বন্দুকৰ গুলীৰ শব্দই জোকাৰি গ’ল মায়া নগৰী মুম্বাই। দুষ্কৃতিকাৰীৰ লক্ষ্য বলীউদৰ প্ৰসিদ্ধ পৰিচালক ৰোহিত শ্বেট্টী। শনিবাৰে (৩১ জানুৱাৰী) নিশাৰ ভাগত তেওঁৰ জুহুৰ ঘৰৰ সন্মুখত চাৰি-পাঁচ ৰাউণ্ড গুলীচালনা কৰা হয়। এই ঘটনাত কোনো লোক হতাহত হোৱা নাই।
এই ঘটনাৰ লগত কোন বা কি জড়িত? কিয় টাৰ্গেট কৰা হ’ল পৰিচালকগৰাকীৰ ঘৰ, তাক লৈ প্ৰশ্ন উত্থাপন হৈছে। এই খবৰ পোৱাৰ লগে লগে মুম্বাই আৰক্ষীৰ ক্ৰাইম ব্ৰাঞ্চ আৰু ফৰেনছিক শাখা ঘটনাস্থলীত উপস্থিত হয়। ঘটনাস্থলী ঘেৰাও কৰি ৰখা হৈছে। তাত কেইবাজনো আৰক্ষীক মোতায়েন কৰা হৈছে। ৰোহিতৰ ঘৰত নিৰাপত্তাও বৃদ্ধি কৰা হৈছে।
সূত্ৰ অনুসৰি, শনিবাৰে পুৱতি নিশা ৰোহিতৰ জুহুৰ ঘৰৰ বাহিৰত ৪-৫ টা বন্দুকৰ গুলীৰ শব্দ শুনা যায়। শব্দ শুনি নিৰাপত্তাৰক্ষীয়ে তালৈ দৌৰি যায়। মুম্বাই আৰক্ষী আয়ুক্ত দেৱেন্দ্ৰ ভাৰতীয়ে জানিবলৈ দিয়া মতে, আৰক্ষীয়ে ঘটনা সন্দৰ্ভত তদন্ত আৰম্ভ কৰিছে। তেওঁৰ ভাষাত ‘ৰোহিত শ্বেট্টীৰ অট্টালিকাত গুলীচালনা কৰিছে দুস্কৃতিকাৰীয়ে। জ’নেল পুলিচ আৰু ক্ৰাইম ব্ৰাঞ্চে এই কাণ্ডৰ তদন্ত আৰম্ভ কৰিছে।’
এই ঘটনাৰ লগত কোন বা কি জড়িত সেই বিষয়ে জানিবলৈ তদন্ত অব্যাহত আছে। বাসগৃহৰ চাৰিওফালৰ পৰা চিচিটিভি ফুটেজো পৰীক্ষা কৰা হৈছে। ঘটনাৰ সময়ত ৰোহিত ঘৰত আছিল নে নাই সেয়া জানিব পৰা হোৱা নাই।
বলীউডৰ অন্যতম সফল পৰিচালক ৰোহিত শ্বেট্টী। বক্স অফিচত লাভ কৰা সফলতাৰ বাবে অনুৰাগীসকলেও তেওঁক ‘ৰোহিত’ উপনাম দিছে। গোলমাল (সকলো ছিকুৱেল), সিংঘম, দিলৱালে, চেন্নাই এক্সপ্ৰেছ আদি হিট ছবিৰ পৰিচালক। বিভিন্ন ৰিয়েলিটি শ্ব’তো তেওঁক বিচাৰক হিচাপে দেখা গৈছে। ফলত ব্যক্তিগতভাৱে ৰোহিত শ্বেট্টীৰ ব্ৰেণ্ড মূল্য অতি উচ্চ।
আৰক্ষীয়ে জনোৱা মতে, গুলীচালনাৰ আঁৰৰ উদ্দেশ্যক লৈ এতিয়াও বিভ্ৰান্তিৰ সৃষ্টি হৈছে। ৰোহিত বা তেওঁৰ পৰিয়ালে এতিয়াও কোনো বিবৃতি প্ৰকাশ কৰা নাই।
দেওবাৰে তেওঁৰ ঘৰৰ সন্মুখত বৃহৎ সংখ্যক আৰক্ষী মোতায়েন কৰা হয়। সামগ্ৰিকভাৱে নিৰাপত্তাও বৃদ্ধি কৰা হৈছে। যোৱা কেইমাহমানৰ ভিতৰত কেইবাজনো চেলিব্ৰিটিক দুষ্কৃতিকাৰীয়ে লক্ষ্য কৰি লৈছে। ২০২৪ চনত ছলমান খানৰ ঘৰৰ সন্মুখত গুলীচালনা সংঘটিত হৈছিল। কমেডিয়ান কপিল শৰ্মাৰ কানাডা কেফেৰ বাহিৰত এক গুলীচালনাৰ ঘটনা সংঘটিত হয়।
যোৱা বছৰৰ আগষ্ট মাহত গুৰুগ্ৰামত থকা ‘বিগ বছ অ’টিটি’ বিজয়ী এলভিছ যাদৱৰ ঘৰলৈ লক্ষ্য কৰি নিৰ্বিচাৰ গুলীচালনা কৰা হৈছিল। কিয় বাৰে বাৰে চেলিব্ৰিটিসকল দুষ্কৃতিকাৰীৰ লক্ষ্য হৈ পৰিছে? সেই সন্দৰ্ভত প্ৰশ্ন উত্থাপন হৈছে। তদুপৰি এনেধৰণৰ ঘটনাই মুম্বাইৰ আইন-শৃংখলাৰ পৰিস্থিতিক লৈও প্ৰশ্ন উত্থাপন কৰে।
