বোকাখাতৰ ৰাষ্ট্ৰীয় পথত ই ৰিক্সা চলাচলত বাধা আৰোপ কৰা প্ৰশাসনীয় নিষেধাজ্ঞা বাতিল কৰাৰ বাবে জীপাল ই ৰিক্সা সন্থাই বৃহস্পতিবাৰে মহকুমাধিপতিৰ সৈতে আলোচনাত মিলিত হৈ এক পাঁচদফীয়া স্মাৰক পত্র প্ৰদান কৰে৷
বিশ্বজুৰি যান-বাহনজাত প্ৰদূষণ মানৱ সভ্যতাৰ কাৰণে ভাবুকি হৈ উঠাৰ পৰত বেটাৰিচালিত ই ৰিক্সাক ‘পৰিৱেশৰ বন্ধু বাহন’ৰূপে অভিহিত কৰি সন্থাই কয় যে এই সেৱা বন্ধ কৰাটো বোকাখাতৰ ৰাইজৰ ওপৰতে মাধমাৰসদৃশ।
‘ই ৰিক্সাৰ ক্ষেত্ৰত বোকাখাতত প্ৰশাসনে আৰোপ কৰা বাধ্যবাধকতা সৰ্বসাধাৰণ জনতাৰ ওপৰতেই এক মাধমাৰ,’ প্ৰশাসনীয় নিষেধাজ্ঞাৰ ‘এক উচ্চস্তৰীয় তদন্ত’ দাবী কৰি স্মাৰক পত্ৰত মন্তব্য সন্থাৰ।
অহা ১৯ ছেপ্তেম্বৰত গোলাঘাট জিলাৰ পৰিবহণ বিষয়াৰ উপস্থিতিত বোকাখাত মহকুমা প্ৰশাসন, বোকাখাত আৰক্ষী আৰু ট্ৰেফিকৰ উপৰি বিদ্যুৎ বিভাগৰ বিষয়া, বিভিন্ন দল-সংগঠন, সাংবাদিক, জীপাল ই ৰিক্সা সন্থা আৰু বোকাখাত ই ৰিক্সা সন্থাক লৈ ই ৰিক্সা সন্দৰ্ভত এক আলোচনা অনুষ্ঠিত কৰাৰ বাবে মহকুমাধিপতিৰে হোৱা আলোচনাত সিদ্ধান্ত গ্ৰহণ কৰা হয়৷
১৯ ছেপ্তেম্বৰৰ আলোচনালৈকে বোকাখাতত ই ৰিক্সাসমূহক পূৰ্বৰ দৰেই চলাচল কৰাৰ অনুমতি দিয়াৰ বাবে মহকুমাধিপতিক অনুৰোধ জনোৱা হয়৷ সন্থাই বোকাখাতৰ ভাৰপ্ৰাপ্ত আৰক্ষী বিষয়াকো স্মাৰক পত্রৰ প্ৰতিলিপি প্ৰদান কৰে৷
মহকুমাধিপতিৰে হোৱা আলোচনাত জীপাল কৃষক শ্ৰমিক সংঘৰ সোণেশ্বৰ নৰহ, প্ৰণৱ দলে, পুতুল নৰহ আৰু জীপাল ই ৰিক্সা সন্থাৰ সদস্যসকল, বোকাখাত ই ৰিক্সা সন্থাৰ সভাপতি বিজয় কুটুমৰ লগতে ভাৰতীয় যুৱ মৰ্চাৰ ৰাজ্যিক সদস্য আকাশ ফুকন আৰু বোকাখাত প্ৰেছ ক্লাবৰ সম্পাদক উত্তম শইকীয়াও উপস্থিত আছিল৷
