কিদৰে সাজিব পাৰি উন্নত চৌকা? এই বিষয়েই প্ৰশিক্ষণ দিয়া হয় ডব্লিউ ডব্লিউ এফ (World Wildlife Fund)ৰ উদ্যোগত কাজিৰঙা ৰাষ্ট্ৰীয় উদ্যানৰ নতুনদাঙা গাঁৱত আয়োজিত এক কৰ্মশালাত।
শুকুৰবাৰে সামৰণি পৰা ৫ দিনীয়া কৰ্মশালাখনত কাজিৰঙাৰ কাঞ্চনজুৰি আৰু আমগুৰি এনিমেল কৰিড’ৰ এলেকাৰ ৯খন গাঁৱৰ ২৫গৰাকী যুৱকে এই প্ৰশিক্ষণত অংশগ্ৰহণ কৰে৷
প্ৰশিক্ষণটোত আন ১৭গৰাকী যুৱকক সৌৰচালিত সঁজুলিৰ মেৰামতি আৰু ব্যৱহাৰৰো প্ৰশিক্ষণ প্ৰদান কৰা হয়৷
অসম শক্তি উন্নয়ন বিভাগৰ হেৰেম্বৰ গোস্বামী আৰু কাৰ্ত্তিক শৰ্মা সমল ব্যক্তি হিচাপে উপস্থিত থকা প্ৰশিক্ষণটোৰ অন্তত প্ৰশিক্ষাৰ্থীসকলক মানপত্ৰৰ লগতে ১৫টা বৈদ্যুতিক লাইট আৰু ১০টা সৌৰচালিত লাইটো বিতৰণ কৰা হয়৷
প্ৰশিক্ষণটোত সহযোগিতা আগবঢ়াইছিল অসম শক্তি উন্নয়ন বিভাগ আৰু কাজিৰঙা ৰাষ্ট্ৰীয় উদ্যান কৰ্তৃপক্ষই।
সামৰণি অনুষ্ঠানত উপস্থিত থাকে কাজিৰঙাৰ সহকাৰী বন সংৰক্ষক ভাস্কৰ জ্যোতি বুঢ়াগোহাঁই আৰু ডব্লিউ ডব্লিউ এফৰ কাজিৰঙা-কাৰ্বি আংলং প্ৰকল্পৰ জ্যেষ্ঠ সমন্বয়ক প্ৰণৱ জ্যোতি বৰা।
“প্ৰদূষণ নিয়ন্ত্ৰণ আৰু বনাঞ্চলৰ ওপৰত জনসাধাৰণ নিৰ্ভৰশীলতা কমাবৰ বাবেই এই প্ৰচেষ্টা হাতত লোৱা হৈছে,” বৰাই জানিবলৈ দিয়ে৷
