আপুনি ATM পৰা টকা উলিয়াবলৈ কোনো অচিনাকি লোকৰ সহায় লৈছে নেকি ? তেন্তে সাৱধান হওঁক।
এটিএমৰ পৰা টকা উলিয়াবলৈ অচিনাকি লোকৰ সহায় লৈ বিপদত পৰিছে নগাঁও জিলাৰ চামগুৰিৰ নিজৰি গাওঁৰ অনু তাঁতী নামৰ এগৰাকী মহিলা ।
যোৱা বৰ্ষৰ অক্টোবৰ মাহত অনু তাঁতীয়ে নিজৰ ভতিজাক স্বপন তাঁতীক এলাহাবাদ বেংকৰ এখন এটিএম পইচা উলিয়াবলৈ দিয়ে।
সেইমতে স্বপন তাঁতীয়ে মিছা আৰক্ষী চকীৰ অন্তৰ্গত কেলিডেন চাহ বাগিচাৰ এটিএমত পইচা উলিয়াবলৈ চেষ্টা কৰি বিফল হোৱাত নাজিৰ হুছেইন নামৰ লোক জনৰ সহায় লয়।
লগতে পঢ়ক: কোভিড পজিটিভ বিধায়ক অখিল গগৈৰ স্বাস্থ্যৰ অৱনতি; জিএমচিএইচত ভৰ্তি
নাজিৰে নগদ ২০,০০০ টকা উলিয়াই স্বপন তাঁতীৰ হাতত দিয়ে। কিন্তু নাজিৰ হুছেইনে স্বপন তাঁতীৰ অজ্ঞাতে এলাহাবাদ বেংকৰ এটিএম খন ঘূৰাই দিয়াৰ পৰিৱৰ্তে মাক কৰিনা খাতুনৰ ইউনাইটেড বেংক অফ ইণ্ডিয়াৰ জখলাবন্ধা শাখাৰ চি এছ পি বামুনি শাখাৰ অন্তৰ্ভুক্ত এটিএম খন দি পঠিয়ায়।
অৱশ্যে এই ঘটনা শেহতীয়াকৈ পোহৰলৈ আহিছে। কিয়নো অনু তাঁতীয়ে উক্ত এটিএম কাৰ্ড খনৰে পইচা উলিয়াব নোৱাৰি সচেতন লোকৰ সহায় লোৱাত প্ৰথমে এটিএম কাৰ্ড খন সাল-সলনি হোৱাৰ কথা পোহৰলৈ অহাত বেংকৰ বিষয়ববীয়াৰ লগত যোগাযোগ কৰাৰ পাছতে আন এক ভয়ংকৰ তথ্য পোহৰলৈ আহিছে।
নাজিৰ হুছেইন নামৰ লোকজনে ইতিমধ্যে অনু তাঁতীৰ একাউণ্টৰ পৰা প্ৰায় ১,৮০,০০০ টকা হৰলুকী কৰাৰ তথ্য প্ৰমাণিত হৈছে। এই সমুদায় ধন সলনি কৰা এটিএম কাৰ্ড খনৰ জড়িয়তে হোৱা বুলি বেংক কৰ্তৃপক্ষই স্পষ্ট কৰিছে।
লগতে পঢ়ক:চীনৰ ইতিহাসত সৰ্বনিম্ন জন্মৰ হাৰৰ ৰেকৰ্ড; সন্তান জন্ম দিয়াৰ আগ্ৰহ হ্ৰাস!
আনহাতে, এই সম্পূৰ্ণ ঘটনা সম্পৰ্কত অনু তাঁতীৰ পৰিয়ালে কলিয়াবৰৰ মিছা আৰক্ষী চকীত এক গোচৰ ৰুজু কৰিছিল। সেই গোচৰৰ ভিত্তিত মিছা আৰক্ষীৰ ভাৰপ্ৰাপ্ত বিষয়া মণি কান্ত সজাতিয়ে মিছা আৰক্ষীৰ সহযোগত এক অভিযান চলাই সোমবাৰে নিশা নাজিৰ হুছেইনক কৰায়ত্ত কৰিবলৈ সক্ষম হয়। নাজিৰ হুছেইন পেছাত এজন মটৰ চাইকেলৰ মেকানিক।
বৰ্তমান আৰক্ষীয়ে নাজিৰ হুছেইনক আটক কৰি সোধাপোছা অব্যাহত ৰাখিছে। ধৃত নাজিৰ হুছেইনৰ ঘৰ কলিয়াবৰ খানৰ অন্তৰ্গত নিজৰি গাওঁত ।
