বিজেপি উত্থাপিত নাগৰিকত্ব বিধেয়কে বৰাক-ব্ৰহ্মপুত্ৰ দুফাল কৰিব খোজাৰ বিপৰীতে বাঙালী অধ্যুষিত উপত্যকাটোৰ বাবে ভাৰত চৰকাৰক বিশেষ আৰ্থিক সাহায্যৰ দাবী জনাইছে আলোচনাৰত আলফাই।
ভাৰত চৰকাৰৰ সৈতে চলিত শান্তি আলোচনাৰ মঙলবাৰে নতুন দিল্লীত হোৱা বৈঠকৰ পিছতে দাবী চনদত এই বিষয়টো থকা বুলি সদৰী কৰিছে আলফা নেতা অনুপ চেতিয়াই।
“আমাৰ দাবী চনদত বৰাকৰ উন্নয়নৰ বাবে বিশেষ আৰ্থিক সাহায্যৰ দাবীও আছে,” অসমত শেহতীয়াকৈ ধ্বনিত হোৱা ‘পৃথক বৰাক’ৰ দাবীক অগ্ৰাহ্য কৰি নতুন দিল্লীত সাংবাদিকৰ আগত এই মন্তব্য চেতিয়াৰ।
লগতে পঢ়ক– আলফাৰ তিনিওটা প্ৰধান দাবীতে প্ৰশ্নবোধক চিন আনিছে বিজেপি উত্থাপিত নাগৰিকত্ব বিধেয়কে
সদৌ কাছাৰ কৰিমগঞ্জ হাইলাকান্দি ছাত্ৰ সন্থাৰ (ACKHSA) প্ৰতিষ্ঠাপক সভাপতি, বৰাকৰ প্ৰভাৱশালী নেতা তথা অধিবক্তা প্ৰদীপ দত্ত ৰয়ে বিধেয়ক গৃহীত নহ’লে ‘পৃথক বৰাক’ৰ দাবীত সোচ্চাৰ হৈছে।
দত্ত ৰয়ৰ দাবী অগ্ৰাহ্য কৰি আলফা নেতাজনে লগতে কয়, “আমি অসমৰ আৰু বিভাজন নিবিচাৰো, কাৰণ ই ৰাজ্যখনৰ উন্নয়ন বাধাগ্ৰস্ত কৰিব।”
শান্তি আলোচনাৰ মঙলবাৰৰ বৈঠকত ভাৰত চৰকাৰৰ মধ্যস্থতাকাৰী এ বি মাথুৰ, অসম চৰকাৰৰ প্ৰতিনিধি ৰাজ্যৰ আৰক্ষীৰ বিশেষ শাখাৰ বিশেষ সঞ্চালক প্ৰধান পল্লৱ ভট্টাচাৰ্য্য আৰু আলফাৰ অনুপ চেতিয়া, শশ চৌধুৰী, চিত্ৰবন হাজৰিকা আৰু ৰাজু বৰুৱাই অংশগ্ৰহণ কৰে।
