পৰ্তুগালৰ ফুটবল তাৰকা ক্ৰিষ্টিয়ানো ৰোনাল্ডো কেৱল ফুটবল জগতৰে নহয়, বৰঞ্চ বিশ্বৰ বিভিন্ন ক্ৰীড়াৰ খেলুৱৈসকলৰ বাবেও এক অন্যতম অনুপ্ৰেৰণাৰ উৎস। শেহতীয়াকৈ কমনৱেলথ গেমছৰ জুডোটো ভাৰতৰ হৈ প্ৰথমটো সোণৰ পদক অৰ্জন কৰি ইতিহাস ৰচা অস্মিতা দে’য়েও তেওঁৰ এই ঐতিহাসিক সফলতাৰ আঁৰত ৰোনাল্ডোৰ জীৱন সংগ্ৰামৰ অৱদান থকা বুলি প্ৰকাশ কৰিছে।
মহিলাৰ -৪৮ কিলোগ্ৰাম শাখাৰ ফাইনেল মেচত অস্মিতাই কানাডাৰ হেইডি কুৱাচক পৰাস্ত কৰি এই সোণৰ পদকটো দখল কৰে। মেচখনৰ নিৰ্ধাৰিত সময়ত দুয়োগৰাকী খেলুৱৈয়ে সমতা স্থাপন কৰাৰ পাছত ‘গ’ল্ডেন স্ক’ৰ’ ৰাউণ্ডৰ জৰিয়তে মেচৰ ফলাফল নিৰ্ণয় কৰা হয়। ফাইনেলত অস্মিতাই ‘য়ুকো’ পইণ্টৰ আধাৰত ২-১ ব্যৱধানত জয়লাভ কৰে। মেচৰ আৰম্ভণিতে কানাডাৰ খেলুৱৈগৰাকীয়ে অগ্ৰগতি লাভ কৰিছিল যদিও অস্মিতাই দৰ্শনীয় প্ৰত্যাৱৰ্তন ঘটাই সমতা স্থাপন কৰে। পৰৱৰ্তী সময়ত ‘গ’ল্ডেন স্ক’ৰ’ ৰাউণ্ডত অস্মিতাই নিৰ্ণায়ক পইণ্ট অৰ্জন কৰে আৰু ভাৰতলৈ গৌৰৱ কঢ়িয়াই আনে।
ছনী স্প’ৰ্টছ নেটৱৰ্কে শ্বেয়াৰ কৰা এটা ভিডিঅ’ত নিজৰ আদৰ্শৰ বিষয়ে উল্লেখ কৰি অস্মিতাই কয় যে তেওঁ আটাইতকৈ বেছি ক্ৰিষ্টিয়ানো ৰোনাল্ডোৰ বিষয়ে পঢ়ে আৰু তেওঁৰ খেল চায়। ৰোনাল্ডোৱে নিজৰ জীৱনত কৰা কঠোৰ সংগ্ৰামৰ কথা উল্লেখ কৰি অস্মিতাই কয় যে মাত্ৰ ১৯ বছৰ বয়সতে পিতৃহাৰা হোৱাৰ পাছতো তেওঁ বিশ্বৰ শ্ৰেষ্ঠ খেলুৱৈ হিচাপে পৰিগণিত হ’ল আৰু আজি সমগ্ৰ বিশ্বই তেওঁক চিনি পায়। ৰোনাল্ডোৰ সমগ্ৰ জীৱন কাহিনী আৰু যাত্ৰাই অস্মিতাক আটাইতকৈ বেছি অনুপ্ৰাণিত কৰে বুলি খেলুৱৈগৰাকীয়ে জানিবলৈ দিয়ে।
অস্মিতাৰ এই ঐতিহাসিক সফলতাৰ লগতে আন ভাৰতীয় জুডো খেলুৱৈসকলেও প্ৰতিযোগিতাখনত সুন্দৰ প্ৰদৰ্শন দাঙি ধৰে। হৰ্ষ সিঙে সোণৰ পদক, যামিনী মৌৰ্যই ৰূপৰ পদক আৰু উন্নতি শৰ্মাই ব্ৰঞ্জৰ পদক অৰ্জন কৰি কমনৱেলথ গেমছত ভাৰতৰ জুডোৰ পদকৰ সংখ্যা চাৰিটালৈ বৃদ্ধি কৰে।
