কান্ধৰ পৰা প্ৰায় বিচ্ছিন্ন হৈ পৰা মূৰটো পুনৰ জোৰা লগোৱা হ’ল! জীৱন্তে ঘৰলৈ উভতিল এগৰাকী নাবালক! কেৱল সেয়াই নহয়, কোনো সহায় নোলোৱাকৈ তেওঁ খোজ কাঢ়িও ফুৰিছে! হয়, আপুনি ঠিকেই পঢ়িছে। বিশ্বাস কৰিব নোৱাৰা যেন লাগিলেও এয়া সঁচা। ইজৰাইলৰ চিকিৎসকে এইটো অসম্ভৱ কৰি তুলিছে। এনে এটা চাঞ্চল্যকৰ ঘটনা শেহতীয়াকৈ পোহৰলৈ আহিছে।
বাতৰি অনুসৰি, এক ভয়ংকৰ দুৰ্ঘটনাত চুলেমান হাছান নামৰ ১২ বছৰীয়া ল’ৰা এটাৰ ডিঙি আৰু মূৰ প্ৰায় সম্পূৰ্ণৰূপে পৃথক হৈ পৰে। সেই পৰিস্থিতিত ল’ৰাজনক বিমানযোগে ইজৰাইলৰ হাদাছাহ মেডিকেল চেণ্টাৰলৈ লৈ যোৱা হয়। তাৰ পিছত তেওঁক জৰুৰীকালীন অস্ত্ৰোপচাৰৰ বাবে ক্ষীপ্ৰতাৰে প্ৰেৰণ কৰা হয়।
লগতে পঢ়ক: ৰাজপথত আঁঠুকাঢ়ি ক্ষমা প্ৰাৰ্থনা; যুৱতীলৈ ‘অশ্লীল’ মেচেজ প্ৰেৰণ কৰা আৰক্ষী বিষয়াক এইবাৰ নিলম্বন
সেই চিকিৎসালয়ৰ অৰ্থপেডিক চাৰ্জন ওহাদ আইনভে কৈছে, “দুৰ্ঘটনাটোত ল’ৰাটোৰ মূৰটো ডিঙিৰ পৰা প্ৰায় সম্পূৰ্ণ বিচ্ছিন্ন হৈ পৰিছিল। ফলত অস্ত্ৰোপচাৰটো অতি জটিল আছিল। আমাৰ কেইবা ঘণ্টা সময় লাগিছিল। ঘাঁত নতুন প্লেট লগাব লগা হ’ল।”
তেওঁ লগতে কয়, ‘’আমাৰ মূল লক্ষ্য আছিল শিশুটিৰ জীৱন ৰক্ষা কৰা। আমাৰ অভিজ্ঞতা আৰু উন্নত চিকিৎসা প্ৰযুক্তিয়ে এই অস্ত্ৰোপচাৰ সফল কৰি তুলিছে। কিন্তু সঁচাকৈয়ে ই এক অলৌকিক ঘটনা। কাৰণ ল’ৰাটোৰ জীয়াই থকাৰ সম্ভাৱনা আছিল ৫০ শতাংশ। কিন্তু সকলো ডাক্তৰে ল’ৰাটোৰ জীৱন বচাবলৈ যুঁজ দিলে।”
যোৱা জুন মাহত সংঘটিত হৈছিল এই ঘটনা। জুলাই মাহৰ আগতে সেই চিকিৎসালয়ৰ চিকিৎসকে এই বিষয়ে কোনো তথ্য দিব বিচৰা নাছিল। শেহতীয়াকৈ চুলেমানক চিকিৎসালয়ৰ পৰা যাবলৈ দিয়া হৈছে। অৱশ্যে তেওঁৰ ডিঙিত ছাৰ্ভাইকেল স্প্লিণ্ট সংলগ্ন হৈ আছে। আগন্তুক দিনতো চুলেমানৰ শাৰীৰিক অৱস্থাৰ ওপৰত চকু ৰাখিব চিকিৎসালয় কৰ্তৃপক্ষই।
এই সন্দৰ্ভত ডাঃ আইনভে কয়, “চুলেমানৰ কোনো স্নায়ুজনিত সমস্যা নাই। শৰীৰত কোনো অস্বাভাৱিকতা নাই। আনকি তেওঁ কোনো ছাপোৰ্ট নোহোৱাকৈ খোজ কাঢ়িবও পাৰিছে।”
লগতে পঢ়ক: মণিপুৰৰ অশান্তিত ইন্ধন থাকিব পাৰে অনুপ্ৰৱেশকাৰীৰ; দাবী মণিপুৰৰ ৰাজ্যপাল উইকেৰ
জানিব পৰা মতে, চুলেমানৰ চাইকেলখনৰ সৈতে এখন গাড়ীৰ সংঘৰ্ষ হৈছিল। সেইবাবেই এই ভয়ংকৰ দুৰ্ঘটনা সংঘটিত হয়। চিকিৎসালয়ৰ পৰা অনাৰ পিছত পিতৃয়ে পুত্ৰক এক মুহূৰ্তৰ বাবেও কাষৰ পৰা এৰি দিয়া নাই। তেওঁ একমাত্ৰ সন্তানটোক সুস্থ কৰি তোলাৰ বাবে চিকিৎসকসকলক আৰু চিকিৎসালয় কৰ্তৃপক্ষক ধন্যবাদ জনাইছে।
