দীৰ্ঘ ৫২ বছৰৰ অপেক্ষাৰ অন্ত পৰিল। মধ্যপ্ৰদেশৰ ইন্দোৰৰ এটা পৰিয়ালত জন্ম হৈছে এগৰাকী নৱজাত কন্যাসন্তানৰ। বিগত পাঁচ দশকতকৈও অধিক সময় ধৰি এই পৰিয়ালটোত কোনো কন্যা সন্তানৰ জন্ম হোৱা নাছিল। অৱশেষত এই দীৰ্ঘদিনীয়া অপেক্ষাৰ অন্ত পৰাত সমগ্ৰ পৰিয়ালটোতে সৃষ্টি হৈছে অপাৰ আনন্দৰ। ঘৰৰ এই নতুন অতিথিগৰাকীক আদৰিবলৈ পৰিয়ালৰ লোকে কৰা উল্লাসৰ দৃশ্য এতিয়া সামাজিক মাধ্যমত বহুলভাৱে চৰ্চিত হৈ পৰিছে।
জানিব পৰা মতে, স্ত্ৰীৰোগ বিশেষজ্ঞ ডা° বেলা শ্বাহ জৈনে নিজৰ ইনষ্টাগ্ৰাম একাউণ্টৰ পৰা এই সমগ্ৰ ঘটনাৰ এটা ভিডিঅ’ শ্বেয়াৰ কৰিছিল। এই ভিডিঅ’টোত দেখা গৈছে যে হাস্পতালৰ অস্ত্ৰোপচাৰ কক্ষৰ বাহিৰত পৰিয়ালৰ লোকসকলে অতি উদ্বেগ আৰু আগ্ৰহেৰে অপেক্ষা কৰি আছিল। যেতিয়া চিকিৎসকে নৱজাত কন্যাসন্তানটিক কোলাত লৈ বাহিৰলৈ ওলাই আহে আৰু এগৰাকী জীয়াৰী জন্ম হোৱা বুলি খবৰ দিয়ে, তেতিয়াই পৰিয়ালৰ প্ৰতিগৰাকী সদস্য আনন্দত আৱেগিক হৈ পৰিল। খবৰটো শুনাৰ লগে লগে সকলোৰে চকুত ভৰি পৰিল আনন্দৰ চকুপানী।
জীয়াৰী জন্ম হোৱা বুলি জানিব পাৰি পৰিয়ালৰ সকলোৱে হাস্পতালৰ ভিতৰতেই ইজনে সিজনক সাৱটি ধৰি অপাৰ আনন্দ প্ৰকাশ কৰে। চিকিৎসাগৰাকীয়ে ভিডিঅ’টোৰ কেপশ্বনত লিখে যে কিছুমান অলৌকিক ঘটনা ঘটিবলৈ কেইবাটাও প্ৰজন্ম পাৰ হৈ যায়। ৫২ বছৰৰ পাছত এই পৰিয়াললৈ এগৰাকী কন্যাসন্তান আহিল, যিটো সমগ্ৰ পৰিয়ালটোৰ বাবে চিৰদিন মনত ৰখাৰ দৰে এক বিশেষ মুহূৰ্ত।
সামাজিক মাধ্যমত এই ভিডিঅ’টো প্ৰকাশ পোৱাৰ পাছৰে পৰা নেটিজেন সকলৰ মন জয় কৰিবলৈ সক্ষম হৈছে। কন্যাসন্তানৰ জন্মক লৈ সমাজৰ এনে ইতিবাচক চিন্তা দেখি বহুতো লোকে আনন্দ প্ৰকাশ কৰিছে। ল’ৰা-ছোৱালীৰ ভেদাভেদ পাহৰি এটা পৰিয়ালে কেনেদৰে মৰমেৰে নতুন অতিথিক আদৰণি জনাইছে, তাক দেখি বহুজনে মন্তব্য কৰিছে যে এই দৃশ্য সঁচাকৈয়ে হৃদয় স্পৰ্শ কৰা ধৰণৰ। বৰ্তমান এই ভাইৰেল ভিডিঅ’টোৱে সামাজিক মাধ্যমত সকলোৰে দৃষ্টি আকৰ্ষণ কৰিছে।
