২০২০ চনৰ উত্তৰ-পূব দিল্লী সংঘৰ্ষৰ সৈতে জড়িত বৃহত্তৰ ষড়যন্ত্ৰৰ গোচৰত অভিযুক্ত শ্বাৰ্জিল ইমামক সোমবাৰে দিল্লীৰ এখন আদালতে ১০ দিনৰ বাবে অন্তৱৰ্তীকালীন জামিন প্ৰদান কৰিছে। কাৰ্কাৰডুমা আদালতৰ অতিৰিক্ত অধিবেশন ন্যায়াধীশ সমীৰ বাজপেয়ীয়ে তেওঁৰ ভাতৃৰ বিয়াত উপস্থিত থকাৰ অনুমতি দি এই নিৰ্দেশ জাৰি কৰে। জানিব পৰা মতে ২০ মাৰ্চৰ পৰা ৩০ মাৰ্চলৈকে তেওঁ এই জামিন লাভ কৰিব। ২০২০ চনত গ্ৰেপ্তাৰ হোৱাৰ পাছত যোৱা পাঁচ বছৰৰ ভিতৰত এয়া ইমামৰ প্ৰথমটো জামিন।
বিহাৰৰ জেহানাবাদৰ পৰা গ্ৰেপ্তাৰ হোৱা শ্বাৰ্জিল ইমামৰ বিৰুদ্ধে দিল্লী আৰক্ষীয়ে অভিযোগ উত্থাপন কৰিছিল যে তেওঁ নাগৰিকত্ব সংশোধনী আইনৰ বিৰুদ্ধে কৰা ভাষণসমূহ আছিল অত্যন্ত উচতনিমূলক। এই ভাষণসমূহ ভাইৰেল হোৱাৰ পিছতে দিল্লীৰ লগতে অসম, উত্তৰ প্ৰদেশ, অৰুণাচল প্ৰদেশ আৰু মণিপুৰতো তেওঁৰ বিৰুদ্ধে কেইবাখনো এজাহাৰ দাখিল কৰা হৈছিল। পৰৱৰ্তী সময়ত তেওঁ আৰক্ষীৰ ওচৰত আত্মসমৰ্পণ কৰিছিল আৰু তেতিয়াৰে পৰা তেওঁ কাৰাগাৰত বন্দী হৈ আছিল।
ইমামে আদালতত আবেদন জনাইছিল যে তেওঁৰ ভাতৃৰ বিয়াৰ বাবে তেওঁক ছয় সপ্তাহৰ বাবে জামিন লাগে। তেওঁ উল্লেখ কৰিছিল যে ২২ মাৰ্চৰ পৰা ২৮ মাৰ্চলৈ বিয়াৰ বিভিন্ন অনুষ্ঠান অনুষ্ঠিত হ’ব আৰু অসুস্থ মাকৰ লগত কিছু সময় অতিবাহিত কৰাৰ বাবেও তেওঁক এই সকাহৰ প্ৰয়োজন। অৱশ্যে চৰকাৰী পক্ষই ইয়াৰ তীব্ৰ বিৰোধিতা কৰি যুক্তি দিছিল যে বিয়াত তেওঁৰ উপস্থিতি একেবাৰে বাধ্যতামূলক নহয় আৰু তেওঁৰ মাকৰ স্বাস্থ্যও সিমান সংকটজনক নহয়। তেওঁলোকে ছয় দিনতকৈ অধিক সময় জামিন নিদিবলৈ আদালতক আহ্বান জনাইছিল।
অৱশেষত আদালতে সকলো দিশ বিবেচনা কৰি ১০ দিনৰ বাবে তেওঁক মুকলি কৰি দিয়াৰ সিদ্ধান্ত লয়। অৱশ্যে এই সময়ছোৱাত তেওঁ কেইবাটাও চৰ্ত পালন কৰিব লাগিব। তেওঁ কোনো সাক্ষীৰ সৈতে কথা পাতিব নোৱাৰিব আৰু সংবাদ মাধ্যম বা ছ’চিয়েল মিডিয়াত কোনো ধৰণৰ মন্তব্য আগবঢ়াব নোৱাৰিব। ইয়াৰ উপৰি তেওঁ নিজৰ ফোনটো সদায় অন কৰি ৰাখিব লাগিব আৰু কেৱল নিজৰ ঘৰ আৰু বিবাহ অনুষ্ঠানৰ স্থানতে আৱদ্ধ থাকিব লাগিব। উল্লেখ্য যে এই সমগ্ৰ গোচৰটোত মুঠ ১৮ জন অভিযুক্ত আছে যাৰ ভিতৰত ইতিপূৰ্বে ১১ জনে জামিন লাভ কৰিছে।
