যোৱা ১ ফেব্ৰুৱাৰিত জুণ্টাই ম্যানমাৰৰ ক্ষমতা হস্তগত কৰাৰ পিছৰে পৰা পুনৰ গণতন্ত্ৰ প্ৰতিষ্ঠাৰ দাবীত দেশখনৰ জনতাই সামৰিক শাসকৰ বিৰুদ্ধে অব্যাহত ৰাখিছে উত্তাল গণতান্ত্ৰিক প্ৰতিবাদ।
দক্ষিণ পূৱ এছিয়াৰ পাহাৰীয়া ৰাষ্ট্ৰখনৰ প্ৰতিখন সৰু বৰ চহৰতে দেশখনত পুনৰ গণতন্ত্ৰ প্ৰতিষ্ঠাৰ দাবীত দেশখনৰ জনতাই অব্যাহত ৰখা নিৰস্ত্ৰ প্ৰতিবাদীকাৰীৰ ওপৰত নিৰ্মমভাৱে গুলীয়াই হত্যা কৰাৰ পিছত ম্যানমাৰৰ সেনাই নিশা নৈশ ভোজ আয়োজন কৰাৰ দৰে অতি অমানৱীয় কাণ্ড পোহৰলৈ আহিছে।
উল্লেখ্য যে ম্যানমাৰৰ ইতিহাসত ক’লা দিন ৰূপে বিবেচিত যোৱা শনিবাৰে জুণ্টাৰ সেনাই ১৪১ গৰাকী নিৰস্ত্ৰ প্ৰতিবাদকাৰীক হত্যা কৰিছিল।
১৪১ গৰাকী নিৰস্ত্ৰ প্ৰতিবাদকাৰীক বৰ্বৰভাৱে হত্যা কৰাৰ পিছেত সেই নিশাই ম্যানমাৰৰ জুণ্টা প্ৰধান মিন আং লেইঙে আয়োজন কৰিছিল নৈশ ভোজৰ।
সামৰিক প্ৰধান মিন আং লেইঙে দেশখনৰ ‘সামৰিক দিৱস’ উদযাপনেৰে শতাধিক নিৰস্ত্ৰ জনতাক হত্যা কৰি এই নৈশ ভোজৰ আয়োজন কৰা বুলি জানিব পৰা গৈছে।
লগতে পঠক : ম্যানমাৰ আৰক্ষীৰ ওপৰত কাচিন ইণ্ডিপেণ্ডেনছ আৰ্মিৰ আক্ৰমণ : ২০ৰো অধিক জোৱান নিহত
ইতিমধ্যে সামাজিক মাধ্যমতো ম্যানমাৰ সেনা শাসকৰ নৈশ ভোজৰ ছবি ভাইৰেল হৈ পৰিছে।
ইয়াৰ পিছতে সমগ্ৰ বিশ্বই জুণ্টাৰ এই অমানৱীয় আৰু নাৰকীয় কাণ্ডক অতি কঠোৰ ভাষাৰে গৰিহণাৰ লগতে নিন্দা দিয়া পৰলিক্ষিত হৈছে।
ইউৰোপীয়ান ইউনিয়নসহ ১২ খন ৰাষ্ট্ৰৰ প্ৰতিৰক্ষা মন্ত্ৰীয়ে জুণ্টাৰ এই নিষ্ঠুৰতাক তীব্ৰ ভাষাৰে নিন্দা কৰিছে।
ইফালে আমেৰিকাৰ ৰাষ্ট্ৰপতি জ’ বিডেনো ম্যানমাৰৰ সামৰিক শাসকৰ এই নাৰকীয় ঘটনাক তীব্ৰা ভাষাৰে গৰিহণা দিছে।
বিশ্বৰ নিন্দা, গৰিহণা, কৰ্কথনাক কোনো গুৰুত্ব দিয়া নাই জুণ্টাই। প্ৰতিদিনে জুণ্টাৰ সেনাই গুলীবৰ্ষণ কৰি হত্যা কৰি আহিছে নিৰস্ত্ৰ প্ৰতিবাদকাৰীক। সোমবাৰেও জুণ্টাৰ সেনাই ১৯ গৰাকী প্ৰতিবাদকাৰীক হত্যা কৰিছে।
