পঞ্জাৱ নেশ্যনেল বেংক কেলেংকাৰিৰ মূল অভিযুক্ত পলাতক হীৰা ব্যৱসায়ী নীৰৱ মোডীয়ে শেষ আইনী যুঁজত পৰাস্ত হৈছে। ইউৰোপীয় মানৱ অধিকাৰ আদালতে তেওঁৰ আবেদন নাকচ কৰ দিয়াত ভাৰতলৈ তেওঁৰ প্ৰত্যাৰ্পণৰ পথ সম্পূৰ্ণ মুকলি কৰি দিলে।
দীৰ্ঘদিন ধৰি লণ্ডনত আত্মগোপন কৰি থকা নীৰৱ মোদীয়ে ভাৰতলৈ প্ৰত্যাপৰ্ণৰ বিৰুদ্ধে আইনী যুঁজ দি আছিল। মানৱ অধিকাৰ উলংঘাৰ অভিযোগ উত্থাপন কৰি তেওঁ ইউৰোপীয় আদালতত আবেদন জনাইছিল। কিন্তু আদালতে সেই আবেদন নাকচ কৰিলে। এই ৰায়দানৰ লগে লগে ব্ৰিটিছ চৰকাৰে এতিয়া নীৰৱ মোডীক ভাৰতলৈ প্ৰত্যাৰ্পণ কৰাৰ প্ৰক্ৰিয়াটো ক্ষীপ্ৰতাৰে আগুৱাই নিবলৈ সক্ষম হ’ব।
পঞ্জাৱ নেচনেল বেংকত ১৪ হাজাৰ কোটিৰো অধিক ধনৰ জালিয়াতিৰ মূল অভিযুক্ত হৈছে নীৰৱ মোডী। ২০১৮ চনত এই কেলেংকাৰী পোহৰলৈ অহাৰ পিছত তেওঁ পলায়ন কৰে। ভাৰত চৰকাৰে দীৰ্ঘদিন ধৰি তেওঁক প্ৰত্যাৰ্পণৰ চেষ্টা চলাই আহিছিল। কেন্দ্ৰীয় তদন্তকাৰী সংস্থা চিবিআই আৰু বলবৎকাৰী সঞ্চালকালয়ে নীৰৱ মোদীৰ বিৰুদ্ধে একাধিক গোচৰ ৰুজু কৰিছে।
এই গোচৰসমূহত তেওঁৰ বিৰুদ্ধে বহু প্ৰমাণ সংগ্ৰহ কৰা হৈছে। বহুতে এই সফলতাক ভাৰত চৰকাৰৰ কূটনৈতিক প্ৰচেষ্টাত এক বৃহৎ জয় হিচাপে চাইছে। নীৰৱ মোডীক ঘূৰাই অনাৰ বাবে বৈদেশিক পৰিক্ৰমা মন্ত্ৰালয় আৰু ভাৰতৰ দূতাবাসে ব্ৰিটিছ চৰকাৰৰ সৈতে নিয়মীয়াকৈ যোগাযোগ কৰি আছিল। অৱশেষত ইউৰোপীয় আদালতৰ ৰায়দানে সেই প্ৰচেষ্টাক সফলতা প্ৰদান কৰিলে।
কেন্দ্ৰীয় চৰকাৰৰ এগৰাকী জ্যেষ্ঠ বিষয়াই কয়, ‘এয়া কেৱল এজন অভিযুক্তক ঘুৰাই অনা নহয়, দেশৰ ধন আত্মসাৎ কৰাসকলৰ বিৰুদ্ধে আমাৰ দৃঢ় স্থিতিৰ প্ৰমাণ। যদি নীৰৱ মোডীক প্ৰত্যাৰ্পণ কৰা হয়, তেন্তে পিএনবি কেলেংকাৰিৰ গোচৰত ডাঙৰ অগ্ৰগতি হ’ব। এই কেলেংকাৰিৰ ফলত লাখ লাখ জমাকাৰী ক্ষতিগ্ৰস্ত হৈছিল। বহু ক্ষুদ্ৰ ব্যৱসায়ী আৰু সাধাৰণ মানুহৰ সঞ্চয় হেৰাই গৈছিল।
সেয়ে নীৰৱ মোডীৰ উভতি অহাৰ খবৰে ক্ষতিগ্ৰস্তসকলক কিছু সকাহ দিছে। এই ঘটনাক ‘পলাতক অৰ্থনৈতিক অপৰাধী’ৰ বিৰুদ্ধে চৰকাৰৰ অভিযানৰ সফলতা হিচাপেও দেখা গৈছে। ইয়াৰ পূৰ্বে মেহুল চোক্সি আৰু ছেণ্ড্ৰা লাৰ্চেনকে ধৰি কেইবাজনো অভিযুক্তক ঘূৰাই অনা হৈছে। নীৰৱ মোডীৰ ক্ষেত্ৰতো একেই সফলতা লাভ কৰা হৈছে।
