প্ৰতিৰক্ষা মন্ত্ৰী নিৰ্মলা সীতাৰমনে শনিবাৰে বিয়লি নতুন দিল্লীৰ আৰ আৰ হাস্পাতালত উপস্থিত হৈ উয়িংকমাণ্ডাৰ অভিনন্দন বৰ্থমানক সাক্ষাৎ কৰি তেওঁৰ স্বাস্থ্যৰ বুজ লোৱাৰ লগতে দেশৰ প্ৰতি তেওঁৰ উৎসৰ্গিত সেৱাৰ বাবে ৰাষ্ট্ৰৰ অভিনন্দন আগবঢ়ায়।
পাকিস্তানৰ পৰা ভাৰতলৈ উভতাৰ পাছত শনিবাৰে এয়াৰ চীফ মাৰ্ছাল বিৰেন্দৰ সিং ধানোৱাক লগত লৈ প্ৰতিৰক্ষাৰ মন্ত্ৰীগৰাকীয়ে হাস্পাতলখনত অভিনন্দনক সাক্ষাৎ কৰে।
শুকুৰবাৰে আটাৰি ৱাঘা সীমান্তত নিশা ৯ বাজি ২১ মিনিটত দেশৰ মাটিত প্ৰৱেশ কৰে উয়িং কমাণ্ডাৰ অভিনন্দন বৰ্থমানে। দেশলৈ উভতাৰ পাছতে স্বাস্থ্য পৰীক্ষাৰ বাবে অভিনন্দনক নতুন দিল্লীৰ আৰ আৰ হাস্পাতলত ভৰ্তি কৰোৱা হয়।
উল্লেখযোগ্য যে মংগলবাৰে ভাৰতীয় বায়ুসেনাৰ অভিযানত পাক অধিকৃত কাশ্মীৰ আৰু পাকিস্তানৰ মূল ভূখণ্ডৰ বালাকোটত জইছ-ই-মহম্মদৰ তিনিটা প্ৰশিক্ষণ শিবিৰ ধ্বংস কৰা হৈছিল। ইয়াৰ পাছতে বুধবাৰে আকাশী সীমা উলংঘন কৰি পাকিস্তানী বায়ুসেনাৰ F-16 যুঁজাৰু বিমান ভাৰতত প্ৰৱেশ কৰে।
পাকিস্তানী বিমানৰ পাছ লোৱা কেইবাখনো ভাৰতীয় যুঁজাৰু বিমানৰ মাজত উয়িং কমাণ্ডাৰ অভিনন্দনে চলোৱা MiG-21 বিমান খনো আছিল। তেওঁ পাকিস্তানৰ F-16 বিমানখনক প্ৰতিহত কৰাৰ সময়তে পাকিস্তানী বিমান খনে এৰা মিছাইলৰ আঘাতত অভিনন্দনৰ বিমান খন ক্ষতিগ্ৰস্ত হয়।
বিমানখন নিয়ন্ত্ৰণৰ বাহিৰ হোৱাত অভিনন্দনে তাৰ পৰা পেৰাছ্যুটৰ সহায়ত জাপ দিয়ে। ইয়াৰ পাছতে পাক সেনাই তেওঁক নিজৰ জিম্মাত লয়। বৃহস্পতিবাৰে পাক প্ৰধানমন্ত্ৰী ইমৰাণ খানে অভিনন্দনক মুকলি কৰি দিয়াৰ ঘোষণা কৰে।
প্ৰতিৰক্ষা মন্ত্ৰী সীতাৰমনে উয়িং কমাণ্ডাৰ অভিনন্দনক সাক্ষাৎ কৰি তেওঁৰ লগতে তেওঁৰ পৰিয়ালৰ সৈতে কমেও এঘন্টা ধৰি বাৰ্তালাপ কৰে। মন্ত্ৰীগৰাকীৰ সাক্ষাতৰ সময়ত অভিনন্দনৰ পত্নী আৰু পুত্ৰ হাস্পাতলখনত উপস্থিত আছিল।
তামিলনাডুৰ মাদুৰাইৰ পৰা প্ৰতিনিধিত্ব কৰা প্ৰতিৰক্ষা মন্ত্ৰী গৰাকীয়ে লগতে যুঁজাৰু পাইলট গৰাকীৰ আশু আৰোগ্য কামনা কৰে।
