বহু সমীক্ষা অনুসৰি ৰাষ্ট্ৰপতি পদৰ দৌৰত তেওঁ ড’নাল্ড ট্ৰাম্পক পিছ পেলাই গৈছে। ভাৰতীয় মূলৰ কমলা হেৰিছে অৱশেষত ৰিপাব্লিকান প্ৰাৰ্থীক অতিক্ৰমি আমেৰিকাৰ শাসন দখল কৰিবনে নাই সেয়া সময়ে ক’ব। এনে পৰিস্থিতিত মায়া হেৰিছে নিজৰ জ্যেষ্ঠ ভগ্নীৰ প্ৰশংসাত মুখৰ হৈছে। তেওঁ কয় যে তেওঁৰ বাইদেউ কমলাই সামগ্ৰিক গণতন্ত্ৰৰ বাবে যুঁজি দিছে।
আমেৰিকাত ভাৰতীয় মূলৰ লোকসকলে অতি ধুমধামেৰে দেৱালী উদযাপন কৰে। সেই উপলক্ষে এৰিজোনাৰ স্কটছডেলত এক অনুষ্ঠানৰ আয়োজন কৰা হৈছিল। তাত উপস্থিত আছিল মায়া। আমেৰিকাৰ ৰাষ্ট্ৰপতি নিৰ্বাচনলৈ মাত্ৰ দহ দিন বাকী। সেই বিষয়টো মায়াৰ মুখত ওলাই আহে। তেওঁ কয় যে ‘’কমলা গণতন্ত্ৰৰ বাবে যুঁজ দিয়া ব্যক্তি। ক’ৰ পৰা আহিছে সেইটো ডাঙৰ কথা নহয়। যি সুযোগ আপোনাৰ প্ৰাপ্য সেয়া আপুনি পাবই।”
লগতে পঢ়কঃ পিএইচডি কৰিবলৈ অক্সফৰ্ড বিশ্ববিদ্যালয়ক ১ কোটি টকা; শ্বেক্সপীয়েৰক লৈ নহ’ল গৱেষণা, নাকচ ডিগ্ৰী
নিৰ্বাচনৰ প্ৰাকক্ষণত ৰিপাব্লিকান দলৰ ৰাষ্ট্ৰপতি পদৰ প্ৰাৰ্থী ট্ৰাম্পে প্ৰচাৰৰ সময়ত অনুপ্ৰৱেশকাৰীক আৱৰ্জনা বুলি কোৱাৰ অভিযোগ উত্থাপন হৈছে। তেওঁ কয় যে “আমি সঁচাকৈয়ে বিশ্বৰ বাকী অংশৰ বাবে জাবৰৰ পাত্ৰৰ দৰে।” ডেম’ক্ৰেটিক দলৰ প্ৰাৰ্থী কমলা হেৰিছক লৈ ট্ৰাম্পে লগতে কয় যে, “আমেৰিকা সঁচাকৈয়ে বহু লোকৰ বাবে কেৱল ডাম্পিং গ্ৰাউণ্ডহে।”
বহুতে কয় যে ট্ৰাম্পে ঘুৰাই পকাই অনুপ্ৰৱেশকাৰীসকলকে আৱৰ্জনা বুলি কৈছে। পৰ্যবেক্ষক মহলে ভাবে যে মায়াৰ বক্তৱ্যত যেন ট্ৰাম্পকে ‘উত্তৰ’ দিয়া হৈছে।
উল্লেখ্য যে মায়া-কমলাৰ মাতৃ শ্যামলা গোপালন ভাৰতৰ তামিলনাডুৰ পৰা আমেৰিকাৰ বাৰ্কলে বিশ্ববিদ্যালয়ত অধ্যয়ন কৰিবলৈ গৈছিল। পিছলৈ বিয়াৰ পিছত তেওঁলোকে তাত থাকিবলৈ আৰম্ভ কৰে। সিদিনা তেওঁক শ্ৰদ্ধাঞ্জলি জ্ঞাপন কৰে মায়াই।
লগতে পঢ়কঃ আজি জাপানত অনুষ্ঠিত হৈছে নিৰ্বাচন; সংখ্যাগৰিষ্ঠতা নাপাবও পাৰে শাসকীয় দলে!
মন কৰিবলগীয়া যে কেলিফৰ্ণিয়াৰ চিনেটৰ কমলাই ২০২০ চনত আমেৰিকাত এক নতুন ইতিহাসৰ সৃষ্টি কৰিছিল। এগৰাকী কৃষ্ণাংগ মহিলা আমেৰিকাৰ ৰাজনীতিত প্ৰথম উপ-ৰাষ্ট্ৰপতি হিচাপে পৰিগণিত হয়। এইবাৰ তেওঁৱেই হ’বনে আমেৰিকাৰ প্ৰথমগৰাকী কৃষ্ণাংগ মহিলা ৰাষ্ট্ৰপতি? সদ্যহতে ডেম’ক্ৰেটসকলে তাৰেই উত্তৰ বিচাৰিছে।
