অসমত সদ্যসমাপ্ত লোকসভা নিৰ্বাচনত নাগৰিকত্ব বিধেয়ক বিৰোধিতাৰে ভোট দিবলৈ আহ্বান জনাই অগপৰ পৰা বহিষ্কৃত হৈছে যুৱ নেতা ভাস্কৰজ্যোতি দাস।
দাস অগপৰ ভাতৃ সংগঠন অসম যুৱ পৰিষদৰ যুৱ-ছাত্ৰ কল্যাণ সম্পাদক।
ফে’চবুকত জনোৱা আহ্বানৰ বাবে যুৱনেতাজনক বহিষ্কাৰ কৰিছে নাগৰিকত্ব বিধেয়কৰ দুৰ্ঘোৰ বিৰোধিতাৰ দাবী কৰা আঞ্চলিক দলটোৱে।
“দলৰ নীতি-নিয়ম আৰু শৃংখলা ভংগ কৰি বিভিন্ন সামাজিক মাধ্যমত বক্তব্য দি দলৰ ভাবমূৰ্ত্তি বিনষ্ট” কৰিছে দাসে, ৩০ এপ্ৰিলত যুৱ পৰিষদৰ সাধাৰণ সম্পাদক জ্যোতিমণি মৰাণ প্ৰেৰিত পত্ৰত উল্লেখ। দাসক সংগঠনৰ “পদবী আৰু প্ৰাথমিক সদস্য”ৰ পৰা বহিষ্কাৰ কৰা হৈছে।
ইফালে এই অভিযোগ সম্পূৰ্ণ ভিত্তিহীন বুলি দাবী কৰি অভিযোগ প্ৰমাণৰ বাবে নেতৃত্বক প্ৰত্যাহ্বান জনাইছে যুৱনেতাজনে।
“দলৰ নেতৃত্বই সম্পূৰ্ণ স্বেচ্ছাচাৰী নীতিৰে মনে সজা অভিযোগ আনি মোক বহিষ্কাৰ কৰিছে। যদি মই সঁচাকৈয়ে দলৰ নীতি-নিয়ম আৰু শৃংখলা ভংগ কৰিছো সেয়া ২৪ ঘন্টাৰ ভিতৰত প্ৰমাণ কৰি দেখুৱাওক,” বহিষ্কৰণৰ পিছতে বুধবাৰে গুৱাহাটী প্ৰে’ছ ক্লাবত এক সংবাদমেলযোগে মন্তব্য ভাস্কৰজ্যোতি দাসৰ।
সংগঠনৰ সিদ্ধান্তৰ সপক্ষে স্থিতি লৈ পৰিষদৰ সভাপতি সুনীল ডেকাই নৰ্থ-ইষ্ট নাওত প্ৰতিক্ৰিয়া প্ৰকাশ কৰিছে।
“ভাস্কৰজ্যোতি দাসে যোৱা নিৰ্বাচনত ‘কেব’ৰ বিৰুদ্ধে ভোট দিবলৈ আহ্বান জনাইছে। যিহেতু আমি বিজেপিৰ লগত মিত্ৰতাত আছো তেনেক্ষেত্ৰত ‘কেব’ৰ বিৰুদ্ধে ভোট দিবলৈ কোৱাটো নীতিসংগত নহয়। দলৰ সিদ্ধান্ত অনুসৰি আমি বিজেপিৰ সৈতে যিহেতু বুজাবুজি কৰিছো গতিকে এই সিদ্ধান্তৰ বিৰোধিতা কৰি মন্তব্য কৰিলে দলৰ ক্ষতি হয়,” সুনীল ডেকাৰ মত।
দাসৰ আন কিছু কামেও দলৰ ক্ষতি কৰা বুলি মন্তব্য কৰি ডেকাই কয় যে সেইসমূহ পাছত সংবাদমেলযোগে প্ৰকাশ কৰা হ’ব।
ইপিনে, ভাস্কৰজ্যোতি দাসে সংবাদমেলত তেওঁক দলৰ সংবিধান উলংঘা কৰি বহিষ্কাৰ কৰা হৈছে বুলিও মন্তব্য কৰে। কাৰণ অগপৰ সংবিধানৰ ৩৫ নম্বৰ দফাত সন্নিবিষ্ট দলীয় অনুশাসন অনুসৰি কোনো সদস্যই দলৰ নীতি-আদৰ্শ আৰু দলীয় নিৰ্দেশৰ পৰিপন্থী কাম কৰিলে তেওঁৰ বিৰুদ্ধে যাৱতীয় তদন্ত চলাই অনুশাসনমূলক ব্যৱস্থা গ্ৰহণৰ বাবে সভাপতিক পৰামৰ্শ দিবলৈ দলৰ অনুশাসন উপসমিতি গঠন কৰিব লাগে।
কিন্তু দাসে জনোৱা মতে দলে তেওঁক পূৰ্বে কোনো কাৰণ দৰ্শোৱাৰ জাননী, তেওঁৰ বিৰুদ্ধে কোনো তদন্ত নকৰাকৈয়ে নেতৃত্বই একপক্ষীয়ভাৱে সিদ্ধান্ত লৈ তেওঁক বহিষ্কাৰ কৰিছে। গতিকে দলৰ নেতৃত্বৰ এই কাৰ্য্যক আক্ৰোশমূলক আখ্যা দি তেওঁ কয়, “দলৰ কেইজনমান নেতা ন্যস্তস্বাৰ্থ সিদ্ধিৰ ক্ষেত্ৰত বাটৰ কাঁইট হিচাপে গণ্য কৰি মোৰ বিৰুদ্ধে এই সিদ্ধান্ত লৈছে।”
“অগপৰ অভ্যন্তৰীণ গণতন্ত্ৰক হত্যা কৰিব বিচৰা হৈছে আৰু দলটোক কেইজনমান ব্যক্তিয়ে এটা ক্লাবত পৰিণত কৰিছে,” দাসে কয়।
দলে বহিষ্কাৰ কৰা অগপ যুৱনেতাজনে আগলৈও নাগৰিকত্ব সংশোধনী বিধেয়কৰ বিৰুদ্ধে মাত মাতি যাব বুলি সংবাদমেলত স্পষ্ট কৰে।
লগতে দলৰ সভাপতি অতুল বৰালৈ এখন পত্ৰ প্ৰেৰণ কৰি তেওঁৰ বিৰুদ্ধে লোৱা সিদ্ধান্ত পুনৰ বিবেচনাৰ বাবেও তেওঁ আহ্বান জনাব।
