উচ্চতম ন্যায়ালয়ে খ্ৰীষ্টান মিছনেৰীসকলৰ ওপৰত হোৱা আক্ৰমণৰ বিষয়ে গৃহ মন্ত্ৰালয়ৰ পৰা প্ৰতিবেদন বিচাৰিছে। শেহতীয়াকৈ উত্তৰ প্ৰদেশকে ধৰি কেইবাখনো ৰাজ্যত খ্ৰীষ্টানসকলৰ ওপৰত আক্ৰমণৰ ঘটনা সংঘটিত হৈছে। শীৰ্ষ আদালতখনে বৃহস্পতিবাৰে ঘটনাবোৰৰ ওপৰত প্ৰতিবেদন বিচাৰিছে।
দেশৰ বিভিন্ন প্ৰান্তত খ্ৰীষ্টানসকলৰ ওপৰত চলি থকা আক্ৰমণৰ সন্দৰ্ভত এখন ৰাজহুৱা স্বাৰ্থৰ আবেদন দাখিল কৰা হৈছিল। সেই পৰিপ্ৰেক্ষিততে কিছুমান ৰাজ্যৰ পৰা প্ৰতিবেদন বিচৰা হৈছে।
ন্যায়াধীশ ডি ৱাই চন্দ্ৰচূড় আৰু হিমা কোহলীৰ বিচাৰপীঠে কয় যে উত্তৰ প্ৰদেশ, মধ্য প্ৰদেশ, হাৰিয়ানা, কৰ্ণাটক, উৰিষ্যা, ছত্তীশগড় আৰু ঝাৰখণ্ডৰ খ্ৰীষ্টানসকলৰ ওপৰত বাৰে বাৰে আক্ৰমণ কৰাৰ অভিযোগ উত্থাপিত হৈছে। শীৰ্ষ আদালতখনে লগতে কয় যে এজন নিৰ্দিষ্ট ব্যক্তিক আক্ৰমণ কৰাৰ অৰ্থ সেই সম্প্ৰদায়ক আঘাত কৰা নহয়। কিন্তু এই সন্দৰ্ভত এখন ৰাজহুৱা স্বাৰ্থৰ আবেদন দাখিল কৰা হৈছে। সেইকাৰণে অভিযোগবোৰ ফঁহিয়াই চোৱা প্ৰয়োজন।
লগতে পঢ়ক: কণ্ঠশিল্পী কল্পনা পাটোৱাৰীৰ বিৰুদ্ধে মানহানিৰ গোচৰ ৰুজু
ছলিচিটৰ জেনেৰেল তুষাৰ মেহতাই শীৰ্ষ আদালতক জনায় যে অভিযোগসমূহৰ বেছিভাগেই মিছা। ব্যক্তিগত স্বাৰ্থৰ বাবে এনে অভিযোগ দাখিল কৰা হৈছে। দৰাচলতে, এনে ধৰণৰ অভিযোগ উত্থাপন কৰি দেশৰ শান্তি বিঘ্নিত কৰাৰ চেষ্টা কৰা হৈছে। দেশৰ বাহিৰৰ শক্তিয়ে যাতে আভ্যন্তৰীণ বিষয়ত হস্তক্ষেপ কৰিব পাৰে তাক নিশ্চিত কৰিবলৈকে মিছা অভিযোগ দাখিল কৰা হৈছে। সেয়েহে আদালতে যেন ৰাজহুৱা স্বাৰ্থৰ আবেদনৰ ভিত্তিত বিচাৰ নকৰে।
কেন্দ্ৰীয় গৃহ মন্ত্ৰালয়ে দুমাহৰ ভিতৰত সংশ্লিষ্ট ৰাজ্যসমূহৰ পৰা প্ৰতিবেদন সংগ্ৰহ কৰিব লাগিব। তাৰ পিছত সেই প্ৰতিবেদন আদালতত দাখিল কৰিব লাগিব। উচ্চতম ন্যায়ালয়ে ইয়াৰ পূৰ্বে অভিযোগবোৰ চোৱাচিতা কৰিবলৈ ন’ডেল বিষয়া নিযুক্ত কৰিছিল। তথাপি এনে ঘটনা কিয় ঘটিছে তাক লৈ চিন্তিত শীৰ্ষ আদালত।
লগতে পঢ়ক: স্বাধীনতাৰ ৭৫ বছৰৰ পিছতো বাঁহৰ দলঙেই যাতায়তৰ মাধ্যম; কেতিয়া হ’ব ‘সবকা সাথ সবকা বিকাশ’?
উল্লেখ্য যে বুধবাৰে দুৰ্বৃত্তই পঞ্জাৱৰ এটা গীৰ্জাত আক্ৰমণ কৰি যীচু আৰু মেৰীৰ মূৰ্তি ভাঙি দিছিল। লগতে যাজকৰ গাড়ীখনো জ্বলাই দিয়া হৈছিল। কিন্তু এতিয়ালৈকে এই অভিযোগত এতিয়ালৈকো কাৰো বিৰুদ্ধে কোনো শাস্তিমূলক ব্যৱস্থা লোৱা হোৱা নাই।
