বিগত বৰ্ষৰ ২২ এপ্ৰিলত জম্মু-কাশ্মীৰৰ পেহলগামত ২৬ জন অসামৰিক লোকৰ প্ৰাণহানি ঘটা ভয়ংকৰ সন্ত্ৰাসবাদী আক্ৰমণৰ মূল পৰিকল্পনাকাৰী হিচাপে লস্কৰ-ই-তৈবাৰ মুৰব্বী হাফিজ ছৈয়দক অভিযুক্ত কৰি ৰাষ্ট্ৰীয় অনুসন্ধান সংস্থাই দেওবাৰে এখন পৰিপূৰক অভিযোগনামা দাখিল কৰিছে। জম্মুৰ বিশেষ এন আই এ আদালতত দাখিল কৰা এই অভিযোগনামাত নিষিদ্ধ ঘোষিত সন্ত্ৰাসবাদী সংগঠন লস্কৰ-ই-তৈবা আৰু ইয়াৰ প্ৰক্সি গোট ‘দ্য ৰেজিষ্টেন্স ফ্ৰণ্ট‘ৰ (টি আৰ এফ) মুৰব্বী তথা প্ৰতিষ্ঠাপক হিচাপে আৰু ব্যক্তিগতভাৱেও হাফিজ ছৈয়দক মূল অভিযুক্ত হিচাপে চিহ্নিত কৰা হৈছে।
ৰাষ্ট্ৰীয় অনুসন্ধান সংস্থাই প্ৰকাশ কৰা অনুসৰি সমগ্ৰ আক্ৰমণৰ ষড়যন্ত্ৰ সীমান্তৰ সিপাৰৰ পৰা ৰচনা কৰা হৈছিল। তদন্তকাৰী সংস্থাই লাভ কৰা প্ৰমাণ অনুসৰি হাফিজ ছৈয়দেই পাকিস্তানৰ পৰা সন্ত্ৰাসবাদীসকলক নিৰ্দেশ প্ৰদান কৰাৰ লগতে আক্ৰমণৰ পৰিকল্পনা কৰিছিল আৰু সমগ্ৰ প্ৰক্ৰিয়াটো নিৰীক্ষণ কৰিছিল। এই অপৰাধৰ বাবে তেওঁৰ বিৰুদ্ধে ভাৰতীয় ন্যায় সংহিতা (বি এন এছ), ২০২৩ আৰু বেআইনী কাৰ্যকলাপ (প্ৰতিৰোধ) আইন (ইউ এ পি এ), ১৯৬৭ ৰ কঠোৰ ধাৰাসমূহৰ অধীনত গোচৰ ৰুজু কৰা হৈছে। তেওঁৰ বিৰুদ্ধে ভাৰতৰ বিৰুদ্ধে যুদ্ধ ঘোষণা কৰা আৰু অপৰাধমূলক ষড়যন্ত্ৰত লিপ্ত হোৱাৰ অভিযোগ অনা হৈছে।
নতুনকৈ দাখিল কৰা এই পৰিপূৰক অভিযোগনামাখন হৈছে পূৰ্বৰ ১,৫৯৭ পৃষ্ঠাৰ মূল অভিযোগনামাখনৰ এক সম্প্ৰসাৰিত ৰূপ। ইয়াত আক্ৰমণত পাকিস্তানৰ ভূমিকা, ছৈয়দৰ প্ৰত্যক্ষ জড়িত থকাৰ তথ্য আৰু ঘটনাস্থলীৰ পৰা সংগ্ৰহ কৰা বৈজ্ঞানিক, ফৰেনছিক তথা কাৰিকৰী প্ৰমাণসমূহ বিশদভাৱে বৰ্ণনা কৰা হৈছে। ইয়াৰ পূৰ্বে ২০২৫ চনৰ ১৫ ডিচেম্বৰত এন আই এয়ে দাখিল কৰা প্ৰথমখন অভিযোগনামাত পাকিস্তানত আশ্ৰয় লৈ থকা হেণ্ডলাৰ ছাজিদ জাট, ২০২৫ চনৰ জুলাই মাহত ‘অপাৰেচন মহাদেৱ‘ত নিহত হোৱা তিনিজন সন্ত্ৰাসবাদী, গ্ৰেপ্তাৰ হোৱা দুজন অভিযুক্তৰ লগতে আক্ৰমণৰ পৰিকল্পনা আৰু ৰূপায়ণৰ বাবে নিষিদ্ধ সংগঠন লস্কৰ-ই-তৈবা আৰু টি আৰ এফৰ নাম উল্লেখ কৰিছিল।
উল্লেখযোগ্য যে ২০২৫ চনৰ ২২ এপ্ৰিলত পেহলগামৰ বাইছৰণ উপত্যকাত সন্ত্ৰাসবাদীয়ে পৰ্যটকৰ ওপৰত নিৰ্বিচাৰে গুলীচালনা কৰিছিল। এই জঘন্য আক্ৰমণত ২৫ জন পৰ্যটক আৰু এজন স্থানীয় গাইডকে ধৰি মুঠ ২৬ জন লোক নিহত হৈছিল। ঘটনা সন্দৰ্ভত প্ৰথমে পেহলগাম আৰক্ষী থানাত এখন এজাহাৰ ৰুজু কৰা হৈছিল যদিও প্ৰাথমিক তদন্তৰ অন্তত কেন্দ্ৰীয় গৃহ মন্ত্ৰালয়ে সমগ্ৰ গোচৰটো ৰাষ্ট্ৰীয় অনুসন্ধান সংস্থাৰ হাতলৈ হস্তান্তৰ কৰিছিল। বৰ্তমান ৰাষ্ট্ৰীয় অনুসন্ধান সংস্থাই পাকিস্তানৰ পৰা পৰিচালিত সমগ্ৰ সন্ত্ৰাসবাদী নেটৱৰ্কটো উৎখাত কৰিবলৈ আৰু এই আক্ৰমণৰ আঁৰত থকা সকলো হেণ্ডলাৰ তথা আনুষংগিক সম্পৰ্ক পোহৰলৈ আনিবলৈ নিজৰ তদন্ত প্ৰক্ৰিয়া অব্যাহত ৰাখিছে।
