ্যুতৰ তাঁৰ লগাই হাতী হত্যা কৰা লোকক তিনি বছৰৰ কাৰাদণ্ড বিহা হৈছে যদিও অসমত এনে দৃষ্টান্ত আজিলৈকে পোৱা হোৱা নাই।
অসমত হাতী হত্যাকাৰীৰ কঠোৰ শাস্তি নোহোৱাৰ বাবেই বহুতে নিৰ্বিবাদে বিদ্যুতৰ তাঁৰ লগাই হাতী হত্যা কৰি যাব পাৰিছে।
বন্য জন্তুৰ বিৰুদ্ধে পাশৱিক ব্যৱস্থা গ্ৰহণ কৰা সকলক তামিলনাডুত বিহাৰ দৰেই কঠোৰ শাস্তি বিহাৰ দাবী জনাইছে প্ৰকৃতিপ্ৰেমীসকলে।
এইক্ষেত্ৰত প্ৰয়োজন হ’লে অসম বন আইন সংশোধন কৰি হ’লেও বিদ্যুতৰ তাঁৰ ব্যৱহাৰ কৰি হাতী হত্যা কৰা সকলক শাস্তি বিহাৰ পোষকতা কৰিছে বহুতে।
