ইটালী আৰু এচি মিলানৰ কিংবদন্তি ফুটবলাৰ ফ্ৰাংকো বাৰেচিৰ মৃত্যু ঘটিছে। তেওঁৰ বয়স আছিল মাত্ৰ ৬৬ বছৰ। ১৯৮২ চনত ইটালীৰ বিশ্বকাপ জয়ী দলৰ সদস্য আছিল বাৰেচি। ১৯৯৪ চনৰ বিশ্বকাপত ইটালীৰ অধিনায়ক আছিল। ইয়াৰ উপৰিও ১৯৮০ আৰু নব্বৈৰ দশকত মিলানৰ হৈ তিনিটা ইউৰোপীয় কাপ (চেম্পিয়নছ লীগ) আৰু ছটা ইটালীয় লীগৰ খিতাপ দখলতো বাৰেচি আছিল স্মৰণীয় যোদ্ধা।
বহুতৰে বাবে বাৰেচি সৰ্বকালৰ অন্যতম শ্ৰেষ্ঠ ডিফেণ্ডাৰ। তেওঁৰ মৃত্যুৰ খবৰ নিশ্চিত কৰিছে এচি মিলানে। কেনেকৈ বা কি ৰোগত বাৰেচিৰ মৃত্যু হ’ল সেয়া এতিয়াও জানিব পৰা হোৱা নাই। কিংবদন্তি ডিফেণ্ডাৰগৰাকীৰ মৃত্যুৰ খবৰে স্তম্ভিত কৰি তুলিছে ফুটবল জগতক।
১৯৬০ চনত জন্মগ্ৰহণ কৰা বাৰেচিয়ে ১৯৭৭ চনত এ চি মিলানত কেৰিয়াৰ আৰম্ভ কৰিছিল। তেওঁ ২০ বছৰীয়া দীঘলীয়া কেৰিয়াৰত কেবল সেই ক্লাবৰ হৈয়ে খেলিছিল তেওঁলোকৰ ‘কাপিতানো’।
ৰঙা-ক’লা জাৰ্চি পিন্ধি তেওঁ ৫৩২খন খেল খেলিছিল। লগতে তেওঁৰ ১৬টা গ’ল আছে। ১৯৮২ চনৰ পৰা ১৯৯৪ চনলৈ ইটালীৰ হৈ ৮১খন খেল খেলিছিল। ১৯৮২ চনত ইটালীৰ বিশ্বকাপ বিজয়ী দলৰ সদস্য আছিল যদিও খেলাৰ সুযোগ নাপালে। ১৯৯৪ চনৰ বিশ্বকাপত ইটালী দলৰ অধিনায়ক আছিল। য’ত টাইব্ৰেকাৰত ফাইনেলত ব্ৰাজিলৰ হাতত পৰাস্ত হৈছিল। সেই মেচখনত ৰবাৰ্ট’ বাজিঅ’ৰ টাইব্ৰেকাৰ মিছ কৰাটো সকলোৰে মনত আছে। অৱশ্যে বাৰেচিয়েই প্ৰথম পেনাল্টি মিছ কৰে।
মাত্ৰ ২২ বছৰ বয়সতে তেওঁ এ চি মিলানৰ অধিনায়ক হৈছিল।তেওঁৰ উৎকৃষ্ট কৌশল, বিপক্ষৰ পৰিকল্পনা আগতীয়াকৈ বুজিব পৰা ক্ষমতা আৰু নিখুঁত টেকেলিঙৰ লগতে নেতৃত্বৰ বাবেও তেওঁ কিংবদন্তি হৈ পৰিছিল। মিলানত তেওঁক প্ৰথমে ‘পিচকিনিন’ (সৰু এজন) বুলি কোৱা হৈছিল। পিছলৈ জাৰ্মানীৰ ফ্ৰাঞ্জ বেকেনবাউৰৰ সৈতে তুলনা কৰি তেওঁক ‘কাইজাৰ ফ্ৰাঞ্জ’ বুলি কোৱা হয়। আনকি কেৰিয়াৰৰ শেষৰ সময়ছোৱাতো যুৱ খেলুৱৈ পাওলো মালডিনি আৰু এলেছান্দ্ৰ’ কোষ্টাকাৰ্ট’ৰ সৈতে যুটী বান্ধি ৰক্ষণ বিভাগ চম্ভালিছিল।
বাৰেচিৰ মৃত্যুৰ কোনো কাৰণ দিয়া হোৱা নাই। এবছৰ পূৰ্বে হাওঁফাওঁৰ টিউমাৰ আঁতৰাবলৈ তেওঁৰ অস্ত্ৰোপচাৰ কৰা হৈছিল। তেতিয়াৰ পৰা ৰাজহুৱা স্থানত তেওঁক তেনেকৈ দেখা পোৱা নগৈছিল।
কিছুদিন পূৰ্বে বাৰেচিৰ মৃত্যুৰ খবৰ ৰাজহুৱা হৈছিল। সেই সময়ত এ চি মিলানে এই উৰাবাতৰি খাৰিজ কৰিছিল। এইবাৰ আৰু উৰাবাতৰি নহয়, ইটালীৰ কিংবদন্তি সঁচাকৈয়ে উভতি নহাৰ দেশলৈ গুচি গ’ল।
