নিৰস্ত্ৰ প্ৰতিবাদকাৰী ওপৰত গুলীবৰ্ষণ অব্যাহত ৰাখিছে ম্যানমাৰৰ জুণ্টাৰ সেনাই।
১ ফেব্ৰুৱাৰিত সামৰিক অভ্যুত্থানৰ যোগেদি গণতান্ত্ৰিক চৰকাৰক ক্ষমতাচ্যুত কৰি জুণ্টা শাসন হস্তগত কৰাৰ দিনাৰ পৰাই সমগ্ৰ ম্যানমাৰ উত্তাল হৈ আছে।
ম্যানমাৰৰ জনতাই সামৰিক বাহিনীৰ ৰঙা চকুলৈ কেৰেপ নকৰি দক্ষিণ পূৱ এছিয়াৰ পাহাৰীয়া দেশখনত পুনৰ গণতন্ত্ৰ প্ৰতিষ্ঠা কৰাৰ দাবীত যোৱা দুমাহে নিৰন্তৰ প্ৰতিবাদ অব্যাহত ৰাখিছে।
লগতে পঢ়ক : ম্যানমাৰ আৰক্ষীৰ ওপৰত কাচিন ইণ্ডিপেণ্ডেনছ আৰ্মিৰ আক্ৰমণ : ২০ৰো অধিক জোৱান নিহত
পাঁচ শতাধিক নিৰস্ত্ৰ প্ৰতিবাদকাৰী সেনাৰ গুলীত নিহত হোৱাৰ পিছতো দেশখনৰ জনতা থমকি ৰোৱা নাই।
যোৱা শনিবাৰৰ দিনটো দেশখনৰ ইতিহাসৰ আটাইতকৈ ৰক্তাক্ত দিন হিচাপে চিহ্নিত হোৱাৰ পিছতো ম্যানমাৰৰ সেনাই প্ৰতিবাদকাৰীৰ ওপৰত গুলীবৰ্ষণ বন্ধ কৰা নাই।
উল্লেখ্য যে সংবাদ সংস্থা ৰয়টাৰ-এ প্ৰকাশ কৰা অনুসৰি যোৱা শনিবাৰে জুণ্টাৰ সেনাই দেশখনৰ ১৪১ গৰাকী নিৰস্ত্ৰ প্ৰতিবাদকাৰীক গুলীয়াই হত্যা কৰিছিল।
লগতে পঢ়ক : অতি অমানৱীয় : শতাধিক জনতাক হত্যা কৰি নৈশ ভোজত ব্যস্ত ম্যানমাৰ সেনা
ইফালে সোমবাৰে আৰু ১৯ গৰাকী নিৰস্ত্ৰ প্ৰতিবাদকাৰীক গুলীয়াই হত্যা কৰিছে ম্যানমাৰ সেনাই। এই ১৯ গৰাকী প্ৰতিবাদকাৰীক হত্যা কৰাৰ লগে লগে গণতন্ত্ৰ পুনঃপ্ৰতিষ্ঠাৰ দাবীত আন্দোলনত অংশগ্ৰহণ কৰি মৃত্যু হোৱা প্ৰতিবাদকাৰীৰ সংখ্যা ৫১২ গৰাকীলৈ বৃদ্ধি পাইছে।
ৰয়টাৰৰ মতে থাইলেণ্ডৰ সীমান্ত অঞ্চলত কাৰেন বিদ্ৰোহী সংগঠনৰ ওপৰত ম্যানমাৰ সেনাই বায়ু সেনাৰ বিমানেৰে আক্ৰমণ সংঘটিত কৰাৰ পিছত প্ৰায় ৩০০০ হাজাৰ লোক থাইলেণ্ডলৈ পলায়ন কৰিছে।
আনহাতে চিএনএনৰ বাতৰি মতে তাৰে ২০০০ লোকক থাইলেণ্ডে পুনৰ ম্যানমাৰলৈ ঘূৰাই পঠাইছে।
