কেন্দ্ৰীয় মন্ত্ৰী ৰাজেন গোহাঁইৰ বিৰূদ্ধে উত্থাপিত মহিলাক যৌন নিৰ্যাতনৰ অভিযোগক লৈ ৰাজ্যত ব্যাপক চৰ্চা অব্যাহত আছে। এই ঘটনাৰ উচিত তদন্ত কৰাৰ দাবীত ৰাজ্যৰ বিভিন্ন দল-সংগঠনে বিভিন্ন স্থানত প্ৰতিবাদ সাব্যস্ত কৰিছে।
কিন্তু তৎসত্বেও চৰকাৰ তথা আৰক্ষী-প্ৰশাসনে এই ঘটনাৰ তদন্তৰ কোনো ব্যৱস্থা গ্ৰহণ কৰা নাই। শাসকীয় দলৰ প্ৰভাৱশালী মন্ত্ৰী হোৱা হেতুকেই এই অভিযোগ এৰাই চলা বুলিও চৰ্চিত হৈছে।
গোহাঁইৰ বিৰুদ্ধে এই অভিযোগ সন্দৰ্ভত অসম ৰাজ্যিক মহিলা আয়োগেও অৱলম্বন কৰি আছে সম্পূৰ্ণ নিৰৱতা। এই অভিযোগ বিধান সভাৰ বিৰোধী দলপতি দেৱব্ৰত শইকীয়াৰ।
শইকীয়াই কয়, ‘’আমাৰ ৰাজ্যৰ মহিলা আয়োগে এই সন্দৰ্ভত কোনো মন্তব্য প্ৰকাশ কৰা নাই। ৰাজ্যিক বিজেপিয়েও কোনো মতামত আগবঢ়োৱা নাই। তাৰ বিপৰীতে এক বোকা চটিওৱা ৰাজনীতি চলাই থকা দেখা গৈছে। কিন্তু এনেদৰে প্ৰকৃত সত্য প্ৰকাশ নাপায়। গতিকে ৰাজ্যিক মহিলা আয়োগে এই ঘটনাৰ তদন্তৰ বাবে চৰকাৰলৈ পৰামৰ্শ আগবঢ়াব লাগে।’’
শইকীয়াই এই ঘটনাৰ এক ন্যায়িক তদন্ত হ’ব লাগে বুলি কোৱাৰ লগতে এইক্ষেত্ৰত মহিলা আয়োগে আগভাগ ল’ব লাগে বুলিও মন্তব্য কৰে।
কিন্তু এই সন্দৰ্ভত অসম ৰাজ্যিক মহিলা আয়োগৰ লগত যোগাযোগ কৰাত আয়োগৰ অধ্যক্ষা চিকিমিকি তালুকদাৰে কয়, ‘’আমি এতিয়ালৈ কাৰো পৰাই এই ঘটনাৰ অভিযোগ লাভ কৰা নাই। গতিকে কোনো অভিযোগ নোপাৱাকৈ আমি নিজে এইক্ষেত্ৰত আগবাঢ়িব নোৱাৰো। কোনোবাই যদি আমাৰ ওচৰত অভিযোগ দাখিল কৰে তেতিয়া বিষয়টো নিশ্চয়কৈ বিবেচনা কৰা হ’ব।’’
মনকৰিবলগীয়া যে, এই ঘটনাৰ পাছত মন্ত্ৰী গোঁহাইৰ বিৰুদ্ধে নিৰ্য্যাতিতা মহিলাগৰাকী আৰু তেওঁৰ স্বামীয়ে গোচৰ তৰিছিল যদিও মন্ত্ৰীজনৰ মানুহৰ ভয়-ভাবুকিত গোচৰটো উঠাই লৈছিল বুলি বিভিন্নজনৰ বক্তব্যত প্ৰকাশ পাইছিল।
ইপিনে, শেহতীয়াভাৱে মহিলাগৰাকীৰ স্বামীয়ে মন্ত্ৰীজনৰ বিৰুদ্ধে পুনৰ গোচৰ চলাই যাম বুলি ঘোষণা কৰাৰ পাছতে স্থানীয় লোকে ৩০ অক্টোবৰত নিৰ্য্যাতিতাৰ ঘৰ ঘেৰাও কৰিছিল। আনকি মহিলাগৰাকীৰ পৰিয়ালক সামাজিকভাৱে বৰ্জন কৰাৰ লগতে অহা ১০ দিনৰ ভিতৰত স্বামী-স্ত্ৰীক উক্ত গাঁও ত্যাগ কৰাৰো দাবী জনায়।
মহিলাগৰাকীৰ লগতে পৰিয়ালটোৰ ক্ষেত্ৰত এনে এক ভয়াৱহ পৰিস্থিতিৰ সৃষ্টি হোৱাৰ সময়ত এই ঘটনাক লৈ প্ৰতিবাদ সাব্যস্ত কৰা দল-সংগঠন সমুহে ৰাজ্যিক মহিলা আয়োগৰ কাষ চপাৰো নিশ্চয়কৈ প্ৰয়োজন আছিল।
এই বিষয়ত কৃষক শ্ৰমিক উন্নয়ন পৰিষদৰ সভাপতি প্ৰদীপ কলিতাৰ লগত যোগাযোগ কৰাত তেওঁ কয়, ‘’আমি এই কথাটো চিন্তা কৰিছো। কাইলৈ আমি কেইবাটাও সংগঠনে ৰাজ্যিক মহিলা আয়োগত এক অভিযোগ দাখিল কৰিম।‘’
কেন্দ্ৰীয় মন্ত্ৰী ৰাজেন গোহাঁইৰ বিৰুদ্ধে উত্থাপিত অভিযোগৰ তদন্ত বৰ্তমানলৈ আগনবঢ়াৰ বিপৰীতে মহিলা আয়োগত অভিযোগ দাখিল হ’লে এইবাৰ তদন্তই কি ৰূপ লয় সেয়া পৰবৰ্তী সময়ত লক্ষনীয় হ’ব।
