আজিৰ পৰা প্ৰায় পাঁচ বছৰৰ পূৰ্বে অৰ্থাৎ ২০১৪ৰ লোকসভা নিৰ্বাচনৰ আগমূহুৰ্তত বিজেপিৰ বাবে ছ’চিয়েল মিডিয়া হৈ পৰিছিল দলৰ প্ৰচাৰৰ এক গুৰুত্বপূৰ্ণ আহিলা। কিন্তু প্ৰচাৰৰ এই সুন্দৰ অহিলাক এতিয়া উৰাবাতৰি প্ৰচাৰৰো আহিলা হৈ পৰাৰ অভিযোগ উত্থাপন কৰিছে নিখিল ভাৰত কংগ্ৰেছ কমিটীৰ মুখপাত্ৰ তথা প্ৰচাৰ সমিতিৰ আহ্বায়ক পৱন খেৰাই।
দেওবাৰে গুৱাহাটীত দলৰ নিৰ্বাচনী প্ৰস্তুতি পৰ্য্যবেক্ষণ কৰি ৰাজীৱ ভৱনত সম্বোধন কৰা এখন সংবাদমেলত কংগ্ৰেছৰ মুখপাত্ৰগৰাকীয়ে কয়, “বিজেপি দেশত ছ’চিয়েল মিডিয়াৰে উৰাবাতৰি আৰু অপপ্ৰচাৰ কৰাৰ বাটকটীয়া”।
নিৰ্বাচনৰ প্ৰচাৰৰ বাবে কংগ্ৰেছে ছ’চিয়েল মিডিয়াৰ সহায় ল’ব বুলি মন্তব্য কৰি কংগ্ৰেছ নেতাজনে কয়, “কংগ্ৰেছে ছ’চিয়েল মিডিয়াৰ সুবিধা বহু দেৰিকৈ লৈছে। এই সুবিধা সকলোতকৈ আগতেই ২০১৪ চনত বিজেপিয়ে লৈছিল। কিন্তু যোৱা পাঁচ বছৰত তেওঁলোকে ছ’চিয়েল মিডিয়াৰ জৰিয়তে বহুতো উৰাবাতৰি আৰু অপপ্ৰচাৰ যে চলাইছে সেই কথা এতিয়া দেশৰ ছ’চিয়েল মিডিয়া ব্যৱহাৰকাৰীয়ে বুজি পাইছে”।
তেওঁ লগতে ছ’চিয়েল মিডিয়াৰ ভাল আৰু বেয়া দিশ সম্পৰ্কে কৈ কংগ্ৰেছে ছ’চিয়েল মিডিয়াৰে হোৱা অপপ্ৰচাৰসমূহ প্ৰতিৰোধ কৰি যাব আৰু দলটোৰ ভাল কামৰ প্ৰচাৰৰ বাবেই ইয়াক ব্যৱহাৰ কৰিব বুলি মন্তব্য কৰে।
ইয়াৰ উপৰি কাশ্মীৰৰ পুলৱামাত হোৱা সন্ত্ৰাসবাদী আক্ৰমণত বহুকেইগৰাকী চি আৰ পি এফৰ জোৱান নিহত হোৱা ঘটনা সন্দৰ্ভত মন্তব্য কৰি খেৰাই কয়, “কংগ্ৰেছ এটা দায়িত্বশীল ৰাজনৈতিক দল। আমি এই ঘটনাক লৈ ৰাজনীতি নকৰো আৰু আনকো কৰিব নিদিওঁ। কিন্তু বিজেপিয়ে এই ঘটনাক লৈ ৰাজনীতি কৰাৰ চেষ্টা চলাইছিল”।
এই ঘটনাক লৈ তেওঁ নৰেন্দ্ৰ মোদী নেতৃত্বাধীন চৰকাৰলৈ তিনিটা প্ৰশ্নও প্ৰক্ষেপ কৰে। তেওঁৰ প্ৰথম প্ৰশ্ন, “আক্ৰমণৰ ঘটনাৰ সংগঠিত কৰিবলৈ তালৈ আৰ ডি এক্স নিবলৈ পালে কেনেকৈ?” দ্বিতীয়তে “বহুকেইখন চি আৰ পি এফৰ গাড়ীৰ এটা কনভয় গৈ থকা অৱস্থাত তাত এখন অসামৰিক গাড়ী গৈ সোমাল কেনেকৈ?” শেষত নৰেন্দ্ৰ মোদীক উদ্দেশ্যি তৃতীয় প্ৰশ্নটো তেওঁ কৰে, “৩ বাজি ১০ মিনিটত ঘটনা সংঘটিত হোৱাৰ পাছত ৫ বাজি ১০ মিনিটলৈ দেশৰ প্ৰধান মন্ত্ৰী ক’ত আছিল?”
অৱশ্যে শেষৰ প্ৰশ্নৰ উত্তৰ তেওঁ নিজে দি কয় যে প্ৰধান মন্ত্ৰী মোদী তেতিয়া জিম কৰবেট ৰাষ্ট্ৰীয় উদ্যানত চুটিঙত ব্যস্ত আছিল। তাৰ পাছত তেওঁ এখন জনসভাও সম্বোধন কৰিছিল বুলি তেওঁ প্ৰকাশ কৰে।
একেখন সংবাদমেলতেই অসম প্ৰদেশ কংগ্ৰেছৰ নিৰ্বাচনী প্ৰস্তুতিক লৈও তেওঁ সন্তুষ্টি ব্যক্ত কৰে। অসমৰ দলীয় কৰ্মীসকল যথেষ্ট আত্মবিশ্বাসী বুলি দাবী কৰি তেওঁ এইবাৰ কংগ্ৰেছৰ বিজয়ত অসমৰ অৰিহণা গুৰুত্বপূৰ্ণ হ’ব বুলি মন্তব্য কৰে।
