ছাশাৰ পিছত এইবাৰ উদয়। দক্ষিণ আফ্ৰিকাৰ পৰা কুনো ৰাষ্ট্ৰীয় উদ্যানলৈ অনা আন এটা চিতা বাঘৰ মৃত্যু হৈছে। মধ্যপ্ৰদেশৰ বন বিভাগে এই খবৰ নিশ্চিত কৰিছে। ইয়াৰ ফলত এটা মাহৰ ভিতৰতে উদ্যানখন লৈ অনা দুটাকৈ চিতা মৃত্যুমুখত পৰিল।
দেওবাৰে বন সংৰক্ষক জে এছ চৌহানে কয়, “দক্ষিণ আফ্ৰিকাৰ পৰা অনা উদয় নামৰ আন এটা চিতাৰ মৃত্যু হৈছে। চিতাটো অসুস্থ হৈ পৰিছিল। চিকিৎসা চলি আছিল। কিন্তু জীৱন ৰক্ষা কৰিব পৰা নগ’ল। অৱশ্যে মৃত্যুৰ সঠিক কাৰণ এতিয়াও জানিব পৰা হোৱা নাই।”
লগতে পঢ়ক: IPL-2023: চেন্নাইৰ ৰাণৰ পাহাৰ দেখি আত্মসমৰ্পণ কলকাতাৰ! ইডেনত ধোনীৰ দপদপনি, নতশিৰ ৰাণা
জানিব পৰা মতে, দেওবাৰে পুৱা চিতাটো অসুস্থ হোৱাটো ৰাষ্ট্ৰীয় উদ্যানখনৰ কৰ্মচাৰীয়ে লক্ষ্য কৰে। লগে লগে তাক চিকিৎসা কেন্দ্ৰলৈ লৈ যোৱা হয়। দুপৰীয়া চাৰি বজাত উদয়ে তাতেই প্ৰাণ হেৰুৱায়। সোমবাৰে মৰণোত্তৰ পৰীক্ষা কৰা হ’ব। তেতিয়াহে মৃত্যুৰ কাৰণ স্পষ্ট হ’ব।
দেশত চিতাৰ সংখ্যা বৃদ্ধি কৰা লক্ষ্য আছিল। যাৰ বাবে যোৱা বছৰ নামিবিয়াৰ পৰা ৭টা চিতা বিমানেৰে লৈ অনা হৈছিল। ফেব্ৰুৱাৰী মাহত দক্ষিণ আফ্ৰিকাৰ পৰা আন এক ডজন চিতা অনা হৈছিল। চিতাকেইটা মধ্য প্ৰদেশৰ কুনো ৰাষ্ট্ৰীয় উদ্যানত ৰখা হয়। মহা আড়ম্বৰেৰে সেই কাম প্ৰধানমন্ত্ৰী নৰেন্দ্ৰ মোডীৰ হাতেৰে সম্পন্ন হৈছিল।
লগতে পঢ়ক: NCERT পাঠ্যক্ৰমৰ দশম শ্ৰেণীৰ বিজ্ঞানৰ কিতাপৰ পৰা আঁতৰিল ডাৰউইন! পত্ৰ লিখি প্ৰতিক্ৰিয়া বিজ্ঞানীৰ
উদয় সেই ১২টা নাহৰফুটুকীৰ ভিতৰত অন্যতম আছিল। ইয়াৰ পূৰ্বে মাইকী চিতা ছাশাৰ মৃত্যু হৈছিল। দুটা চিটাৰ মৃত্যুৰ বাবে কুনো ৰাষ্ট্ৰীয় উদ্যানত চিতাৰ সংখ্যা ১৮টালৈ হ্ৰাস পাইছে।
